Тэхъутэмыкъое районым ит поселкэу Яблоновскэм цIыф зэрымыс быбырэ аппаратхэу шышъхьэIум и 30-м чэщым къыщыраутэхыгъэхэм япкъыгъоу къефэхыгъэхэм зэрарэу къахьыгъэм идэгъэзыжьын епхыгъэ гъэцэкIэжьын IофшIэнхэр непэрэ мафэм ехъулIэу ыкIэм фэкIуагъэх.

Поселкэм иадминистрацие илIыкIохэмрэ коммунальнэ хъызмэтшIапIэхэм яIофышIэхэмрэ зэгъусэхэу хъугъэ-шIагъэм ыпкъ къикIыкIэ электричествэм, гъэстыныпхъэ шхъуантIэм ыкIи псым япхыгъэ гъэцэкIэжьынхэр зэшIуахыгъэх ыкIи ахэр джы икъу фэдизэу цIыфхэм аIэкIахьэх, агъэфедэх.
Шъугу къэдгъэкIыжьын, цIыф зэрымыс быбырэ аппаратхэр поселкэм ышъхьагъ къызыщыраутэхыхэм, ахэм япкъыгъохэм фэтэр 47-мэ яшъхьаныгъупчъэ апчхэр хаутыгъэх, чIылъэ унэ 15-м зэрар арахыгъ, хъызмэтшIэпIитIум яунэхэм къутагъэ­хэр афи­шIыгъэх ыкIи зы IофшIэпIэ цех зэщагъэкъуагъ.
Джащ лъыпытэу чIыпIэм къэсы­гъэх цIыфхэм псынкIэу IэпыIэгъу афэ­хъущт къулыкъу зэфэшъхьафхэр, хэбзэ ухъумакIохэр ыкIи коммунальнэ хъызмэтшIапIэхэм яIофышIэхэр. Ахэм ищыкIэгъэ Iофыгъохэр щынэгъончъэу ыкIи псынкIэу зэшIуахыгъэх, цIыфхэри зэрагъэгупсэфыщтхэм анаIэ тетыгъ. IофшIэнхэр зэрэкIохэрэм гъунэ алъифыгъ Адыгэ Республикэм и ЛIышъхьэу КъумпIылI Мурат. ТхьамыкIагъор къызщыхъугъэм екIолIа­гъэх, IофшIэныр зэхэзыщагъэхэм ащыщых Тэхъутэмыкъое районым, поселкэу Яблоновскэм яадминистрациехэм япащэхэу Шъэо Аскэррэ Атэжьыхьэ Заурдинрэ.
Мы хъугъэ-шIагъэм цIыф хэкIодагъэп, ау зы нэбгырэ шъобжхэр тещагъэ хъугъэ. Ащ медицинэ IэпыIэгъу рагъэкIыгъ, ипсауныгъэ зэтырагъэ­уцожьыгъ, щынагъо щыIэп.
Тэхъутэмыкъое районым иадминистрацие цIыфхэм къялъэIу хабзэм илIыкIохэм къатырэ къэбарыр агъэфедэнэу ыкIи ащ цыхьэ фашIынэу. Джащ фэдэу агу къагъэкIыжьы цIыф зэрымыс быбырэ аппаратхэм ыкIи ахэм япкъыгъохэм сурэт атепхы зэрэмыхъущтыр, ащ фэдэ сурэтхэр нэмыкI цIыфхэм афэбгъэхьымэ е социальнэ хъытыухэм къарыбгъа­хьэмэ пшъэдэкIыжь зэрэпхьыщтыр.
Гъомлэшк Байзэт.