Шэмбэт шIыхьафхэр республикэм щызэхащэщтых
Урысые экологие Iофтхьабзэу «Зеленая Россия» зыфиIорэм къыдыхэлъытагъэу 2025-рэ илъэсым иIоныгъо мазэ Адыгеим шэмбэт шIыхьафхэр щыкIощтых.
Ахэм язэхэщэн ыкIи республикэм ичIыпIэхэм якъэбзэныгъэ изытет шапхъэхэм адиштэу шIыгъэным фэгъэхьэгъэ унашъом Адыгэ Республикэм и ЛIышъхьэу КъумпIыл Мурат кIэтхагъ. Ащ къызэрэщиIорэмкIэ, Iоныгъом и 6-м, и 13-м, и 20-м ыкIи и 27-м шIыхьафхэр муниципальнэ образованиехэм ащызэхащэнхэ фай. Къэралыгъо хэбзэ къулыкъухэр зэкIэ ахэм ахэлэжьэнхэу ЛIышъхьэм унашъо къышIыгъ, министерствэ ыкIи Комитет пэпчъ гъэнэфагъэу пшъэрылъхэр къыхигъэщыгъэх.
Iофтхьабзэм къыдыхэлъытагъэу псэупIэхэм яурамхэр, общественнэ ыкIи организациехэм, учреждениехэм къызэлъаубытырэ чIыпIэхэр агъэкъэбзэщтых, хэкIыр дащыщт, къэгъагъэхэр ыкIи чъыг цIыкIухэр агъэтIысхьащтых, къэкIыгъэхэм алъапсэхэр агъэлэщтых, яшIушIэщтых. Мы пшъэрылъхэр зэрифэшъуашэм тетэу гъэцэкIэгъэнхэм республикэм ипащэ мэхьанэшхо реты, чIыпIэ зыгъэIорышIэжьыпIэхэр анахьэу зылъыплъэнхэ фэе лъэныкъохэм анаIэ тырарегъадзэ.
Iофтхьабзэу «Зеленая Россия» зыфиIорэм учреждениехэр, къулыкъухэр, организациехэр, волонтерхэр ыкIи гуфакIохэр, еджапIэхэр, нэмыкIхэри хэлэжьэнхэ алъэкIыщт.