Статистикэм изэфэхьысыжьхэм къызэрагъэлъагъорэмкIэ, Адыгэ Республикэм анахь зыщызыушъомбгъугъэ бзэ­джэ­шIагъэхэм ащыщых псэупIэхэм зэрятыгъохэрэр.

Мыщ фэдэ мыхъо-мышIагъэхэр тхьамафэ къэс полицием иIофышIэхэм агъэунэфых. БзэджэшIагъэхэр анахьэу къызщыхагъэщыхэрэр къалэу Мыекъуапэ, Тэхъутэмыкъое ыкIи Мыекъопэ районхэр ары.
УнаIэ зытетын фаер
ШъхьаныгъупчъэмкIи пчъэмкIи тыгъуакIор унэм ихьан ылъэ­кIыщт. Арышъ, ахэр тэрэзэу гъэ­пы­тэгъэнхэм хэти ынаIэ тыри­гъэтын фае.
Фэтэрыбэу зэхэт унэхэм яапэрэ къатхэм ащыпсэухэрэр мы Iо­фы­гъом нахь егъэгумэкIых. Ащ къы­хэкIыкIэ шъхьаныгъупчъэхэр дэ­гъоу бгъэпытэнхэр е ахэм гъучI хъа­гъэхэр аIуплъхьанхэр нахь тэрэз.
Мэфэ заулэм унэм зыпари имысын хъумэ, гъунэгъухэм е Iахьылхэм шъуялъэIу ащ къыфэсакъынхэу. Зыщышъумыгъэгъупш, унэр зиехэр зэримысхэм бзэджашIэхэр бэрэ лъэплъэх, чанэу зэрагъашIэ, кIэупчIэх. Почтэм икъэмланхэм адэлъхэми шъунаIэ атежъугъэт — унэм зыпари зэримысым ишы­хьат ащ дэлъхэр зыми охътэ гъэ­нэфагъэм зэрэдимыхыхэрэр.
ЦIыфхэм шъуахахьэмэ е шъу­къы­рагъэблэгъагъэмэ, мылъкоу шъуиIэр зыфэдизыр къафэшъумы­Iуат. Ахъщэр унэм имылъмэ на­хьышIу.
ТыгъуакIохэм унэм ралъэгъорэ уасэ зиIэ Iэмэ-псымэхэмрэ хьап-­щыпхэмрэ зы такъикъкIэ рахынхэ алъэкIыщт.
ШъумышIэрэ цIыфхэр унэм къи­шъумыгъахьэх. Ау зыгорэ шъуа­дэжь къыIухьагъэмэ, ащ шъунаIэ тежъугъэт, зыфаем шъукIэупчI, шъуинэплъэгъу ишъумыгъэкI, ышIэ­рэм шъулъыплъ.
ЦIыфым къетыгъуагъэхэу къызхи­гъэщыкIэ, унэ кIоцIыр ежь-ежьырэу къыплъыхьэрэп ыкIи унэгъо IапIэхэр ыгъэкощыхэрэп, джащ фэдэу бзэ­джашIэм лъэужэу къыгъэнагъэхэм уатеуцо, уате­Iабэ хъущтэп. ПсынкIэу телефонэу 02-мкIэ макъэ полицием ригъэIун фае.