Кушъхьэфэчъэ спор­тым­кIэ зэнэкъокъоу «Темыр Кавказым щыпсэурэ лъэпкъхэм язэкъошныгъ» зыфиIорэр я 33-у Адыгэ Республикэм щаублэщт.

Адыгеим иапэрэ Президентэу Джарымэ Аслъан игукъэкIкIэ 1993-рэ илъэсым ар апэрэу тиреспубликэ щыкIуагъ. Мыщ ыуж зэнэкъокъум изэхэщэн, чIыпIэу зыщаублэщтым икъыхэхын зэхъокIыныгъэхэр фэ­хъугъэх, ау сыдигъуи зэблэмыхъугъэу къэнэжьырэрэ зы — шIокI имыIэу ащ иедзыгъохэр тишъолъыр щырагъэкIокIынхэр.
Мыгъэрэ зэнэкъокъум хэлэжьэщтых Урысыем, Беларусь, Казахстан ыкIи Зэхэт Араб Эмиратхэм яспортсмен анахь лъэшхэр. Iоныгъом и 3-м щегъэжьагъэу и 21-м нэс ахэр текIоныгъэм ыкIи хагъэу­нэфыкIырэ чIыпIэхэм афэбэнэщтых. Iофтхьабзэм икъызэIухын фэгъэхьыгъэ мэфэкI зэхахьэ непэ (пчыхьэм сыхьатыр 6-м) Мыекъуапэ игупчэу Лениным ыцIэ зыхьырэм щыкIощт, зэнэкъокъум хэлэжьэрэ командэхэр ыкIи ахэм яспортсменхэр къагъэлъэгъощтых.

ЗэхэщакIохэм зэрагъэнэфагъэмкIэ, апэрэ едзыгъом къыдыхэлъытагъэу спортсменхэм ягъогууанэ Iоныгъом и 3-м республикэм икъэ­лэ шъхьаIэ щырагъэжьэщт: станицэу Джаджэм, Шэуджэн районым ит поселкэу Заревэм, нэужым къуаджэу Улапэ, псэупIэу Штурбинэм, къутырэу Ореховым апхырыкIырэ гъогухэм арычъэнхэшъ, Мыекъуапэ къагъэзэжьыщт. Iоныгъом и 4-м ятIонэрэ едзыгъор рагъэжьэщт, ар Краснодар краим игъогухэм апхырыкIыщт.