Адыгэ Республикэм иминистрэхэм я Кабинет изэхэсыгъо АР-м и ЛIышъхьэу КъумпIыл Мурат пшъэрылъ зэрэфишIыгъэм тетэу зэрищагъ министрэхэм я Кабинет и Тхьаматэу КIэрэщэ Анзаур. ИлъэсыкIэ еджэгъум организациехэр зэ­рэфэхьазырхэм фэгъэхьыгъэ къэбарым ахэр едэIугъэх.

АР-м гъэсэныгъэмрэ шIэныгъэмрэкIэ иминистрэу Евгений Лебедевым къызэри­IуагъэмкIэ, къулыкъу комиссиехэм ашIыгъэ зэфэхьысыжьымкIэ республикэм иеджапIэ­хэр зэкIэ илъэсыкIэ еджэгъум фэхьазырых.
Адыгеим пстэумкIи зэхэубытэгъэ гъэсэныгъэ зыщарагъэгъотырэ организации 140-рэ ит. Мы илъэсым ахэм япчъагъэ нахьыбэ хъугъэ: Iоныгъом и 1-м кIэу еджэпIи 3 къызэIуахыщт, нэбгырэ 1100-рэ зычIэфэщт еджэпIи 2 къэлэ гъэпсыкIэ зиIэ псэупIэу Яблоновскэмрэ къалэу Мыекъуапэрэ къащызэIуахыщтых, псэупIэу Табачнэм нэбгырэ 250-мэ ателъытэгъэ еджапIэм ипчъэхэр къызэIуихыщтых. ИлъэсыкIэ еджэгъум ехъу­лIэу еджэпIи 8-мэ игъэкIотыгъэ гъэцэкIэ­жьынхэр арашIылIагъэх. ПстэумкIи 2025-рэ илъэсым еджэпIи 9-мэ яуни 10 игъэкIотыгъэу агъэцэкIэжьыгъ. Мыекъопэ еджапIэу N 17-м къыпэIулъ чIыпIэм изэтегъэпсыхьан макIо. Арышъ, мэзэ заулэрэ кIэлэеджакIохэр еджэпIакIэу гъунэгъоу къызэIуахыщтым щеджэщтых.
2022-рэ илъэсым къыщегъэжьагъэу 2024-м нэс еджэпIэ 20-мэ яунэхэр игъэкIотыгъэу агъэцэкIэжьыгъэх. Джащ фэдэу кIэлэ­цIыкIу IыгъыпIэхэм яигъэкIотыгъэ гъэ­цэкIэжьын ипрограмми ублагъэ хъугъэ.
АР-м гъэсэныгъэмрэ шIэныгъэмрэкIэ иминистрэ къызэрэхигъэщыгъэмкIэ, 2025 — 2027-рэ илъэсхэм еджапIэхэм якабинети 103-рэ зэтырагъэпсыхьащт: предметэу «Хэгъэгум ищынэгъончъэнрэ икъэухъумэнрэ алъапсэхэр» зыфиIорэмрэ «Технологиехэмрэ» ателъытагъэу. Ащ нэмыкIэу еджэнымкIэ программэр а предметхэмкIэ гъэцэкIагъэ хъуным пае Мыекъуапэ дэт гурыт еджапIэу N 7-м методическэ гупчэ щызэхащэщт.
ХэушъхьафыкIыгъэу тегущыIагъэх гъэ­сэныгъэм иорганизациехэр терроризмэм щыу­хъумэгъэнхэм иIофыгъо. Ащ хэхьэх ма­къэ къэзгъэIущт пкъыгъохэм (сигнализациехэм) зэпыу ямыIэу Iоф зэрашIэщтыр, видеолъыплъэным ыкIи машIом игъэкIосэн, цIыфхэр тхьамыкIагъо къызщыхъурэ чIыпIэм ращынхэм апае агъэфедэрэ амалхэр аIэкIэ­лъынхэр. Гъэсэныгъэ зыщарагъэгъотырэ организациехэм яIофышIэхэмрэ къэухъумэным иIофыгъохэм афэгъэзагъэхэмрэ игъэ­кIотыгъэу щагъэгъозагъэх ошIэ-дэмышIагъэ зыхэлъ тхьамыкIагъо къэхъумэ зэрэзекIощт­хэ шIыкIэм. Джыри игугъу къэшIыгъэн фае къуаджэхэм ащеджэрэ кIэлэцIыкIухэм язещэн (еджапIэм нэгъэсыгъэнхэм ыкIи ядэжь къэщэжьыгъэнхэм) щынэгъончъэу щытыным. Ащ пае Адыгеим автопаркыр зэрэпсаоу щагъэкIэжьыгъ. 2016-рэ илъэсым къыщегъэ­жьагъэу 2024-м нэс еджапIэхэм автобуси 121-рэ аIэкIагъэхьагъ. Мы илъэсым джыри автобуси 7 аратынэу щыт. Гъэсэныгъэ зыщарагъэгъотырэ учреждение пстэуми къапэIулъ гъогухэр агъэтхъыгъэх.
ИкIэухым АР-м иминистрэхэм я Кабинет и Тхьаматэ хабзэр укъуагъэ мыхъуным, терроризмэм щыухъумэгъэнхэм, гъогузекIоныр щынэгъончъэу щытыным апае ищыкIэгъэ Iофтхьабзэхэр зэрахьанхэу пшъэрылъ афишIыгъ. ШIэныгъэм и Мафэ рэхьатэу, кIэлэеджакIохэмкIэ мэфэ гушIуагъоу ыкIи агу къинэжьыщт мэфэкIэу хъун фае.
АР-м и ЛIышъхьэ ипресс-къулыкъу