ТикIэлэеджэкIо ыкIи тистудент лъапIэхэр!
Лъытэныгъэ зыфэтшIырэ кIэлэегъаджэхэмрэ ны-тыхэмрэ!

ШIэныгъэм и Мафэрэ илъэсыкIэ еджэгъум иублэгъурэ афэшI тышъуфэгушIо!
Iоныгъом и 1-р — анахь мэхьанэшхо зиIэ мафэхэм ащыщ. ЛIэуж пстэури ащ зэрепхы, унагъохэм язэгурыIоныгъэ гъэпытэгъэным фэлажьэ, шIэныгъэмрэ гъэсэныгъэмрэ уасэу яIэм нахь тырегъэгупшысэ.
Мы мафэм апэрэ классым кIохэрэм бэ зэмысагъэхэу алъэгъурэр. ЕгъашIэми ащымыгъупшэжьыщт хъугъэ-шIэгъэ гушIуагъоу а мафэр агу къинэщт. КIэлэеджэкIо нахьыжъхэмрэ студентхэмрэ зэфэкIэщыгъохэу гъэмэфэ зыгъэпсэфыгъор зэра­гъэкIуагъэр къызэфаIотэжьы, еджэным зыфытырагъэпсыхьажьы.
Нахьыжъхэм пшъэрылъэу яIэр къыткIэхъухьэхэрэм гъэсэныгъэ дэгъу арагъэгъотыныр, агу зыфэкIорэ сэнэхьатыр къыхахынышъ, IофшIэным егугъухэзэ щыIэныгъэм пытэу хэуцонхэмкIэ IэпыIэгъу афэхъунхэр ары.
Адыгэ Республикэм лъэшэу анаIэ щатырагъэты гъэсэныгъэмрэ пIуныгъэмрэ. Я ХХI-рэ лIэшIэгъум къыгъэуцурэ пшъэрылъхэм тиеджапIэхэр адиштэнхэм пае бэ зэшIотхырэр: сэнаущыгъэ зыхэлъ ныбжьыкIэхэм зыкъызэIуахынымкIэ тишIуа­гъэ ятэгъэкIы, еджапIэхэр тэгъэцэкIэжьых ыкIи кIэхэр тэшIых, мылъку-техникэ лъэныкъомкIэ дэгъоу зэтетэгъэпсыхьэх, егъэджэнымкIи шIыкIэ-амалыкIэхэр тэгъэфедэх.
IофшIэнышхоу республикэм щыкIорэм обществэмрэ къэралыгъомрэ федэ къа­фэзыхьыщт кIочIакIэхэр нахьыбэ хъунхэмкIэ ишIогъэшхо къызэрэкIощтым тицыхьэ телъ.
Мы мэфэкI мафэм тыгу къыддеIэу тикIэлэ лъапIэхэм тафэлъаIо псауныгъэ пытэ яIэнэу, еджэнымкIэ гъэхъагъэхэр ашIынхэу, творчествэмкIэ, спортымкIэ зыкъызэIуахынэу, джащ фэдэу кIэлэегъаджэхэм – яIэпэIэсэныгъэ джыри нахь хэхъонэу, ны-тыхэм – якIэлэцIыкIухэм ягъэхъагъэхэм агъэгушIонхэу, арыгушхонхэу!
Адыгэ Республикэм и ЛIышъхьэу, Урысые политическэ партиеу
«Единэ Россием» и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу
Владимир Нарожнэр