Адыгэ Республикэм щыпсэоу федеральнэ фэгъэкIотэнхэр зиIэхэм социальнэ фэIо-фашIэу ахэм къыдалъытэхэрэр зэрагъэфедэщтхэ шIыкIэр илъэс къэс цIыфхэм ежь-ежьырэу къыхахын амал яI. Ар чъэпыогъу мазэм и 1-м нэс зэшIуахын фае.

Социальнэ фэIо-фашIэхэм ахэхьэ рецепткIэ къащэфын фаеу къафатхыгъэ Iэзэгъу уцхэр ыпкIэ хэмылъэу къаIахынхэр, IэзэпIэ-гъэпсэфыпIэм япсауныгъэ щызэтырагъэуцожьыныр, ыпкIэ хэмы­лъэу ащ кIонхэр ыкIи къэкIожьынхэр. Мыхэр зэкIэ цIыфым ыгъэфедэн ылъэкIыщт, ахэм ачIыпIэкIэ ахъщэ къаIихыни фит. Джащ фэдэу фэIо-фашIэхэм ащыщ къы­гъэнэнышъ, адрэхэм ачIыпIэкIэ ахъщэр ыштэн амали иI. ГущыIэм пае, Iэзэгъу уцхэр къаIихынхэу, IэзэпIэ-гъэпсэфыпIэмрэ ащ зэрекIолIэщт транспортымрэ ачIыпIэкIэ компенсацие къыратынэу ыгъэпсын фит.
Социальнэ фэIо-фашIэхэм ауасэ илъэс къэс къэралыгъом къыхегъахъо. 2025-рэ илъэсым имэзае и 1-м къыщыублагъэу сомэ 1728-рэ чапыч 46-рэ ар мэхъу. Ар мазэ къэс къаты.
Мы социальнэ фэIо-фашIэхэр къызтефэхэрэм ащыщых Хэгъэгу зэошхом, нэмыкI зэо-зэпэуцужьхэм ахэлэжьагъэ­хэр, сэкъатныгъэ ахэзыхыгъэхэр, ахэм яунагъохэр, «Жителю блокадного Ленинграда», «Жителю осажденного Севастополя» зыфиIорэ тамыгъэхэр къызэратыгъэхэр, кIэлэцIыкIухэри зэрахэтхэу фашизмэм илъэхъан гъэрэу аIыгъы­гъэхэр, радиацием иягъэ зэригъэкIыгъэ­хэр, нэмыкIхэри.
«ФэгъэкIотэнхэр зиIэхэм социальнэ фэIо-фашIэхэр къызэраIэкIэхьэрэ шIыкIэр зэбла­хъунэу рахъухьагъэмэ, лъэIу тхылъыр къэралыгъо фэIо-фашIэхэм япортал щатын алъэкIыщт. Ащ нэмыкIэу, УФ-м и Социальнэ фонд и Къутамэу АР-м щыIэм икъулыкъоу цIыфхэм Iоф адэзышIэрэм е МФЦ-м якIуалIэхэми аIахыщт. Зэблихъун гухэлъ зимыIэм зыпари тхылъ ытын ищыкIагъэп, ежь ишIоигъоныгъэкIэ зэремыхъокIыфэ ар зытетым тетэу къэнэжьыщт, — къыIуагъ УФ-м и Социальнэ фонд и Къутамэу АР-м щыIэм ипащэу МэщлIэкъо Хьамидэ.
Федеральнэ фэгъэкIотэнхэр зиIэхэр социальнэ фэIо-фашIэхэм япакет зэрагъэфедэщтым дэгъоу егупшысэнхэ фае. Сыда пIомэ ар къызэрэIэкIэхьащт шIыкIэр зызэблихъукIэ, илъэс псаум ащ текIыжьын ылъэкIыжьыщтэп.
Мы лъэныкъомкIэ упчIэ зиIэхэм цIыфхэм Iоф адэзышIэрэ ЗыкI къулы­къум зыфагъэзэн алъэкIыщт. Телефоныр: 8(800)100-00-01. Мыщ узэрэтеощтым ыпкIэ птырэп, блыпэ — мэфэку мафэхэм пчэдыжьым сыхьатыр 9-м щегъэжьа­гъэу пчыхьэм сыхьатыр 6-м, бэрэскэшхом сыхьатыр 9-м щегъэжьагъэу 5-м анэс специалистхэм Iоф ашIэ.
Социальнэ хъытыуми итых: https://vk.com/sfr.respublikaadygeya, https://ok.ru/group/7000000I891168, https://t.me/osfr respublikaadygeya.