Чэчэн Республикэм иапэрэ Президентэу А.А. Кадыровым ишIэжь фэгъэхьыгъэ зэнэкъокъум Адыгэ Республикэм илIыкIо гъэхъэгъэшIухэр щишIыгъэх, текIоныгъэр къыщыдихыгъ. Къалэу Грознэм испорт комплексэу «Олимпийскэм» щызэхащэгъэ турнирым тишъолъыр къыщызыгъэлъэгъуагъэр Кощхьэблэ районым испортсменэу Бзэсэжъ Аслъан.

Ащ килограмм 67-м нэс къэзыщэчыхэрэм якуп зыщиушэтыгъ. Апэрэ екIолIэгъум килограмми 125-рэ, ятIонэрэм — килограмми 150-рэ (зэхэубытагъэу килограмм 275-рэ) къыIэтыгъ. Урысыем ишъо­лъыр 17-мэ къарыкIыгъэ спортсмени 166-рэ турнирым хэлэжьагъ.
Зэнэкъокъум текIоныгъэр ыкIи хагъэунэфыкIырэ чIыпIэхэр къыщыдэзыхыгъэхэм Урысыем и ЛIыхъужъэу Ахмат Кадыровым ыцIэ зыхьырэ общественнэ фондымрэ Чэчэн Республикэм атлетикэ онтэгъумкIэ и Федерациерэ агъэнэфэгъэ медальхэр, кубокхэр ыкIи ахъщэ шIухьафтынхэр аратыжьыгъэх.
Атлетикэ онтэгъумкIэ къэралыгъом испортсмен анахь лъэшхэр мы турнирым хэлэжьагъэх.