Адыгэ Республикэм пцэжъыеешэн спортымкIэ и Федерацие зэхищэгъэ зэнэкъокъум ныбжьыкIэхэр хэлэжьагъэх. Мы спорт лъэпкъыр зыгу рихьыхэрэр хыкъумэу «Клондайк» зыфиIорэм щызэрэугъоигъэх, зэкIэмкIи команди 10 хъущтыгъэх.

Мэфищрэ кIогъэ Iофтхьабзэм спорт­смен ныбжьыкIэхэм ухьазырыныгъэ дэгъу къыщагъэлъэгъуагъ, текIоныгъэм фэбэнагъэх. Пцэжъыеу къыхадзыгъэм зэкIэмкIи тонни 2,8-м ехъу къыщэ­чыгъ.
Лъэныкъоу «Общий вес» зыфиIорэм пэрытныгъэр щиубытыгъ командэу «Карптудей Джуниор» (Т. Пензевыр, Г. Жалдаковыр), ятIонэрэ чIыпIэр къыдихыгъ «КВК Джуниор» (Д. Морозовыр, А. Стряпан, Д. Шемякиныр), ящэнэрэ хъугъэ «Кирп-Карп» зыфиIорэ командэр (Е. Критининыр, М. Магера).
Пцэжъые анахь инитф къэзыубытыгъэхэм язэнэкъокъу щытекIуагъ командэу «КВК Джуниор» (Д. Морозовыр, А. Стряпан, Д. Шемякиныр), «Карптудей Джуниор» зыфиIорэр ятIонэр (Т. Пензевыр, Г. Жалдаковыр), «Кирп-Карпым» ящэнэрэ чIыпIэр фагъэшъошагъ (Е. Критининыр, М. Магера).