ХэушъхьафыкIыгъэ дзэ операцием хэлэжьагъэхэм яIахьылхэм къэралыгъо тынхэр зыщаратыжьыгъэ Iофтхьабзэ Мыекъопэ къэлэ администрацием тыгъуасэ щыкIуагъ.

Ядзэ пшъэрылъхэр агъэцакIэхэзэ лIыхъужъныгъэ, псэемыблэжьныгъэ ыкIи гу кIуачIэ къызэрэзхагъэфагъэм фэшI УФ-м и Президент и УнашъокIэ ЛIы­хъужъныгъэм иорден (ядунай захъо-
жьым ыуж) къызфагъэшъошагъэхэм я гупсэхэм Мыекъопэ къэлэ админист­рацием ипащэу Геннадий Митрофано-
вым аритыжьыгъэх. Адыгеим и ЛIышъхьэ ыцIэкIи, ежь ышъхьэкIи Геннадий Митрофановыр фэхыгъэхэм яIахьылхэм афэтхьаусыхагъ.

ЛIыхъужъныгъэм иорден (ядунай захъожьым ыуж) къафагъэшъошагъэх сержантэу Евгений Ващенкэм, младшэ сержантхэу Андрей Стаценкэм ыкIи Александр Рудь, дзэкIолIхэу ХьакIэкожъ Мурат, ефрейторэу Алексей Кочкаловым.
— ТидзэкIолIхэр лIыхъужъ шъыпкъэх, лIыгъэ ахэлъэу, щынэ амышIэу ядзэ пшъэрылъ агъэцэкIагъ. Урысыем имамыр цIыфхэр, илъэпкъ щынэгъончъагъэ къау­хъумэхэзэ фэхыгъэх. ЛIыхъужъхэм яшIэжь сыдигъокIи тыгухэм ары­лъыщт, — къыIуагъ Геннадий Митрофановым.
Тихэгъэгу къаухъумэзэ хэкIодагъэхэм ягупсэхэм ахэм афашIэжьышъущт за­къор дзэкIолIхэм яшIэжь къаухъумэныр, ащымыгъупшэнхэр ары. Тикъэралыгъо итарихъ ахэр егъэшIэрэ лIыхъужъэу къы­хэнэщтых.