Республикэм икъэлэ шъхьаIэ кIэлэцIыкIу ибэхэм фэтэрхэм яIункIыбзэхэр ятыгъэнхэм фэ­гъэхьыгъэ Iофтхьабзэр щы­кIуагъ.

Къэралыгъо программэм къыдыхэлъыта­гъэу псэупIэ чIыпIэу «Лэгъо-накъэ икъушъ­хьэ­лъап» зыфиIорэм унакIэхэр къащаратыгъэх. Урысыем и ЛIыхъужъэу Вла­димир Жогэ ыцIэ зыхьырэ урамым а унэр тет.
Iофтхьабзэм хэлэжьагъэх Адыгеим и ЛIышъхьэу КъумпIыл Мурат, Къэралыгъо Советым — Хасэм и Тхьаматэ игуадзэу Цэй Эдуард, федеральнэ инспектор шъхьа­Iэу Сергей Дрокиныр, программэу «ЛIы­хъужъхэм яуахътэ» хэлэжьэрэ Сергей Ко­валевыр, УФ-м и Следственнэ комитет и Следственнэ гъэIорышIапIэу Адыгеим щыIэм ипащэу Василий Лариныр, Мые­къуапэ имэрэу Геннадий Митрофановыр, АР-м иминистрэхэм я Кабинет хэтхэр, унэр зышIыгъэ организациеу Iахьзэхэлъ обществэу «ОБД» зыфиIорэм ипащэхэр.
КIэлэцIыкIу ибэхэмрэ ны-тыхэр зы­шъхьарымытыжьхэмрэ зычIэсыщт унэхэр ятыгъэнхэм пае илъэсэу тызхэтым сомэ миллион 468,8-рэ къафатIупщыгъ, ащ щыщэу сомэ миллион 435-р республикэ бюджетым къыхэкIыгъ. А ахъщэмкIэ кIэлэцIыкIуи 150-мэ унэхэр аратыщтых, фэтэр 90-р къафащэфыгъах. Непэ программэм хэлэ­жьэрэ нэбгырэ 51-мэ IункIыбзэхэр аратыжьыгъэх. 2024-рэ илъэсым къэралыгъо программэм къыдыхэлъытагъэу кIэлэцIыкIуи 150-мэ фэтэрхэр къафащэфыгъэх.
Унэхэр зиIэ хъугъэхэм КъумпIыл Мурат афэгушIуагъ, социальнэ ифраструктурэр унакIэхэм апэблэгъэнымкIэ Iофтхьабзэу зэрахьэхэрэми къащыуцугъ. КIэлэцIыкIу IыгъыпIэхэр, еджапIэхэр, социальнэ учреждениехэр, псауныгъэм икъэухъумэнкIэ псэуалъэхэр, сатыушIыпIэхэр ыкIи нэмыкI­хэр ащ пэблагъэу агъэпсыщтых.

«Мы аужырэ илъэсхэм кIэлэцIыкIу ибэхэм ыкIи ны-тыхэр зышъхьарымытыжьхэм унакIэхэр ятыгъэнхэм ылъэныкъокIэ макIэп зэшIуахыгъэр. Ащ фэдэ проекты­шхор гъэцэкIагъэ хъуным пае федеральнэ гупчэми IэпыIэгъу республикэм къыреты, ащ дакIоу ежьми икъэкIуапIэхэр егъэфедэх. БлэкIыгъэ илъэсхэм зэтырихьэгъэ чэзыу­хэр щымыIэжьынхэм пае мы илъэс благъэхэм республикэ бюджетым къыхэдгъэ­кIырэ мылъкур игъорыгъозэ нахьыбэ тшIыщт», — къыIуагъ КъумпIыл Мурат.
Адыгеим и ЛIышъхьэ анаIэ тыраригъэ­дзагъ федеральнэ ыкIи республикэ лъэгапIэхэм атетэу хэгъэгум унэгъуакIэхэр къи­тэджэнхэм, кIэлэцIыкIоу къэхъурэр нахьыбэ хъуным, сабыйхэр зэрыс уна­гъохэм IэпыIэгъу ятыгъэным, цIыфхэм ящы­IакIэ нахьышIу шIыгъэным апае амалэу щыIэр зэкIэ зэрагъэфедэрэм.
Василий Лариным къызэри­IуагъэмкIэ, социальнэ псэупIэхэр ятыгъэнхэмкIэ, мыщ хэхьэх кIэлэцIыкIу ибэхэм ара­тырэ унэхэри, республикэр Iофхэр анахь дэгъоу зэ­хэзыщэрэ шъолъырхэм ащыщ. А программэхэм социальнэ мэхьанэшхо яI.
КъэгущыIагъэхэм къыхагъэщыгъ унэхэм яшIынкIэ проектым ипхырыщын IэпыIэгъу зэрэфэхъухэрэм пае республикэм ипащэхэм зэрафэразэхэр.
Адыгеим и ЛIышъхьэу КъумпIыл Мурат унакIэхэр къыплъыхьагъэх, программэм хэлажьэхэрэм гущыIэгъу афэхъугъ, гухэлъэу яIэхэм защигъэгъозагъ ыкIи гъэхъагъэ хэлъэу щыIэныгъэм ахэр пхыращынхэу афэлъэIуагъ.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.