Гъэмэфэ зыгъэпсэфыгъор ыкIэм фэкIуагъ, мэфэ зау­лэкIэ илъэсыкIэ еджэгъур аублэщт. Iоныгъом и 1-р кIэлэ­еджа­кIо пэпчъ имэфэкI, ау анахьэу ащ ежэхэрэр ыкIи зыфэзыгъэхьазырхэрэр апэрэ классым кIощтхэр ары, шIэныгъэм игъогу ахэр техьэх.

Сабыир еджапIэм фэбгъэхьазырыным макIэп ищыкIагъэр, джырэ шапхъэхэм адиштэу апэрэ шIэныгъэхэр иIэнхэ зэрэфаем дакIоу ищыкIэгъэ щыгъынхэр, Iэмэ-псымэхэр ебгъэгъотынхэу щыт.
ШышъхьэIу мазэр къызихьагъэм къы­щегъэжьагъэу бэдзэрхэм, щэпIэ чIыпIэхэм ащыжъот, ны-тыхэм ясабыйхэр еджапIэм нахь игъэкIотыгъэу фагъэ­хьазырхэу аублагъ. Илъэс къэс кIэлэ­еджакIом ищыкIагъэхэм ауасэ хэхъо. Зэфэхьысыжьхэм къызэрагъэлъэгъуа­гъэмкIэ, апэрэу еджапIэм кIощтхэм ягъэхьазырын нахь къин ыкIи нахь лъапIэу къекIы, сыда пIомэ зэкIэ кIэу къыфащэфы, ахэм анахьыжъхэм ыпэрэ илъэсым яIэгъэ горэхэри агъэфе­дэжьын алъэкIы.
Мыекъопэ бэдзэрым Iоф щызышIэрэ бзылъфыгъэм къызэрэтиIуагъэмкIэ, кIэ­лэцIыкIур зычIэхьащт еджапIэм щырищыкIэгъэщтхэр нахьыбэрэмкIэ тхыгъэу къыраты, ащ елъытыгъэу ны-тыхэр мэ­щафэх. Апэрэ классым кIорэ кIэлэ­еджакIом игъэхьазырын ахъщэу пэIухьащтыр къызыплъытэжькIэ, гурытымкIэ сомэ мин 20 — 50 фэдизэу къекIы. Iалъмэкъхэм ауасэ сомэ мини 3-м къы­щегъэжьагъэу 7-м нэсы, нахь лъапIэхэри щыIэх. Ащ дакIоу Iоныгъом и 1-м еджапIэм ыхьыщт къэгъэгъэ Iэрам анахь цIыкIум сомэ мин ыуас, гурытымкIэ сомэ мини 3-кIэ нахьыбэмэ ащэфы.
Делэкъо Темыр мыгъэ Адыгэ рес­публикэ гимназием чIэхьэ. Зыщыпсэу­хэрэм мыр нахь пэблагъ ыкIи шIэныгъэ куухэр мыщ щарагъэгъотэу, адыгабзэр дэгъоу щызэрагъашIэу зызэхахым, ны-тыхэм ар къыхахыгъ. Апэрэ кIэлэегъа­джэр Мац Мариет.

Темыр еджэным фэхьазырэу макIо, еджакIэ, тхакIэ, лъытакIэ ешIэ. ИлъэситIум къыкIоцI тхьамафэм тIогъогогъо пэублэ классым кIощтхэр зыщагъэхьазырырэм кIуагъэ. Гимназием чIэхьаным пае уплъэкIунэу ашIырэр къыфэкъи­ныгъэп.
КIэлэцIыкIум иапэрэ кIэлэегъаджэ пэшIорыгъэшъэу ны-тыхэр ыугъоихи гу­щыIэгъу афэхъугъ. Зэдырагъаштэу зыкI шъуашэ ащымыгъэу, джанэхэр фыжьэу, гъончэджыр е кIэпхыныр шIуцIэнэу е шхъонтIэнэу агъэнэфагъ. Iоныгъом и 1-м галстук адэлъыщт ыкIи апэрэ классым зэрихьэхэрэр къэзыушыхьатырэ лентэр ателъыщт.
НэмыкI еджапIэхэм афэдэу гимна­зием тхылъхэр къащыратыгъэх, ау Iоф зэрашIэщт тетрадьхэр ыкIи нэмыкI Iэмэ-псымэхэр ны-тыхэм зэрагъэгъо­тыгъэх. СурэтшIынымкIэ ыкIи трудымкIэ предметхэм апае пластилинхэр, карандашхэр, клеир, альбомыр ыкIи нэмыкIыбэ ящыкIагъ. Зэхэплъытэжьымэ, гурытымкIэ сомэ мини 10 фэдиз ахэм атекIуадэ. АР-м и ЛIышъхьэ ишIу­хьафтын ишIуагъэ мыщкIэ къэкIощт, ищыкIэгъэ Iэмэ-псымэхэр зыдэлъ Iалъмэкъыр Iоныгъом и 1-м апэрэ классым кIохэрэм къаратыщт.
Щыгъынхэр пштэмэ, кIалэм щы­гъыщт кIэко зэпылъым ыуасэ сомэ мини 5-м къыщегъэжьагъэу 15-м кIэхьэ. Джэнэ Iэшъхьэ кIакохэр сомэ 850-м къыщежьэх, гурытымкIэ 1500-рэ ауас. Iэшъхьэ кIы­хьэхэм ауасэ гурытымкIэ сомэ мини 2-м ехъу. Гъончэдж шъхьарытIупщыхэм гурытымкIэ сомэ мини 2 ауас. Шъом хэшIыкIыгъэ лъэкъопылъхьэ анахь тэ­рэзхэм сомэ мини 5-м къыщегъэжьа­гъэу ауас. Iалъмэкъхэр сомэ мини 5-кIэ нахьыбэмэ къащэфы. Джащ фэдэу гъэмафэм физкультурэ сыхьатхэм ащы­гъынэу футболкэрэ шортрэ нахьыбэмэ агъэнафэрэр, ащ гурытымкIэ сомэ 1500-рэ пэIохьэ. Спорт шъуашэхэм сомэ мини 3 фэдиз ауас.
Бзэджэжъыкъо Анитэ мыгъэ апэрэ классым макIо. Ышыпхъу нахьыжъхэр зыщеджэрэ гурыт еджапIэу N 5-м чIэ­хьагъ. Апэрэ кIэлэегъаджэр Мамый Роз. Зэшыпхъухэр илъэсыкIэ еджэгъум зэ­рэфэхьазырхэр къытаIуагъ.

— Анитэ илъэсым къыкIоцI еджапIэм фэдгъэхьазырыгъ, апэрэ шIэныгъэхэр унэе еджапIэм щигъотыгъэх, еджакIи, тхакIи ашIэ. ЕджапIэм тыфэхьазыр, тищыкIагъэр зэкIэ тщэфыгъахэ. Ти­еджапIэ хэушъхьафыкIыгъэ шъуашэ кIэ­лэцIыкIумэ ащыгъынэу къыделъытэ. Шъуашэр сомэ мини 5-м ехъукIэ къэсщэфыгъ. Ащ кIэпхынрэ ныбалъэрэ къы­делъытэ. Ахэм нэмыкIэу джанэхэр фы­жьэу къэсщэфыгъэх, ауасэ сомэ мини 2-м къыщежьэ, цуакъэр — сомэ мини 3,5-рэ, спорт шъуашэр — сомэ мини 4, кроссовкэм — мини 2, футболкэхэм сомэ мин 1,5-рэ атефагъ. Апэрэ лъэ­хъаным нахь тищыкIэгъэщтхэр ары къэтщэфыгъэхэр. Тхылъхэр къытатыгъэх, ау тетрадьхэр тщэфыгъэх. Ащ нэмыкIэу, къэлэмхэр, тхьэпэ зэмышъогъухэр, линейкэр, нэмыкI цIыкIу-шъо­кIухэр къэтщэфыгъэх, канцеляр пкъыгъохэм сомэ мини 10 фэдиз атефагъ. Iалъмэкъыр анахь дэгъоу къыхэсхыгъ, сомэ мини 5-м ехъукIэ къэсщэфыгъ, — еIо пшъэшъэжъыем янэу Алинэ.
Гъэмафэр къызихьагъэм къыщегъэ­жьагъэу мэкIэ-макIэу илъэсыкIэ еджэгъум зыфагъэхьазырынэу унагъом ригъэжьагъ. Япшъэшъэ нахьыжъэу Самирэ мыгъэ медицинэмкIэ гурыт сэнэхьат зэригъэгъотынэу чIэхьагъ, Изабеллэ я 3-рэ классым ехьэ. Сабыибэ зэрыс унагъохэм къаратырэ IэпыIэгъум ишIуа­гъэ къызэрекIыгъэр тигущыIэгъу къы­хигъэщыгъ. Республикэм и ЛIышъхьэ ишIухьафтыни Анитэ зэрифэшъуашэу ыгъэфедэщт.
Хабзэ зэрэхъугъэу, КъумпIыл Мурат игукъэкIыкIэ шIэныгъэм и Мафэ апэрэ классым кIощт кIэлэцIыкIухэм шIухьафтынхэр аратыщтых. КIэлэцIыкIу мини 6 фэдиз мыгъэ агъэгушIощт. Канцеляр пкъыгъохэу ящыкIэгъэщтхэр зыдэлъ Iэлъмэкъхэр еджапIэхэм атырагощэ­щтых. Джащ фэдэу шIухьафтын 775-рэ Херсон хэкум арагъэщагъ.
Адыгеим и ЛIышъхьэ къызэрэхи­гъэщыгъэмкIэ, еджапIэм апэрэу нэIуасэ фэхъурэ кIэлэцIыкIухэм гушIуагъо къызэрафихьыщтым имызакъоу, илъэс еджэгъум ахэр фэгъэхьазы­рыгъэнхэмкIи а Iофтхьабзэр унагъохэм IэпыIэгъушIу афэхъущт.
Делэкъо Анет.