Адыгэ къуаем изичэзыу я XIV-рэ фестиваль Iоныгъом и 13-м ыкIи и 14-м Дахъо гъэхъунэм щыкIощт.

Лъэпкъым ишхыныгъо шъхьаIэ фэгъэхьыгъэ Iофтхьэбзэ иным хэлэжьэнхэм республикэм ирайонхэм игъэкIотыгъэу зыфагъэ­хьазыры.
Адыгэ къое анахь IэшIур изы­хыщтымкIэ, ащ хэшIыкIыгъэ гъо­мылэпхъэ зэфэшъхьафхэмкIэ фестивалым бысымгощэ пэ­рыт­хэр щызэнэкъокъущтых. Район пэпчъ къыщыдагъэкIырэм, пхъэшъхьэ-мышъхьэу, хэтэрыкIэу щалэжьыхэрэм, лъэпкъ Iэпэщы­сэхэм якъэгъэлъэгъонхэр зы­хэ­тыщт зэIухыгъэ щагухэр фес­тивалым щагъэпсыщтых, гъэ­хъэгъэшIоу яIэхэм ящысэхэр, IэпэIасэхэм ямастер-классхэр хьакIэхэм къафагъэлъэгъощтых.
2024-рэ илъэсым респуб­ли­кэм къуаеу ыкIи ащ хэшIыкIыгъэ гъомылапхъэу къыщыдагъэкIырэр тонн мин 31,6-рэ хъугъэ. 2025-рэ илъэсым имэзих рес­пуб­ликэм къуаеу ыкIи ащ хэшIы­кIыгъэ гъомылапхъэу тонн мин 16 къыщагъэхьазырыгъ. Гъэщыр къыдэзыгъэкIыжьырэ хъыз­мэтшIэпIэ 30-мэ адыгэ къуаер республикэм къыщашIы, ахэм унэе хъызмэтшIапIэхэри ахэтых.
— Гъэщым хэшIыкIыгъэ гъомылапхъэхэр къыдэзыгъэкIырэ предприятиехэм тапэкIи Iэпы­Iэгъу ядгъэгъотыщт, ащкIэ амалыкIэхэр къызфэдгъэфедэщтых. Адыгэ къуаем ифестиваль ахэм ащыщ. ЦIыфхэр мыщ къызкIа­кIохэрэр лъэпкъ шхыныгъохэм ахэIэнхэу, ябизнес зырагъэу­шъомбгъунэу ары, — хегъэунэфыкIы Адыгеим и ЛIышъхьэу КъумпIыл Мурат.
Хабзэ хъугъэу, фестивалым зекIохэр бэу Адыгеим къырещалIэх, искусствэм, культурэм яIэпэIасэхэм мэфэкI концертхэр мэфитIуми ащ къыщатых. Зичэзыу фестивалыр игъэкIотыгъэу, дахэу рекIокIыным зэ­хэщакIохэр дэлажьэх.