Урысыем имэшIоку гъогухэр кIэщакIо зыфэхъугъэ проектэу «Своих не бросаем» зыфиIорэм къыдыхэлъытагъэу хэушъхьафыкIыгъэ дзэ операцием хэлажьэхэрэм яIахьыл-гупсэхэм, нэбгырэ 2115-рэ хъухэу, зекIо кIонхэ амал яIагъ. Ахэм ащыщэу нэбгырэ 25-р Адыгеим щыщых.

Къэралыгъо фондэу «Хэгъэгум иухъумакIохэм» икъутамэу Адыгеим щыIэм ипащэ игуадзэу Джарымэ Еленэ къызэриIуа­гъэмкIэ, мы илъэсым фондымрэ Урысыем имэшIоку гъогухэмрэ зэгъусэхэу программэу «Своих не бросаем» зыфиIорэм хэлажьэх.
— Къэралыгъо фондэу «Хэгъэгум иухъумакIохэр», пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Урысые мэшIоку гъогухэр» ыкIи хэушъхьафыкIыгъэ дзэ операцием иветеранхэм я Ассоциацие зэгъусэхэу 2022-рэ илъэсым къыщыублагъэу мы проектыр пхыращы. Тиреспуб­ликэ апэрэу а программэм хэ­хьагъ. Ащ ишIуагъэкIэ хэу­шъхьафыкIыгъэ дзэ операцием хэлажьэхэрэм яIахьыл нэбгырэ 25-рэ Урысыем иижъырэ къа­лэхэм, джащ фэдэу Карелием ыкIи Санкт-Петербург ащыIа­гъэх, ахэм нэIуасэ зафашIыгъ. КIуагъэхэм ахэтыгъэх дзэ операцием щыхэкIодэгъэ дзэ­кIолI­хэм яIахьылхэр. Яунагъохэр ягъусэу ветеранхэу зекIо дгъа­кIохэрэр фондым Iофтхьабзэу щерекIокIыхэрэм чанэу къахэлажьэхэрэр ары, — къыIуагъ Джарымэ Еленэ.

«Своих не бросаем» зыфиIорэ проектым хахьэу зекIо кIуагъэхэм ахэтыгъ Виолетта Чуваковар. Ащ икIалэ хэу­шъхьафыкIыгъэ дзэ операцием щыхэкIодагъ. ИлъэситIукIэ узэ­кIэIэбэжьмэ, ишъхьэгъусэ игъу­сэу Урал къикIыхи, псэупIэкIэ Адыгеим къэкIуагъэх. Ащ къызэриIуагъэмкIэ, фэгъэкIотэныгъэу яIэхэр зыфэдэхэр зэ­ри­гъэшIэнэу фондым зэкIом, про­ектым хэлэжьэн зэрилъэкIыщтыр къыраIуагъ ыкIи бэрэ емыгупшысэу ар къызфигъэ­федагъ.
— Тэщ фэдэу, хэушъхьафыкIыгъэ дзэ операцием хэлэ­жьэрэ дзэкIолIхэм, хэкIодагъэ­хэм яIахьыл-гупсэхэу тикъэралыгъо щыпсэухэрэр бэ тыхъоу зекIо тыщыIагъ. ЗэхэщакIохэм агу зэIухыгъэу, дахэу къытпэгъокIыгъэх. ЗекIо щыIагъэхэм нэIуасэ тызэфэхъугъ, гупшысэхэмкIэ тызэдэгощагъ. Бэ гъэшIэгъонэу къытагъэлъэгъугъэр, тафэраз, — къыIуагъ В. Чува­ковам.
Мы шIушIэ программэм игъэ­цэкIэн лъагъэкIотэщт. Iоныгъом нэмыкI купхэр джыри зекIо ежьэщтых.

КIАРЭ Фатим.