Адыгэ джэгу дахэ Мыекъуапэ икъэлэ парк щыкIуагъ. Адыгеим истудентхэм я Ассоциацие ыкIи лъэпкъ къашъохэмкIэ еджапIэу «Хъудымыдыр» пчыхьэзэхахьэм кIэщакIо фэхъугъэх. Къэбэртэе-Бэлъкъар Республикэм къикIыгъэ джэгокIо купэу «Дышъэр» зэхахьэм хэлэжьагъ.

Джэгур мэхьанэшхо зиIэ хъугъэ-шIагъэм къешIэкIыгъэ гушIогъо-чэфыгъоу, адыгэ лъэпкъым ихэбзэ хэхыгъэу зэрэщытыр ныбжьыкIэхэм ягъэшIэгъэныр зэхэщакIохэм ямурадыгъ. Ащ екIолIакIэу иIэри адыгэ шэн-хабзэм тетэу зэрэбгъэ­цэкIэн фаери а пчыхьэм къэзэрэугъоигъэхэм арагъэлъэгъугъ.
Джэгур зыфэгъэхьыгъэм елъытыгъэу «Удж хъурэе» дахэкIэ къызэIуахыгъ. Адыгэ джэгум ихабзэхэм адиштэу пшъэ­шъэ ыкIи кIэлэ къэшъуакIохэм ячIыпIэхэр аубытыгъэх. Лъэпкъ къэшъуабэ джэгум къыщашIыгъ. Сыдэущтэу ныбжьыкIэхэр пчэгум къытехьэхэра, текIыжьыхэра, кIалэм пшъашъэр сыдэущтэу къытырищэра, къашъор сыд фэдэу къашIыгъа — мыхэмкIэ ыкIи нэмыкIыбэхэмкIэ къэ­шъуакIохэм яIэпэIэсэныгъэ осэшI купыр лъыплъагъ. Ащ фэдизым уахэдэныр къиныгъэми, сыхьатитIу къэшъоным ыуж зэфэхьысыжьхэр шъхьэихыгъэ къашIыгъэх, кIэлэ ыкIи пшъэшъэ къэшъуакIохэр къыхахыгъэх, пшъэшъэ ГъэшIуагъэр агъэнэфагъ.
— Джэгу пчыхьэзэхахьэр хъугъэ-шIэгъэ зэфэшъхьафхэм япхыгъэн ылъэкIыщт. Мыщ фэдэ зэхахьэм ныбжьыкIэхэмкIэ мэхьанэшхо иI. Ащ иамалкIэ нэIуасэ зэфэхъух, ныбджэгъуныгъэр азыфагу къехьэ, адыгэ шъуашэр, къашъор, лъэпкъ мэкъамэхэр нахь агъэлъапIэхэ мэхъу. Къэбэртэе-Бэлъкъар Республикэм къи­кIыгъэ джэгокIо купэу «Дышъэм» тинепэрэ зэхахьэ къыгъэдэхагъ, — къы­Iуагъ Къэралыгъо академическэ ансамблэу «Налмэсым» икъэшъокIо шъхьаIэу, АР-м изаслуженнэ ыкIи инароднэ артистэу, «Хъудымыдым» изэхэщакIоу Къулэ Алый.
КъБР-м къикIыгъэ хьатыекIо-джэгуакIоу Бетэкъо Инал зэхахьэр дахэу зэрищагъ. ХьатыякIор джэгум ыгупч, сэмэркъэу дахэ хэлъэу цIыфхэр зэрещэх. Ащ хъярыр зэрэригъэкIокIыщтым мэхьанэшхо иI.
— Адыгеим тыкъызэрэрагъэблэгъа­гъэр лъэшэу тигуапэ. Лъэпкъ искусствэм идэхагъэ цIыфхэм зэхашIэным тиджэгокIо куп фэлажьэ, ижъырэ лъэпкъ хэбзэ дахэм зетэгъэужьыжьы. ЫпаIокIэ Рыфабгъо щызэхащэгъэ этнокультурнэ лагерэу «Адыгэ хабз» зыфиIорэм тыщыIагъ. Адыгеим ис ныбжьыкIэхэр шIыкIашIохэу, щысэтехыпIэу зэрэщытхэр зэхэтшIагъ, – къыIуагъ купым ипащэу Бетэкъо Зауркъан.
ЦIыфыр илъэпкъ фэшъыпкъэу, ишэн-хабзэ зэрихьэу, къызщыхъугъэ чIыналъэм ибаиныгъэ гум щигъашIо зыхъукIэ, а дэ­хэгъэ пстэури зэригъэбэгъощтым пылъыщт.

НэкIубгъор зыгъэхьазырыгъэр
Лъэпшъыкъо Фатим.