КIэлэцIыкIумкIэ анахь мэхьанэ зиIэр нахьыжъхэм ягущыIэ ытхьакIумэ ихьаныр, ар ыгъэфедэшъуныр ары.

Ар ныбжь зиIэхэм дэгъоу къагурэIо.ЦIыф лъэпкъы­бэ зыщызэдэпсэурэ Адыгэ Республикэм бэмышIэу кIэлэцIыкIухэм апае тхылъ цIыкIу зэгъэзэфэгъэ кIэракIэ къыщыдэкIыгъ. Ар зытхыгъэр щыIэныгъэр дэгъоу зышIэрэ Виктор Марковыр ары. Адыгеим щэпсэу, щэлажьэ.
«Адыгэ хабзэ для мальчиков» — джары тхылъым ар зэреджагъэр, джыри еджапIэм мыкIорэ сабыйхэм ыкIи ублэпIэ классхэм ащеджэхэрэм атегъэ­псыхьагъ. Авторыр игуапэу ахэм адыгэ лъэпкъым мытхыгъэ иунашъохэу «Адыгэ хабзэр» зыфэдэмкIэ адэгуащэ. Тхылъ цIыкIур сурэтхэмкIэ кIэракI, ахэр зышIыгъэр Алена Спиваковар ары.
Ижъ-ижъыжьым къыщежьэу нартхэм тагъэшIэгъэ адыгэ хэбзэ-унашъо лъэпкъым зэриIэр, мы «хабзэм» тытетэу тыщыIэн зэрэфаер, шъыпкъэр анахь уасэ зиIэшъ, ухъумэгъэныр ащ кIэзыгъэн­чъэу къыщыIуагъ.
Усэ сатыриплI пэпчъ сабый цIыкIухэр Iуш дэдэхэу цIыф дэгъу зэрэхъущтхэм тегъэпсыхьагъ: сатыриплI пэпчъ зы ушъый-гъэсэпэтхыдэ хэлъ.
УицIыкIугъом къыщегъэжьагъэу уизекIокIэ-шIыкIэхэм уафэсакъэу уесэныр, пцIы умыусыныр, уигущыIэ пытэныр, ужэ уфэсакъэу уесэныр, нахьыжъхэр плъы­тэнхэр, шъхьэкIафэ афэпшIыныр; ятэрэ ыкъорэ хъулъ­фыгъэхэшъ, лIыгъэ ыкIи цIыфыгъэ лъагэ яIэн зэрэфаер; ным илъэпIагъэ пщэнэуи, пщэфынэуи зэрэщымытыр; ны-тыхэм уашъхьасыныр ыкIи уафэгумэкIыныр; бзылъфыгъэм зэрэфыщытхэр, пшъэшъэжъыехэм уяшъэ­бэкIыныр, шъугъоныр зэрэшэн дэир, шIу пшIэным къыкIэкIырэр — мы зэкIэ цIыфыр зыгъэлъэшырэ лъэныкъуабэу, шэн-зэхэтыкIэ ыкIи гъэпсыкIэ хабзэхэу зэрэщытхэр тхылъэу «Адыгэ хабзэ для мальчиков» зыфиIорэм къыщыIуагъ. КIэлэпIухэм, егъэджакIохэм ыкIи ны-тыхэм агъэфедэн алъэкIыщт.
Мамырыкъо
Нуриет.