Адыгэ Республикэм хэгъэгу кIоцI Iоф­хэмкIэ и Министерствэ иследственнэ Гъэ­IорышIапIэ илъэс 45-рэ зыныбжь бзылъфыгъэу ыпэкIэ уголовнэ пшъэдэкIыжь зыхьыгъэу Краснодарскэ краим щыпсэурэм ылъэныкъокIэ къызэIуихыгъэгъэ уголовнэ Iофэу Урысые Федерацием и Уголовнэ Кодекс ия 159-рэ статья иа 1-рэ, я 2-рэ ыкIи я 3-рэ Iахьхэм къыдалъытэрэм изэхэфын ыухыгъ.

Следствием зэригъэунэфыгъэмкIэ, 2024 — 2025-рэ илъэсхэм бзылъфыгъэм ышъхьэкIэ федэ ин къызэрэфэкIощтым пае Интернетым иамалхэр къызфигъэфедэхэзэ цIыф купхэр мессенджерхэм ащызэхищагъэх ыкIи ахэм нэужым афитхыгъ осэ макIэ яIэу унэгъо IапIэхэр, мебелыр, техникэр ыкIи нэмыкI товархэр ыщэхэу. Мы къэбарым зынаIэ тезыдзэгъагъэхэм ащыщыгъэх тиреспубликэ ыкIи къытпэгъунэгъу шъолъырхэм ащыпсэухэрэр.
ЗэрагъэунэфыгъэмкIэ, Интернетым зигугъу къыщишIыгъэ товархэр агъэмысэрэм иIагъэхэп ыкIи ахэр ыщэнхэуи зигъэхьазырыщтыгъэп. ГъэпцIагъэкIэ зыдэзекIорэ цIыфым имылъку къызэрэIэкIихыщтым бзылъфыгъэм игухэлъхэр епхыгъагъэх. Зэрар зэрихыхэрэм ащэфымэ ашIоигъоу къыхахыгъэ товарыр аритынэуи зигъэхьазырыщтыгъэп. АмышIэхэрэм егъэлыекIыгъэу цыхьэ афэзышIыхэрэм яахъщэ ащ къызIэкIигъахьэщтыгъ ыкIи ежь зэрэшIоигъоу ыгъэфедэщтыгъ.
ГъэпцIагъэ зыхэлъ бзэджэшIагъэр къыхэзыгъэщыгъэхэр къалэу Мыекъуапэ иполицие иуголовнэ розыск иIофышIэхэмрэ АР-м хэгъэгу кIоцI IофхэмкIэ и Министерствэ икъулыкъушIэхэмрэ. Агъэунэфыгъэ мыхъо-мы­шIэхэм япчъагъэ 63-рэм нэсыгъ.
Бзылъфыгъэм ыгъэпцIагъэу тхьаусыхэ тхылъ къэзытхыгъэхэм зэкIэмкIи зэрарэу арихы­гъэр следствием къызелъытэжьым, ар сомэ миллиони 2-рэ мин 400-рэ икъугъэу ыгъэунэ­фыгъ.
Джырэ лъэхъан прокуратурэм уголовнэ Iофыр зэхифынэу хьыкумым фигъэхьыгъ. Мыщ фэдэ бзэджэшIагъэхэр зезыхьэхэрэм илъэси 6-м нэсэу хьапс атыралъхьан алъэ­кIыщт.