УФ-м и Президент кIэщакIо фэхъугъэу социальнэ газификацием фэгъэхьыгъэ программэр 2021-рэ илъэсым къыщегъэжьагъэу шъолъырхэм ащапхыращы. Гъэстыныпхъэ шхъуантIэр зимыIэхэм ящагу гъунапкъэхэм ыпкIэ хэмылъэу афещэлIэгъэным ар фытегъэпсыхьагъ.

2024-рэ илъэсым имэлылъфэгъу мазэ къэралы­гъом ипащэ пшъэрылъ къышIыгъэу чъыгхэтэ товариществэхэри мы программэм хагъэхьагъэх. Адыгеир пштэмэ, пстэумкIи ащ фэдэ псэупIэ 43-рэ ит, программэм хэлажьэрэр 37-р ары. Ахэм ащыщэу товариществэ 20-р къалэу Мыекъуапэ, 4-р — Теуцожь, 13-р Тэхъутэмыкъое районхэм ахэхьэх.
Мыхэм ащыпсэухэу, программэм амалэу къытырэр зыгъэфедэмэ зышIоигъохэм «Росреестрэм» АР-мкIэ и ГъэIорышIапIэ испециалистхэр упчIэжьэгъу афэхъу­хэу бэрэ къыхэкIы, тхылъхэм ягъэхьазырынкIэ адеIэхэуи мэхъу. Арышъ, цIыфхэр анахьэу зыгъэгумэкIыхэрэм такъыпкъырыкIызэ, социальнэ газификацием фэгъэхьыгъэ программэм шапхъэу къыщы­дэлъытагъэхэр джыри зэ шъугу къэдгъэкIыжьы тшIоигъу:
— псэупIэ гъунапкъэм пэблагъэу щыт чъыг­хэтэ товариществэр ары ащ хэлэжьэн зылъэкIыщтыр;
— псэупIэм гъэстыныпхъэ шхъуантIэр щызэбгырыщыгъэу, ащ къыхащынышъ, товариществэм ращэлIэным тегъэпсыхьа­гъэу щытын фае;
— унэр е чIыгу Iахьыр зиунаем амыгъэкощырэ мылъкум икъэралыгъо ЗыкI реестрэ ар щаригъэтхыгъэныр шIокI зимыIэ Iофэу щыт;
— чъыгхэтэ товариществэм унэу хахьэхэрэм газыр зэраращэлIэщтыр зэIукIэм щызэдаштэнышъ, ар тхылъкIэ къаушыхьатыжьын фае.