Адыгеим и ЛIышъхьэу КъумпIыл Мурат IофшIэгъу дэкIы­гъо Адыгэкъалэрэ Красно­гвар­дейскэ районымрэ защы­реIэм, социальнэ мэхьанэ зиIэ псэолъэ заулэмэ яшIынрэ ягъэ­цэкIэжьынрэ зэрэкIорэр ыуплъэкIугъ. АР-м иминистрэхэм я Кабинет и Тхьаматэу КIэрэщэ Анзаури псэолъэшIыпIэхэм ащыIагъ.

ЗэкIэми апэу зэкIолIагъэхэр еджапIэм джыри мыкIорэ кIэлэцIыкIухэр зыща­Iыгъхэрэ муниципальнэ учреждениеу «Жъогъобын» зыфиIоу Адыгэкъалэ дэтыр ары. Нафэу зэрэщытымкIэ, мыщ игъэкIотыгъэ гъэцэкIэжьынхэр щэкIох. Къалэм имэрэу Хьачмамыкъо Азэмат къыIотагъ IофшIэнхэр мыщ зэрэщыкIохэрэм фэгъэхьыгъэу. Ащ къызэрэхигъэщыгъэмкIэ, социальнэ мэхьанэшхо зиIэ мы псэуалъэр бэшIагъэ агъэкIэжьын фаеу зыщытыгъэр. Лъэпкъ проектэу «Унагъор» зыфиIорэм къыдыхэлъыта­гъэу IофшIэнхэм апэIухьанэу сомэ миллион 54-м ехъу къафыхагъэкIыгъ. НепэкIэ апэрэ ыкIи ятIонэрэ къатхэм яджэхашъохэр агъэчъыгъэх, шъхьаныгъупчъакIэхэр халъхьагъэх, электричест­вэ рыкIуапIэхэр зэкIэ зэблахъугъэх, инженер коммуникациякIэхэр ашIых, унэ кIоцIхэр агъэкIэжьых, пщэрыхьапIэр, гыкIапIэр нахь зэтырагъэпсыхьэх.

Республикэм ипащэ шъхьафэу зигугъу къышIыгъэхэм ащыщ кIэлэцIыкIу IыгъыпIэм ищыкIэгъэщт Iэмэ-псымакIэхэр IэкIэгъэхьэгъэнхэр. Ащ нэмыкIэу Адыге­им и ЛIышъхьэ пшъэрылъ афишIыгъ игъэкIотыгъэ гъэцэкIэжьынхэм адакIоу унэм къыпэIулъ чIыпIэри нахь зэтырагъэпсыхьанэу, ащкIэ материал дэгъухэр агъэфедэнхэу, зэзэгъыныгъэу зэда­шIыгъэхэм япIалъэхэр дэх имыIэу агъэ­цэкIэнхэу.
ПшъэдэкIыжьэу ыхьырэмкIэ гъунэпкъэ гъэнэфагъэ зиIэ подряднэ организациеу «Артель» зыфиIорэми ыпашъхьэ а пшъэрылъ дэдэхэр итых. Мыр зыдэлажьэрэр район сымэджэщэу К. М. Бат­мэным ыцIэкIэ щытым иIэзапIэу тIоу зэтетыр игъэкIотыгъэу гъэцэкIэжьыгъэныр ары. Мыщ инженер коммуника­циехэу жъы хъугъэхэр, электричествэ рыкIуапIэхэр зэкIэ щызэблахъущтых. Кабинетхэр агъэцэкIэжьыщтых, пчъэ ыкIи шъхьаныгъупчъэ блыпкъхэр зэ­бла­хъущтых. ЗэкIэ IофшIэнхэр илъэсым ыкIэм ехъулIэу аухынхэ фае. АР-м псау­ныгъэм икъэухъумэнкIэ иучреждениехэм ягъэцэкIэжьын ипрограммэ сомэ миллион 22-м ехъу пэIуагъэхьащт.

Адыгеим и ЛIышъхьэ псэуалъэр къы­плъыхьэ зэхъум, гъэцэкIэжьынхэм ялъэ­хъан къыдэлъытэгъэн фаехэм анаIэ тыраригъэдзагъ. Мэрием ыкIи подрядчикхэм ащ игъо афилъэгъугъ лъэпкъ проектхэмрэ шъолъыр программэхэмрэ къадыхэлъытагъэу медицинэ организациехэм ягъэцэкIэжьынкIэ IофшIэкIэшIоу щыIэ хъугъэр къызфагъэфедэнэу.

АщкIэ щысэу къэбгъэлъэгъон плъэ­кIыщт Красногвардейскэ районым ит селоу Садовэм врач амбулаториеу щашIыгъэр. Адыгеим и ЛIышъхьэ IофшIэгъу дэкIыгъом илъэхъан къыкIэлъыкIорэ псэуалъэу зыдэщыIагъэр ары. А амбулаторием ишIын 2024-рэ илъэсым аублэгъагъ. Шъолъыр программэм къыдыхэлъытагъэу сомэ миллион 36-рэ къыфыха­гъэ­кIыгъ. Красногвардейскэ районым ипащэу Гъубжьэкъо Темур къызэриIуа­гъэмкIэ, мы лъэхъаным псэолъэшI-монтаж IофшIэнхэр зэкIэ аухыгъэх. Охътэ благъэхэм къызэIуахыным амбулаториер фэхьазыр хъущт. КъумпIыл Мурат псэуалъэм зыщэIэм, медицинэ IэпыIэгъу ятыгъэным фытегъэпсыхьэгъэ ка­бинетхэр зэригъэлъэгъугъэх, джырэ уахътэм диштэрэ Iэмэ-псымэхэмкIэ амбулаториер зэтырагъэпсыхьанэу пшъэ­рылъ зэрафишIыгъагъэм икIэуххэми защигъэгъозагъ.

«Псауныгъэм икъэухъумэн къыхиубытэрэ учреждениехэр зэрагъэкIэжьхэрэм ишIуагъэкIэ цIыфэу къяуалI­эхэ­рэм­рэ медицинэм иIофышIэхэмрэ джырэ уахътэм диштэрэ Iэрыфэгъу амал­хэр яIэ мэхъух. Республикэм псау­ныгъэм икъэухъумэнкIэ и Министерствэ пшъэрылъэу ыпашъхьэ итыр зыфэгъэ­хьыгъэр цIыфхэм медицинэ IэпыIэгъоу аратырэр нахьышIоу зэхэщэгъэныр ыкIи къяолIэрэ пстэуми зэрифэ­шъуашэу яшIуагъэ арагъэкIыныр ары. Медицинэ инфраструктурэу агъэкIэжьыгъэм диштэу, къоджэдэсхэми алъыIэсхэзэ яIофшIэн нахь агъэчанын фае. НэмыкI проектхэм япхырыщынкIэ Iоф­шIэкIэшIоу аIэкIэлъ хъугъэр къыда­лъы­тэзэ, Урысыем и Пре­зидент цIыфхэм медицинэ IэпыIэгъу икъу ятыгъэнымкIэ пшъэрылъэу къы­гъэуцугъэхэм къапкъырыкIынхэ фае», — къыхигъэщыгъ КъумпIыл Мурат.

Адыгеим и ЛIышъхьэ къызэрэхигъэщыгъэмкIэ, медицинэм къызэлъиубытырэ лъэныкъохэр гъэкIэжьыгъэнхэмкIэ, псэолъакIэхэр шIыгъэнхэмкIэ лъэпкъ проектэу «ГъэшIэ кIыхьэр ыкIи чаныр» зыфиIорэм къыдыхэлъытагъэу пшъэ­рылъыкIэхэр зэшIуахых.
Шъугу къэдгъэкIыжьын: къэралыгъо программэхэмрэ лъэпкъ проектхэмрэ зэрагъэцакIэхэрэм ишIуагъэкIэ мы аужырэ илъэси 8-м Адыгеим сымэджэщыкIэу 4, поликлиники 5, фельдшер-мамыку IэзэпIэ 33-рэ, врач амбулато­рии 3 къыщызэIуахыгъ. Мы илъэсым ыкIэм ехъулIэу Мыекъуапэ, Адыгэкъалэ, Джэ­джэ, Кощхьэблэ ыкIи Тэхъутэмыкъое районхэм медицинэ учреждении 5 ащагъэцэкIэжьыщт.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.