ШахматхэмкIэ Адыгэ Республикэм изэнэкъокъу макIо, ащ бзылъфыгъэхэр ары зыщызыушэтыхэрэр. ТекIоныгъэм спорт­сменкэ 14 фэбанэ, ахэм гурытымкIэ илъэс 15 аныбжь.

Мыекъуапэ игупчэ парк щыIэ республикэ шахматнэ клубым Iофтхьабзэр щэкIо. Тури 7-м язэфэхьысыжьхэмкIэ анахь лъэшыр къэнэфэщт. Джырэ уахътэм тури 4 къызэранэкIыгъ. Пэрытныгъэр зыIыгъыр Адыгеим икъэлэ шъхьаIэ къэзыгъэлъэгъорэ Анна Марчук. Мы спортсменкэм зэIукIэгъоу иIагъэхэм зэкIэми текIоныгъэр къащыдихыгъ. Ятфэнэрэ турым ар IукIэщт ятIонэрэ чIыпIэр зыIыгъ Амалия Григорян. Ящэнэрэ чIыпIэр зэдагощы Сэхъутэ Салимэрэ Эллионора Суховамрэ, мыхэм очко щырыщ рагъэкъугъ. Мы нэбгыритIури непэ зэIукIэщтых. Шы­шъхьэIум и 28-м зэнэкъокъур аухыщт.