ГандболымкIэ Урысыем и Суперлигэ щешIэрэ командэхэм ащыщхэр къэблэгъэрэ чемпионатым изыфэгъэхьа­зырын къыдыхэлъытагъэу Ростов хэкум и Губернатор и Кубок икъыдэхын фэгъэхьыгъэ турнирым хэлэжьагъэх.

«Ростов-Доныр», «Черноморочкэр» «Астраханочкэр», «Звездар», «АГУ-Адыифыр», «Ростов-Дон-2-р» зэнэкъокъугъэх.
Адыгеим икомандэ зэхъокIыныгъэхэр фэхъугъэх нахь мышIэми, тигандболисткэхэм ешIэкIэ дэгъу къагъэлъэгъуагъ. Къэралыгъом гъогогъу пчъагъэрэ ичемпионэу «Ростов-Доныр» тикомандэ нахь лъэшыгъ, 27:37-у зэIукIэгъур аухыгъ. Джащ фэдэу «Астраханочкэр» — 35:36-у, «Звездар» — 28:31-у, «Ростов-Дон-2-р» — 30:34-у, «Черноморочкэр» — 32:37-у «АГУ-Адыифым» къыте­кIуагъэх. Республикэм илIыкIохэм аужырэ чIыпIэр аубытыгъ. «Черноморочкэм» текIоныгъэр къыди­хыгъ (очкоуи 9), «Ростов-Доныр» ятIонэр (очкоуи 8), «Астраханочкэм» очкоуи 6 ригъэкъугъ ыкIи ящэнэрэ хъугъэ. Ахэм къа­кIэлъэ­кIох «Звездар» (очкоуи 4), «Рос­тов-Дон-2» зыфиIорэр (очкоуи 3) ыкIи «АГУ-Адыифыр» (очко къы­хьыгъэп).

Зэнэкъокъум изэфэшIыжьын къыдыхэлъытагъэу ешIэкIо анахь дэгъухэр зэхэщакIохэм къыхагъэ­щыгъэх. Ахэм ащыщ анахьыбэу къэлапчъэм Iэгуаор дэзыдзэгъэ «АГУ-Адыифым» игандболисткэу Кобл Зуретэ. Анахь лъэшхэм ащыщых: Виктория Климанцевар («Астраханочкэр»), Дарья Стаценкэр («Ростов-Доныр»), Дарья Рогожинар («Ростов-Дон-2-р»), Ксения Закордонскаяр («Звездар»), Екатерина Зеленковар («Ростов-Доныр»), Анастасия Шкитинар («Черноморочкэр»). Турнирым иешIэкIо анахь дэгъоу алъытагъэр «Черноморочкэм» хэт Екатерина Долматовар ары.