Урысыем и Общественнэ палатэ исекретарь игуадзэу, Урысыем июристхэм я Ассоциацие и Президиум хэтэу, Урысыем и Очылхэм я Федеральнэ палатэ ивице-президентэу Владислав Гриб АР-м иочылхэм ялIыкIохэм ыкIи Урысые общественнэ организациеу «Урысыем июристхэм я Ассоциацие» зыфиIорэм и Адыгэ шъолъыр къутамэ хэтхэм зэIукIэгъу адыриIагъ. ХьыкумышI сэнэхьатым ыкIи унэе практикэм фэгъэзагъэхэм яIофыгъохэм ахэр атегущыIагъэх.

Iофтхьабзэм хэлэжьагъэх УФ-м юстициемкIэ и Министерствэ и ГъэIорышIапIэу АР-м щыIэм ипэщэ IэнатIэ зыгъэцакIэрэ Уджыхъу Азэмат, Урысые общественнэ организациеу «Урысыем июристхэм я Ассоциацие» зыфиIорэм и Адыгэ шъолъыр къутамэ итхьаматэу ЛIыхьэтыкъо Аскэр, Очылхэм япалатэ иобщественнэ-упчIэжьэгъу совет итхьаматэу Сихъу Аскэрбый, Очылхэм япалатэ ивице-президентхэу Аулъэ Светланэ, Бгъуашэ Бэллэ, Геннадий Юн, нэмыкIхэри.
Зэхэсыгъор къызэIуихызэ ЛIыхьэтыкъо Аскэр къызэриIуагъэмкIэ, лъэныкъоу хьыкумышI сэнэхьатым ыкIи унэе практикэм фэгъэзагъэхэм яIофыгъохэр зыфэгъэхьыгъэр федеральнэ унашъоу аштагъэм къыздихьыгъэ зэхъокIыныгъэ­хэр ары. Мыщ епхыгъэ хэбзэгъэуцугъэр Урысыем юстициемкIэ и Министерствэ ыгъэхьазырыгъ, мы мэфэ благъэхэм ар Правительствэм Къэралыгъо Думэм рихьылIэщт.

ЗэдэгущыIэгъур рамыгъажьэзэ зиIоф­шIэнкIэ къахэщыгъэхэм тын лъапIэхэр аратыжьыгъэх. Урысыем и Общественнэ палатэ ирэзэныгъэ тхылъхэр афагъэ­шъошагъэх очылхэу Анна Казаковам ыкIи Минхан Любофеевам. Джащ фэдэу Владислав Гриб очылхэм тын лъапIэхэр аритыжьыгъэх. Орденэу «За верность адвокатскому долгу» зыфиIорэр Марина Булжатовам, «За заслуги в защите прав и свобод граждан» зыфиIоу а 1-рэ шъуа­шэ зиIэр Ахъмэт Эдуард ыкIи Вита­лий Побегуц, я 2-рэ шъуашэ зиIэ медалыр Хьатит Юрэ афагъэшъошагъэх.
Ащ нэмыкIэу Адыгеим и Очылхэм япалатэ итхьаматэу, Урысые общественнэ организациеу «Урысыем июристхэм я Ассоциацие» и Адыгэ шъо­лъыр къутамэ игъэцэкIэкIо комитет итхьаматэу Мамый Алый цIыфхэм яфитыныгъэхэр къэ­ухъу­мэгъэнхэм ыкIи граждан обществэм хэхъоныгъэхэр егъэ­шIыгъэнхэм иIахьышIу зэрахишIыхьагъэм фэшI рэзэныгъэ тхылъ В. Гриб къыфигъэшъо­шагъ.
Нэужым ЛIыхьэтыкъо Аскэр Адыгеим къэкIогъэ Владислав Гриб нэпэеплъ шIухьафтынхэр ритыжьыгъэх.

ЫпшъэкIэ зигугъу къэтшIыгъэ хэбзэгъэуцугъэм епхыгъэу «УФ-м ихэбзэгъэуцугъэ актхэм ащыщхэм зэхъокIыныгъэхэр афэшIыгъэнхэр» зыфиIоу адвокатурэм, хьыкум ыкIи юридическэ сообществэхэм хэхъоныгъэхэр ягъэшIыгъэнхэм фэгъэхьыгъэ зэхэсы­гъом В. Гриб хэлэжьагъ.
Урысыем и Очылхэм я Федеральнэ палатэ ивице-президентэу Владислав Гриб къызэриIуагъэмкIэ, хэбзэгъэуцу­гъэм ипроект зыкIаштагъэр цIыфхэм шIуагъэ къафихьынэу ары. Джыдэдэм апшъэрэ юридическэ гъэсэныгъэ ыкIи практикэ зиIэхэм хьыкум зэхэфынхэм ахэлэжьэнхэ алъэкIыщт. Мыщ дэжьым къэIогъэн фае, цIыфхэм ащыщыбэхэм зэхадзырэп юристхэм ыкIи очылхэм яIофшIэн зэфэмыдэныгъэу хэлъыр. ГущыIэм пае, шъолъырхэм яочыл палатэхэм бэрэ даохэр къаIэкIахьэх юристхэм (ахэр очылхэу щымытхэу) икъоу фэIо-фашIэхэр афамыгъэцэкIагъэ­хэу.
Очылэу зыкъэзыгъэлъэгъорэ хьыкум зэхахьэхэм ялIыкIохэм юридическэ IэпыIэгъоу цIыфхэм арагъэкIырэм идэгъугъэ хагъэхъощт. Федеральнэ хэбзэгъэуцугъэм ыкIи очылхэм яэтикэ и Кодекс къыгъэнэфэрэ шапхъэхэр къыз­фагъэфедэзэ очылхэм яIоф­шIэн агъэцэкIэщт. ЗыгорэкIэ очылхэм а шапхъэхэр заукъохэкIэ, дисциплинарнэ пшъэдэкIыжь арагъэхьыщт.
Очылым ренэу ишIэныгъэхэм ахигъэ­хъон фае. Очылхэм я Федеральнэ палатэ ар къыдилъытэзэ правэм илъэныкъо зэфэшъхьафхэмкIэ вебинархэр зэхещэ. Зэфэхьысыжьхэм къызэрагъэлъагъорэмкIэ, мыщ фэдэ егъэджэн Iофтхьабзэхэр урысые очылхэм ямызакъоу, IэкIыб къэралхэм ащыIэ яIофшIэгъухэми ашIогъэшIэгъоных.
Iофтхьабзэм хэлэжьагъэхэм зэдырагъаштэу къаIуагъ хьыкум зэхэфынхэм кIэу къахэхьагъэхэм шIуагъэ къызэратыщтыр. Ащ нэмыкIэу урысые очылхэм яIофaшIэн имэхьанэ къэIэтыгъэнымкIэ ыкIи яIэпэIэсэныгъэ хагъэхъонымкIэ мы зэхъокIыныгъэхэр лъэбэкъушIух. Джащ фэдэу унэе практикэм фэгъэзэгъэ юрист­хэми яIофшIэн зэхъокIыныгъэшIухэр фэхъущтых.
Владислав Гриб къызэриIуагъэмкIэ, унэе практикэм фэгъэзэгъэ юристхэр очыл зыхъухэкIэ ястатус нахь ин мэхъу.
— Хэбзэгъэуцугъэм къызэри­гъэнафэрэмкIэ, депутатхэм афэдэу очылхэм ящыкIагъэу зыкIэупчIэхэрэм (запрос) кIуачIэ яI. Ащ зыщызыдзыехэрэм административнэ пшъэдэкIыжь ара­гъэхьыщт, яIэнатIэхэм аIуагъэ­кIыщтых, — къыIуагъ В. Гриб.
Унэе практикэм фэгъэзэгъэ юристхэм правэм илъэныкъо зэфэшъхьафхэмкIэ шIокI имыIэу ушэтынхэр акIунхэу щыт. Мыщ дэжьым къэIогъэн фае, граждан, арбитражнэ ыкIи административнэ даохэмкIэ Iоф зышIэщтыгъэ юристхэм уголовнэ правэмкIэ ушэтынхэр зэракIунхэ фаем дырагъаштэрэп.
— Сыд фэдэрэ врачи къыхихыгъэ лъэныкъом имызакъоу апэрэ медицинэ IэпыIэгъур аригъэгъотышъун фае. Юрист пэпчъ джащ фэдэу правэм илъэныкъо пэпчъ хэшIыкI фыриIэн, цIыфым ишIуагъэ ригъэкIышъун фае, — къыIуагъ В. Гриб.
Хэбзэгъэуцугъэм ипроект 2028-рэ илъэсым нэс техьанхэу агъэнафэ. Унэе практикэм фэгъэзэгъэ юристхэм очыл статусыр къызIэкIагъэхьанымкIэ егуп­шысэнхэу уахътэ яIэщт.
КIарэ Фатим.