Адыгэ Республикэм изаслуженнэ сурэтышIэу, Урысыем исурэтышIхэм я Союз хэтэу Сергей Филатовым ыныбжь илъэс 70-рэ зэрэхъугъэм фэгъэхьыгъэ къэгъэлъэгъон Адыгеим и Сурэт къэгъэлъэгъуапIэ къыщызэIуахыгъ.

СурэтшIыным зыпылъ илъэс 50-м зыдэлэжьэгъэ IофшIагъэхэм къахэхыгъэ сурэт 70-рэ ащ хэхьагъ. Лъэпкъ тари­хъым, щыIэныгъэм къапкъырыкIырэ гупшысэхэр IэпэIасэм исурэтхэм къащегъэлъагъо. ИIофшIэн дэгъоу зэригъэ­цакIэрэм фэшI АР-м ыкIи Темыр Осетием культурэмкIэ яминистерствэхэм ящытхъу тхылъхэр къыфагъэшъошагъэх.
Сергей Филатовыр 1955-рэ илъэсым Сахалин хэкум къыщыхъугъ. Ыныбжь илъэс нахь мыхъугъэу иунагъо Адыгеим къэкIожьыгъ. 1982-рэ илъэсым Рос­тов-на-Дону дэт художественнэ училищыр къыухыгъ. Адыгэ къэралыгъо университетым искусствэхэмкIэ и Институт ишIэныгъэхэм ащыхигъэхъуагъ. 1997-м къыщыублагъэу Урысыем исурэтышIхэм я Союз хэт. ИIэшIагъэхэр Урысыем ишъолъыр зэфэшъхьафхэм къащагъэлъа­гъох, Адыгэ Республикэм и Лъэпкъ музей чIэлъых.
Сурэт пэпчъ ишIын гукъыдэчъ фэхъу­гъэр, ащ къыфэзгъэущыгъэр ыкIи зишIыгъэ уахътэхэр ыгу илъых. Ростов-на-Дону дэт художественнэ училищым щеджэзэ ышIыгъэгъэ сурэтхэм ащыщхэр джы къызнэсыгъэм къыхегъэщых, уасэ афешIы ыкIи егъэлъапIэх.
Iофтхьабзэр рагъэжьэным ыпэкIэ сурэтышIым экскурсие ригъэкIокIыгъ.
Сыд фэдэрэ Iофи творческэ екIолIакIэ фэпшIын зэрэфаер сурэтышIым къыхегъэщы. Ежь ыгукIэ къыхихыгъэ ыкIи ищыIэныгъэ зыфигъэхьыгъэ сурэтшIыным ичэзыу зэфэхьысыжь мы къэгъэлъэгъо­ным щыфешIы. Тарихъымрэ уахътэм къыхэхыгъэ гупшысэхэмрэ зэрэзэрипхыгъэхэр иIофшIагъэхэм ахэолъэгъукIы. Шэф остыгъэр, пшэхъо сыхьатхэр, тхылъхэр, къэгъагъэхэр, хьацIэ-пIацIэхэр ыкIи нэмыкIхэр уахътэм итамыгъэхэу иIофшIагъэхэм ащ ащегъэфедэ.
Сурэт къэгъэлъэгъуапIэм ипащэу, Урысыем культурэмкIэ изаслуженнэ IофышIэу Бырсыр Абдулахь, Адыгэ Республикэм исурэтышIхэм я Союз итхьаматэу Елена Абакумовар, Урысыем инароднэ сурэтышIэу, тхакIоу Къат Теуцожь ыкIи нэмыкIхэри мэфэкI зэхахьэм къыщыгущыIагъэх.
— СурэтышI IэпэIасэм иIофшIагъэхэм гъунэ зимыIэ искусствэр къаригъэлъэгъукIыгъ. ЩыIэныгъэм илъэныкъуабэ къызэлъиубытызэ, сурэтхэм акупкI къы­рихыгъ, — къыIуагъ Елена Абакумовам.
Къэгъэлъэгъоным къэкIогъэ Вэрэкъо Хъурет ишIошIкIэ къыддэгощагъ:
— Сергей Филатовым иIэшIагъэхэм гум хагъахъо. Ахэм псынкIэу уаблэ­кIышъурэп, укъэуцушъ, сурэтым куоу ухахьэ, уегъэгупшысэ, IэпэIасэм къыриIотыкIынэу зыфэягъэм улъэхъу, къэогъоты.
СурэтышIым иIофшIэн фэзгъэчэфырэр, нахь инэу фэзгъаблэрэр ыушъэфырэп, ар ишъхьэгъус ары.
— Шъыпкъагъэ зыхэлъ сурэтышIэу зысэлъытэжьы (адыгабзэкIэ къыIуагъ), сыгукIи сыпсэкIи сисэнэхьат сыфэ­шъыпкъ. Мы къэгъэлъэгъоным джыри къыкIэлъыкIощтым зы гупшысэ хэушъхьа­фыкIыгъэ фэзгъэхьыщт, ау ащ джыри ышъхьэ къисхыщтэп, — къыIуагъ Сергей Филатовым.
СурэтышIыр бзэ зэфэшъхьафхэмкIэ мэгущыIэ, адыгабзэм хэшIыкI фыриI. Къэгъэлъэгъоныр Iоныгъом и 7-м нэс зэIухыгъэщт. Искусствэр зышIогъэшIэгъонхэр ащ еплъынхэу зэхэщакIохэм рагъэблагъэх.
Лъэпшъыкъо
Фатим.