УФ-м и Президентэу Владимир Путиным пшъэрылъ къызэрафи­шIыгъэм тегъэпсыхьагъэу сэнэхьат ухьазырыныгъэм ипрограммэу «Адыгеим и ЛIыхъужъхэр» зыфиIорэм иигъэкIотыгъэ къызэIухын Мыекъопэ къэралыгъо технологическэ университетым щыкIуагъ.

Программэм пшъэрылъэу иIэр заом лIыхъужъныгъэ щызезыхьэгъэ дзэкIолIхэу хэу­шъхьафыкIыгъэ дзэ операцием иветеран хъугъэхэр къэралыгъо ыкIи муниципальнэ гъэIорышIэным икъулыкъухэм ахэгъэхьэгъэнхэр, пэщэныгъэ зезыхьащт куп лъэш зэхэщэгъэныр, рес­публикэм ыпашъхьэ ит зигъо пшъэрылъхэр шIуагъэ хэлъэу гъэцэкIэгъэнхэм фэлэжьэщтхэр къыхэхыгъэнхэр ары.
Зэнэкъокъум текIоныгъэ къы­щыдэзыхыгъэхэу шъолъыр программэм хэлэжьэщтхэм шIуфэс къарихынэу къэкIуагъ Адыгеим и ЛIышъхьэу КъумпIыл Мурат. Республикэм и ЛIышъхьэ къызэрэхигъэщыгъэмкIэ, мыщ къе­кIолIагъэхэм къахахынхэ зэхъум лъэныкъуабэ къыдалъы­тагъ: хэушъхьафыкIыгъэ дзэ опе­рацием хэлажьэхэу ыкIи иветеранхэу программэм игъэ­цэ­кIэн зиIахь хэзышIыхьащтхэм ялъэIу тхылъи 149-м щыщэу нэбгырэ 18 еджэкIо купым хагъэхьагъэр, нэбгырэ 20-р къы­кIэлъыкIощт чэзыум иIэпэ­чIэгъэнэ куп хэхьагъ.
«Нэбгырэ пэпчъ заом хэлэ­жьэнымкIи, пэщэныгъэ зэрихьанымкIи IэпэIэсэныгъэ иIэ хъугъэ. Нэбгырэ пэпчъ хэгъэгум, дзэ­кIолI пшъэрылъым зэрафэхьазырыр къыгъэшъыпкъэжьыгъ, Урысыем къырыкIощтымкIэ пшъэдэкIыжь ыхьыным зэрэфэхьазырыр къыгъэлъэгъуагъ, зыхэтхэм щысэ афэхъун зэри­лъэкIыщтыр къыгъэшъыпкъэжьыгъ», — къыIуагъ АР-м и ЛIышъхьэ.
Программэу «Адыгеим и ЛIыхъужъхэр» зыфытегъэпсыхьагъэр узэхэтэу узэдэлэжьэным икъулайныгъэхэмкIэ щысэ атырахыныр, ахэр аIэ къырагъэ­хьанхэр, ашъхьэкIэ хэхъоныгъэ ашIы-
ныр, джырэ уахътэм диштэрэ амалхэмрэ гъэIорышIэныгъэм итехнологиехэмрэ икъоу къызIэкIагъэхьанхэр ары. Илъэсым къыкIоцI хэушъхьафыкIыгъэ дзэ операцием иветеранхэр апшъэрэ еджапIэм икIэлэегъэджэ IэпэIасэхэм, хэбзэ къулыкъухэм япащэхэм, лъэпкъ хъыз­мэтымкIэ Урысые академием испикер­хэм, УФ-м и Президент дэжь щыIэ къэралыгъо къулыкъум иIофышIэхэм ра­гъэджэщтых. Анахь дэгъоу къэзыух­хэрэм республикэм игъэцэкIэкIо хабзэ ыкIи чIыпIэ зыгъэIорышIэжьыным якъулыкъухэм Iоф ащашIэщт.
Федеральнэ программэу «ЛIыхъужъхэм яуахът» зыфиIорэм иятIонэрэ чэзыу хэлэжьэрэ Сергей Ковалевым алъэныкъомкIэ Iофэу дишIэрэм КъумпIыл Мурат къыщыуцугъ ыкIи къызэрэхигъэщыгъэмкIэ, программэхэм язэшIохын хэушъхьа­фыкIыгъэ дзэ операцием иветеранхэм ягъэхьазырынкIэ шIуагъэ къэзытыщт Iофтхьэбзэ шъхьаIэхэм зыкIэ ащыщ. Къэралыгъо граждан къулыкъум иIэ­натIэхэу пшъэдэкIыжь зыхэлъхэм, кадрэ политикэр тэрэзэу зэхэщэгъэным, ти­лIыхъужъхэм IэпыIэгъу ятыгъэным япхы­гъэу ахэр щытых.
«ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу ятыгъэным иIофыгъохэм ­Адыгэ Республикэм лъэшэу анаIэ зэращытырагъэтырэр къыхэзгъэщынэу сыфай. ТидзэкIолIхэм зэхашIэнэу тыфай кIыбкъот пытэ зэряIэр, ахэм ягупсэхэмрэ яIахьылхэмрэ амал зэриIэкIэ нахь лъэ­шэу тишIуагъэ зэрядгъэкIыщтым тыпылъ. Ащ мэхьанэшхо иI, дзэкъулыкъушIэхэм къулыкъур ахьынымкIэ амалэу яIэхэр нахьышIу хъунхэмкIэ, япшъэрылъхэр агъэцэкIэнхэмкIэ IэпыIэгъушхо ар мэхъу. ХэушъхьафыкIыгъэ дзэ операцием хэлажьэхэрэмрэ ахэм яунагъохэмрэ Iэпы­Iэгъу ятыгъэным фытегъэпсыхьэгъэ Iофтхьэбзабэ республикэм щырахъу­хьагъ ыкIи щагъэцакIэ. Дзэ частьхэу Адыгэ Республикэм ичIыгу итхэм лъэныкъо пстэумкIи IэпыIэгъу ятыгъэным фытегъэпсыхьэгъэ дзэ-шеф IофшIэныр республикэм чанэу щырекIокIы. 2022-рэ илъэсым къыщегъэжьагъэу а гухэлъхэм сомэ миллиарди 4,5-м ехъу апэIуагъэ­хьагъ», — икIэухым къыIуагъ Адыгеим и ЛIышъхьэ.
Пшъэрылъэу зыфагъэуцужьыгъэхэр къадэхъунхэу, еджэнымкIи гъэхъагъэхэр ашIынхэу ветеранхэм афэлъэIуагъ Къум­пIыл Мурат. Программэу «Адыгеим и ЛIыхъужъхэм» нэбгырэ пэпчъ иамалхэр икъоу къызэIуихынхэмкIэ ишIуагъэ къы­зэрэкIощтым ицыхьэ зэрэтелъыр къыхигъэщыгъ.
Еджэныр зэраублагъэм пае къэзэрэугъоигъэхэм къафэгушIуагъэх АР-м и Къэралыгъо Совет — Хасэм и Тхьаматэ игуадзэу, хэушъхьафыкIыгъэ дзэ опе­рацием иветеранхэм яшъолъыр Ассоциацие итхьаматэу, Урысыем и ЛIы­хъужъэу Цэй Эдуард, программэу «Адыгеим и ЛIыхъужъхэр» зыфиIорэм икураторэу ыкIи игъэсакIоу, Къыблэ-Урысые институтым ипащэ игуадзэу Алексей Барановыр.
ИкIэухым Мыекъопэ къэралыгъо технологическэ университетым и Гупчэу къэралыгъо ыкIи муниципальнэ къулыкъушIэхэм яхэхъоныгъэ зегъэушъомб­гъугъэным фэгъэзагъэм ипащэу Пафэ Фатимэ зэреджэщтхэм ипрограммэ щигъэгъозагъэх. Ащ модуль шъхьаIэу 4 хэхьэ: къэралыгъо политикэмрэ къэралыгъо гъэIорышIэным исистемэрэ; экономикэмрэ финансхэмрэ; шъолъыр ыкIи муниципальнэ гъэIорышIэныр; гъэIорышIэнымкIэ джырэ технологиехэр. Ащ нэмыкIэу гъэсэныгъэ дисциплинэ зэфэшъхьафхэр, зэIукIэгъухэу гъэсакIохэм адыряIэщтхэр, нэбгырэ пэпчъ ышъхьэкIэ хэхъоныгъэ зэришIыщтым иамалхэр, культурнэ-просветительскэ ыкIи нэмыкI Iофтхьабзэхэр.
АР-м и ЛIышъхьэ ипресс-къулыкъу
къытырэ къэбархэмкIэ
Тхьаркъохъо Сафыет.