ШышъхьэIум и 22-м къыщегъэжьагъэу и 28-м нэс зыгъэпсэфыпIэу «Горная легенда» зыфиIорэм этнолагерэу «АдыгLаnd» зыфиIорэм иIофшIэн ригъэкIокIыщт. Лъэпкъыбзэм икъызэтегъэнэжьын фэгъэхьыгъэ Iофтхьабзэхэр мыщ щызэхащэх.

Ахэм республикэм ирайон зэфэшъхьафхэм, Тыркуем, КъЩР-м къарыкIыгъэ кIэлэ­еджэкIо 60 хэлажьэ. Лъэпкъыбзэмрэ культурэмрэ къэухъумэгъэнхэр этнокультурнэ гъэсэны­гъэ гупчэм ипшъэрылъ шъхьаI.
Егъэджэгъу сыхьатхэм, творческэ зэIукIэгъухэм анэмыкIэу, адыгагъэм, адыгэ культурэм язэгъэшIэн фэгъэхьыгъэ Iофтхьа­бзэхэр программэм къыдыхэлъы­тагъэх. Къэшъоным, орэд къэ­Iоным, пIоблэ шIыным, дышъэи­дэм ныбжьыкIэхэр афагъэсэщтых.
— Мы лагерым иIофшIэн мэхьанэшхо иI. Ныдэлъфыбзэм икъызэтегъэнэн ар фэлажьэ. Адыгагъэм, адыгэ культурэм язэгъэшIэнкIэ ныбжьыкIэхэм куоу лагерым тащыдэлэжьэщт. Адыгабзэм хэхъоныгъэ езы­гъэ­шIырэмэ мыр ащыщ, — къы­Iуагъ филологие шIэныгъэхэмкIэ кандидатэу, АКъУ-м идоцентэу Цэй Беллэ.
МэфэкI шIыкIэм тетэу лъэпкъыбзэ еджапIэр къызэIуахыгъ. Ащ хэлэжьагъэх Адыгэ къэралыгъо университетым иректорэу Мамый Даутэ, Адыгэ Хасэм итхьаматэу ЛIымыщэкъо Рэ­мэзан ыкIи нэмыкIхэр. Апэрэ ма­фэм ныбжьыкIэхэм къэгъэлъэгъон гъэшIэгъонхэр зэха­щагъ, къэшъуагъэх, орэд дахэхэр къаIуагъ. Нэужым зэрагъэнэ­фагъэм тетэу, зэнэкъокъухэр ре­кIокIыгъэх, тарихъым щыщ пычыгъохэм защагъэгъозагъ. Пчыхьэм Урысыем и ЛIыхъу­жъэу Цэй Эдуард зэIукIэгъу дыряIагъ.
КъыкIэлъыкIорэ мафэхэм Iофтхьэбзэ гъэшIэгъонхэр зэхащагъэх. Хьакъунэ Эльзэ ды­шъэидэным ишъэфхэр къафиIотагъ, Даур Рэмэзан шыкIэпщынэр зэрашIырэр еджакIомэ аригъэлъэгъугъ. ПIатIэкъо Айдэ­мыр ныбжьыкIэхэм пхъэкIыч цIыкIухэр аригъэшIыгъэх, Трапизонян Виолеттэ шIухьафтынэу адыгэ бзылъфыгъэ ыкIи хъулъфыгъэ шъошэ цIыкIухэр аригъэ­шIыгъэх, нэмыкI IэпэIасэхэми мастер-классхэр къатыгъ.
Пчыхьэзэхахьэхэм къарагъэ­блэгъэгъэхэ Адыгэ Республикэм изаслуженнэ артистэу, телерадиокомпаниеу «Адыгеим» ипащэу Ацумыжъ Адам, композито­рэу, продюсерэу, Адыгеим ыкIи Къэрэщэе-Щэрджэс республи­кэхэм янароднэ артистэу ЛIыбзыу Аслъан. НыбжьыкIэхэр зы­гъэгумэкIырэ упчIэхэм ахэм джэуапхэр къаратыжьыгъ. Ас­лъан имэкъамэхэм ныбжьыкIэ­хэр къадэшъуагъэх. Хабзэ зэрафэхъугъэу, адыгэ джэгухэр пчыхьэрэ афызэхащэх.
Бзэм ыкIи лъэпкъ шэн-ха­бзэхэм якъызэтегъэнэн фэгъэ­хьыгъэ Iофтхьэбзэ гъэнэфагъэу рахъухьагъэхэр агъэцэкIэщтых.
Лъэпшъыкъо Фатим.