Iэрыфэгъу къэлэ щыIакIэм фытегъэпсыхьэгъэ проектхэм я Урысые зэнэкъокъу Адыгеим ыгъэхьазырыгъэхэр анахь дэгъухэм ащыщхэу къыщыхахыгъэх.

БлэкIыгъэ тхьамафэм къалэу Казань щыкIогъэ форумэу «Развитие малых городов и исторических поселений» зыфиIорэм къыдыхэлъытэгъэ пленарнэ зэхэсыгъоу УФ-м и Правительствэ и Тхьаматэу Михаил Мишустиныр, вице-премьерэу Марат Хуснуллиныр ыкIи УФ-м псэолъэшIынымкIэ иминистрэу Ирек Файзуллиныр зыхэлэжьагъэхэм зэнэкъокъум икIэух щызэ­фахьысыжьыгъ. Ащ Адыге­им текIоныгъэр къызэрэдихыгъэр къыщаIуагъ.
— УФ-м и Правительст­вэ тиреспубликэ лъэшэу ынаIэ къызэрэтетым, Iэпы­Iэгъоу къытатырэм, Iэры­фэгъу къэлэ щыIакIэ гъэ­псыгъэным ылъэныкъокIэ Iофэу тшIэрэм осэ ин къы­зэрэфашIыгъэм афэшI лъэшэу тыфэраз, — къыщитхыгъ АР-м и ЛIы­шъхьэу КъумпIыл Мурат ин­тернет нэкIубгъохэм ащыщ. — Мыгъэ типроектищ экспертхэм къыхагъэщыгъ ыкIи зэнэкъокъум ахэм пэрытныгъэр къыщахьыгъ. Ащ ишIуа­гъэкIэ къэкIорэ илъэсым поселкэхэу Инэмрэ Яблоновскэмрэ паркхэр ащызэтедгъэпсыхьащтых, Мые­къуапэ «Мэздахэ» игъэ­псын щылъыдгъэкIо­тэщт.
Шъугу къэдгъэкIыжьын, УФ-м и Президент кIэща­кIо зыфэхъугъэ зэнэкъо­къур УФ-м псэолъэшIынымкIэ и Министерствэ 2018-рэ илъэсым къы­щыу­благъэу зэхещэ. Мыгъэ ар лъэпкъ проектэу «ЩыIэныгъэм пае инфраструктурэр» зыфиIорэм къыды­хэлъытагъэу лъа­гъэ­кIуа­тэ. Адыгеир ащ апэрэп зэрэ­хэлажьэрэр. ГущыIэм пае, Адыгэкъалэ гъогогъуищырэ текIоны­гъэр къыщыди­хыгъ ыкIи ащ ишIуагъэкIэ рагъэжьэгъэ гъэпсэфыпIэ чIыпIэр мыгъэ аухыщт.
АР-м и ЛIышъхьэ къызэ­рэхигъэщыгъэмкIэ, зэнэ­къокъум зэрэхэлэжьэщтхэ шапхъэхэм 2025-рэ илъэсым зэхъокIыныгъэхэр афэ­хъугъэх. Джы ащ къэ­лэ цIыкIухэмрэ «опорнэкIэ» зэджэгъэхэ псэу­пIэхэмрэ хэлэжьэнхэу фи­тыныгъэ къаратыгъ. Ар Адыгеим къызфигъэфеди поселкэхэу Инэмрэ Яблоновскэмрэ апае проектхэр ыгъэхьазырыгъэх.
— Типроектхэм текIоныгъэр къыдахыгъ. Ащ хэбзэ къулыкъухэмрэ цIы­фэу республикэм исхэмрэ Iофэу зэдашIэрэм осэ ин къызэрэфашIыгъэр къеу­шыхьаты. ЦIыфхэм зызщагъэпсэфыщт, яунагъо­хэм уахътэр зыщадагъэ­кIощт Iэрыфэгъу чIыпIэхэр зэкIэлъыкIохэу дгъэ­псынхэм ыуж тит. Федеральнэ Гупчэм иIэпыIэгъу ишIуагъэкIэ кIэщакIо тыз­фэ­хъу­рэ проектыбэ джыри пхырытщын тлъэ­кIыщт, — къыкIигъэт­хъыгъ Къум­­пIыл Мурат.