Гастрономическэ турым къыдыхэлъытагъэу зекIохэр зэрыс мэшIокур тыгъуасэ Адыгеим икъэлэ шъхьаIэу Мые­къуапэ апэрэу къэкIуагъ.

Ахэр тишъолъыр ихьа­кIагъэх. ЗекIохэр мэшIокум Москва къыщитIыс­хьагъэх, Воронеж къызэранэкIыгъ, джы Краснодар, Новороссийскэ, Таганрог адэхьанхэу къапыщылъ.
Шъугу къэдгъэкIыжьын, мы Iофтхьабзэм икIэща­кIор ОАО-у «Урысые мэ­шIоку гъогухэр» ары. Тикъэра­лыгъо и Къыблэ хэхьэрэ шъолъыр зэфэ­шъхьафхэу хьакIэхэр зи­кIасэхэм яшхы­ныгъо зэ­фэшъхьафхэр зекIохэм ауплъэ­кIун амал яIэным мыр фэ­IорышIэ. Адыгеим къыгъэлъэгъон иI, анахьэу адыгэ къуаем хэшIыкIыгъэ шхыныгъохэм, мы илъэсым къаугъоижьыгъэ мы­Iэрысэм яIэшIугъэ зекIо­хэм арагъэуплъэкIугъ.
Шъолъыр общественнэ организациеу «ЗекIо- Адыгеим» исовет хэт Ольга Ивановам къызэриIуагъэмкIэ, щылэ мазэм къыщыублагъэу гастромэшIокум зыфагъэхьазыры, мы илъэсым дэкIыгъуитIу агъэнэфагъ — шышъхьэIум и 25-м ыкIи чъэпыогъум и 4-м.
— Урысыем къикIыхи нэбгыри 100 фэдиз ты­гъуасэ Адыгеим зекIо къэкIуагъэх, — къеIуатэ Ольга Ивановам. — Гаст­рономическэ турым изэ­хэщэнкIэ мурадэу тиIагъэр Адыгеир зэрыгушхо­рэ, брендэу тиIэ шхыныгъохэр, тичIыпIэ дахэхэр, тикультурэ зекIохэм ядгъэ­шIэнхэр, ядгъэлъэгъунхэр ары. Гъогууанэу къа­кIущтым охътабэ тыра­мыгъэкIодэным, нахьыбэ ядгъэлъэгъуным афэшI Мые­къопэ районыр къы­хэтхыгъ. Апэ поселкэу Садовэм дэт пчэнхэр зыщаIыгъырэ мэкъумэщ хъызмэтшIапIэу «Мамонтий» зыфиIорэм ифермэ хьакIэхэр едгъэблэгъагъэх. Къоеихыным ишъэфхэм защагъэгъозэн амал ахэм яIагъ. Адыгэ къуаем нэмыкIэу, европейскэ техно­логиер къызфагъэфедэзэ къое зэфэшъхьафхэр мы хъызмэтшIапIэм щырахых. Ащ нэмыкIэу, черкесскэ чъыгхатэм къэбарэу пы­лъым нэIуасэ фэтшIыгъэх. Нэужым поселкэу Каменномостскэм дэт хъызмэт­шIапIэу «Ракс» зыфиIоу мыIэрысэм хэшIыкIыгъэ псы IэшIу къабзэ къыз­щыдагъэкIырэм зекIохэр щыIагъэх. Мы хъызмэт­шIапIэм къыдигъэкIырэ псы IэшIур зэлъашIэ ыкIи Урысыем ичIыпIэ зэфэ­шъхьафхэм ащэх. Ащ шъоущыгъу ыкIи нэмыкIэу псы IэшIухэм ахатакъо­хэ­рэр хэлъхэп. МыIэрысэм ар зэрэхашIыкIырэр нэ­рылъэгъу афэхъугъ хьа­кIэхэм ыкIи ежьхэми ащ иIэшIугъэ ауплъэкIугъ.
Ащ нэмыкIэу, тичIы­на­лъэ къыщыкIырэ щаим ыкIи щыкIащырэ шъоум яIэшIугъэ хьакIэхэм ауп­лъэкIугъ.
ЗекIохэм Мыекъуапэ къызагъэзэжьым, пчыхьэшъхьашхэ арагъэшIыгъ, лъэпкъ шхыныгъохэу пIас­тэ, щыпс, чэтлыбжь, нэмыкIхэри апагъохыгъэх.
— Мы Iофтхьабзэм изэ­хэщэнкIэ зишIуагъэ къы­тэзыгъэкIыгъэхэм, анахьэу тихъызмэтшIапIэхэм япащэхэм, лъэшэу тафэраз. Тицыхьэ телъ тишъолъыр къыщыдагъэ­кIыгъэ гъомы­лэпхъэ къабзэхэр зекIохэм агу зэрэрихьыгъэм. ТапэкIи ахэм тишъолъыр кIуапIэ зэра­фэхъущтым щэч хэлъэп, — къыIуагъ О. Ивановам.
КIАРЭ Фатим.