Iоныгъом и 17-м къыщыублагъэу и 21-м нэс зыгъэ­псэ­фыпIэу «Горная легенда» зыфиIорэм экспе­ри­ментальнэ ушэтынхэмкIэ ыкIи когнитивнэ шIэны­гъэхэмкIэ а I-рэ Кавказскэ еджапIэм иIофшIэн щыкIощт.

Iофтхьабзэм мыщ фэдэ лъэныкъохэм ащытегущыIэщтых: бзитIушIэныгъэр, психолингвистикэр ыкIи нейронаукэр. ЕджапIэм итемэ шъхьаIэр: «Цифрэ лъэхъаным бзэ зэмылIэужыгъуабэхэм экспериментальнэ ушэтынхэр яшIылIэгъэнхэр». ЗэхэщакIомэ къызэраIуагъэм­кIэ, ащ фэдэ темэр къызкIыхахыгъэр аужырэ уахътэм ушэтакIомэ бзитIушIэныгъэм анаIэ зэрэтырадзагъэр, етIанэ гущыIэным епхыгъэ укъоныгъэхэм япроцент нахьыбэ зэрэхъурэр ары.
— ЕджапIэм ипрограммэ хэхьэх лекциехэу, практикумхэу экономикэмкIэ Апшъэрэ еджапIэм ишIэныгъэ-ушэтыпIэ университет бзэм ыкIи шъхьэкуцIым язэгъэшIэнкIэ Гупчэу хэтым испециалистхэм къатыщтхэр, бзитIушIэныгъэм, психо- ыкIи нейролингвистикэм, клиническэ лингвистикэм, бзэ политикэм япхыгъэ упчIэхэм язэхэфын. Мэфэ шъхьаIэу Iоф­тхьабзэм щагъэ­нафэрэр Iоныгъом и 21-р ары. А мафэм сателлитнэ конференциеу «Экспериментальнэ ушэтынхэр ыкIи когнитивнэ наукэхэр» зыфиIорэр рагъэкIо­кIыщт, ащ урысые ыкIи IэкIыб экспертхэр хэлэжьэнхэу щыт, зэхэпхъэгъэ шапхъэм илъэу ар кIощт, — къыщыхагъэщыгъ АКъУ-м ипресс-къулыкъу.
ЗишIэныгъэхэм ахэзыгъахъо зышIоигъохэр еджапIэм еблэгъэшъущтых, ащ пае ахэм шышъхьэIум и 25-м нэс зарагъэтхын фае. Къырагъэблагъэх студент-бакалаврхэр, магистрантхэр, аспирантхэр ыкIи лингвистхэр, психологхэр, логопедхэр, дефектологхэр — зэкIэ бзэм изэмылIэужыгъоныгъэ зышIогъэшIэгъонхэр. Зэхахьэм нэбгырэ 50-м нэс хэлэжьэшъущт.
Iофтхьабзэм изэхэщакIох экспериментальнэ лингвистикэмкIэ АКъУ-м и Лабораторие, экономикэмкIэ Апшъэрэ еджапIэм бзэм ыкIи шъхьэкуцIым язэгъэшIэнкIэ и Гупчэ, социокультурнэ ыкIи лъэпкъыбзэ ушэтынхэмкIэ Гупчэр.
Псауныгъэр къэухъумэгъэнымкIэ Адыгэ Республикэм и Министерствэ, Къыблэ Урысыем иапшъэрэ еджапIэхэм яректорхэм я Совет, учреждениеу «Урысыем илъэпкъхэм я Унэ» яIэпыIэгъоу Iофтхьабзэр рагъэкIокIы.