ШышъхьэIум и 14-м, 2025-рэ илъэсым Адыгэ Республикэм иветеранхэм я Совет лъыхъон экспедицие ащыри­- гъэ­кIокIыгъ Джэджэ партизан отрядыр зыщызэогъэ чIыпIэхэм.

Тызэрэщыгъуазэу, шэкIогъум и 14-м, 1942-рэ илъэсым Джэджэ партизан отрядыр зэхагъэтэкъон ягухэлъэу станицэу Кужорскэм иIэгъо-блэгъу фашистхэр къыщылъэгъуагъэх. Партизан купэу Петр Позняковыр зипэщагъэм Гадюкэ балкэкIэ за­джэхэрэ чIыпIэм ылъэныкъокIэ зэ­кIэкIорэ партизанхэр къыгъэгъунэщтыгъ.
АР-м иветеранхэм я Совет къызэрэщаIуагъэмкIэ, фашистмэ самолетхэмкIэ Позняковым икуп зыдэщыIэ чIыпIэр агъэунэфыгъагъ ыкIи къяохэу аублагъ. Ахэм апэуцужьхэзэ, Позняковым икуп партизанхэр къыблэ хъуатэмкIэ щыIэгъэ базэм екIунхэ амал аритыщтыгъ. Ау отрядым ибазэ нэсынхэкIэ метрэ 300 нахь къэмынагъэу фашистхэр купым шъэфэу къыпэуцугъэх. Ащ щыкIогъэ заом Петр Позняковыр щыхэкIодагъ, а чIыпIэ дэдэм щагъэтIылъыжьыгъ.
— Илъэс 83-рэ тешIэжьыгъэу партизанхэмрэ техакIохэмрэ зыщызэзэогъэхэ чIыпIэр лъыхъокIо экспедицием къыхигъэщыжьыгъ. ЛIы­хъужъыр зыщагъэтIылъыгъэри къыхагъэщыжьыгъ. Мыекъуапэ и «Партизан лъэс гъогухэм» ягъэ­псын къыдыхэлъытагъэу саугъэтми, ащ екIолIэрэ гъогуми ягъэцэ­кIэжьын рахъухьэ, — къыщыхагъэщыгъ АР-м иветеранхэм я Совет.
ЛъыхъуакIомэ къызэратырэмкIэ, 1942-рэ илъэсым ишышъхьэIу мазэ Мэхъош мэзым партизанскэ отряд 25-рэ хэтыгъ. Мыекъопэ партизан отрядэу «Народные мстители» зыфиIорэм пэмычыжьэхэу шъхьафитныгъэм фэбанэщтыгъэх Борцовэ-Могилевич, Тульскэ ыкIи Джэджэ партизан отрядхэр. Джэджэ отрядым дзэкIолI 90-рэ хэтыгъ. Ар джыри куп шъхьаф-шъхьафэу гощыгъагъэ, ахэм япэщагъэх П.Г. Позняковыр, Д.И. Шаповаловыр, Е.Т. Ширибординыр, В.Д. Ануфриевыр, Пупковыр.