«ЧIыпIэ сообществэм игупчэхэр» зыфиIорэ проектымрэ Урысыем иобщественнэ организациеу «Урыс географическэ обществэхэмрэ» зэгъусэхэу географическэ обществэр зызэхащагъэр илъэси 180-рэ зэрэхъугъэм фэгъэхьыгъэ фестивалэу «Испун» зыфиIорэр зэхащагъ. ПсэупIэу Абдзэхэхьаблэ непэ пчэдыжьым сыхьатыр пшIым щыублагъэу мафэм сыхьатыр зым нэс ар щыкIощт.

Фестивалым ыцIэ ар зыфэгъэхьыгъэр къегъэнафэ — лъэпкъ культурэм икъэ­ухъумэн. ТыгъэкъохьэпIэ Кавказым итарихъ, икультурэ ащ ылъапс. Адыгэ чIыгум испунэ пчъагъэ къытенагъ, ахэр лъэпкъ тарихъым исаугъэтых, къэухъу­мэгъэнхэ, къызэтегъэнэгъэнхэ фае. Фестивалым ащ анаIэ тыраригъэдзэныр ипшъэрылъ.
IэпэщысэшIынымкIэ къэгъэлъэгъон-егъэджэнхэр Iофтхьабзэу агъэнэфагъэхэм ахэтыщтых, дышъэидэм, хэдыкIыным, пIоблэшIыным яшъэфхэр IэпэIасэхэм фестивалым ихьакIэхэм арагъэшIэщтых. Археологэу, сурэтышIэу ЛэупэкIэ Нурбый исурэтхэм якъэгъэлъэгъон ащ къыдыхэлъытагъ. Джащ фэдэу АР-м исурэтышIэхэм я Союз хэтхэр Iофтхьабзэм хэлэжьэщтых.
Фестивалыр зыщыкIощтыр псэупIэу Абдзэхэхьаблэ иурамэу Почтовэм тет унэу N 35 «А» зыфиIорэм къыпэIулъ пчэгур ары.