Урысые Федерацием и Къэралыгъо быракъ и Мафэ фэгъэ­хьыгъэ Iофтхьэбзэ заулэ Адыгеим тыгъуасэ щыкIуагъ.

Анахьэу Мыекъуапэ игупч ахэр зыщызэхащагъэхэр. Республикэм щыпсэухэрэр ыкIи ихьакIэхэр бэ хъухэу ащ къыщызэрэугъоигъэх. МэфэкI Iофтхьабзэхэм ахэлэжьагъэх АР-м иминистрэхэм я Кабинет хэтхэр, АР-м и Къэралыгъо Совет – Хасэм идепутатхэр, общественнэ зэхахьэхэм, ветеран организациехэм, патриот клубхэм, научнэ ыкIи творческэ интеллигенцием, ныбжьыкIэхэм ялIыкIо­хэр. Ащыщыбэмэ быракъхэр аIыгъыгъэх. Ащ нэмыкIэу гуфакIохэм зэкIэ зышIоигъохэм быракъ цIыкIухэмрэ Iофтхьабзэу «Урысыер – сэ сихэгъэгу» зыфиIорэм къыдыхэлъытагъэу лентэ цIыкIухэмрэ афагощыгъэх. ИгъэкIотыгъэ Iофтхьабзэр аублэным ыпэкIэ ащ хэлажьэхэрэм Урысые Федерацием и Къэралыгъо быракъышхо зэкIэщыгъэу аIыгъыгъ.

Адыгеим и ЛIышъхьэу КъумпIыл Мурат шIуфэс псалъэкIэ къызэIукIагъэхэм закъы­фигъэзагъ. Республикэм ипащэ къызэрэхигъэщыгъэмкIэ, Хэгъэгум и Къэралыгъо быракъ тикъэралыгъо ыкIуачIэрэ ипытагъэрэ ятамыгъэу щыт. ТекIоныгъэм и Быракъ хэушъхьафыкIыгъэ фыщытыкIэу фыряIэри КъумпIыл Мурат агу къыгъэ­кIыжьыгъ. Хэгъэгу зэошхом илъэхъан цIыф лъэпкъыбэмэ къахэкIыгъэхэм текIоныгъэу къыдахыгъэм ар итамыгъ. Мы илъэсым ТекIоныгъэшхом ия 80-рэ илъэс хэдгъэунэфыкIыгъ.
КъумпIыл Мурат къызэриIуагъэмкIэ, Урысыем ис цIыфхэм зыкIыныгъэрэ пытагъэрэ ахэлъэу, Урысые Федерацием и Президентэу Владимир Путиным пэщэныгъэ адызэрихьэзэ, лъэныкъо зэфэшъхьафхэм гъэхъэгъэшхохэр аща­шIых, тихэгъэгу ыпэкIэ лъагъэкIуатэ, ду­наим уасэу ащ къыщыфашIырэр агъэ­пытэ.

«Гимныр къырагъаIозэ, Урысые Федерацием и Къэралыгъо быракъ къызаIэтыкIэ, тихэгъэгу тызэрэрыгушхорэр нахь куоу зэхэтэшIэ, ащ итарихърэ Урысые къэралыгъом игъэпытэн лIэшIэгъу пчъагъэхэм зыкIыныгъэ ахэлъэу лIэужхэр зэрэфэбэнагъэхэмрэ нахь тягупшысэ. Урысыем и Президентэу Владимир Путиным къыхигъэщыгъ: «Тэ тынародышхо зыкI, тызэгъусэу пэрыохъуныгъэхэр зэкIэ щыдгъэзыещтых, тимурадхэр щыIэныгъэм щыпхырытщыщтых. Тызэгъусэу текIоныгъэр къыдэ­тхыщт!», — къыхигъэщыгъ КъумпIыл Мурат.
Урысыем идзэкIолIхэм инэу зэрафэразэр Адыгеим и ЛIышъхьэ къыIуагъ ыкIи хэгъэгум ифедэхэм атегъэпсыхьэгъэ къулыкъоу ахьырэм гъэхъагъэхэр щашIынхэшъ, текIоныгъэр къыдахыгъэу, псынкIэу къагъэзэжьынэу афэлъэIуагъ. Республикэм щыпсэурэ пстэуми псауныгъэ пытэ, щыIэкIэшIу яIэнэу, Адыгеимрэ Урысыемрэ яфедэ зыхэлъ гухэлъыкIэу яIэхэр къадэхъунхэу афиIуагъ.
КъызэIукIагъэхэм закъыфигъэзагъ Адыгэ Республикэм и Къэралыгъо Совет — Хасэм и Тхьаматэу Владимир Нарожнэм. УФ-м и Къэралыгъо быракъ и Мафэ фэшI зэкIэми ар къафэгушIуагъ ыкIи Къэралыгъо быракъыр лъэпкъ зэхэшIыкIыныгъэм изы Iахьышхоу, къэралыгъо тамыгъэ шъхьаIэу зэрэщытыр къыхигъэщыгъ.

МэфэкI программэр лъигъэкIотагъ республикэм итворческэ куп анахь дэгъухэр зыхэлэжьэгъэ концертышхом. Общественнэ чIыпIэхэу быракъхэмкIэ гъэкIэрэкIагъэхэми мэфэкI зэхашIэр нахь къагъэлъэшыщтыгъ.
Адыгеим ирайон пстэуми быракъым и Мафэ ащыкIуагъ. АР-м ныбжьыкIэ IофхэмкIэ и Комитет, гупчэу «Адыгеим иныбжьыкIэхэр» зыфиIорэр Iофтхьэбзабэмэ кIэщакIо афэхъугъэх, ахэм ахэлэжьагъэх республикэм иныбжьыкIэ организациехэр ыкIи партиеу «Единэ Россием» и Гвардие НыбжьыкIэ, «Апэрэхэм я Движение» зыфиIорэр, ныбжьыкIэхэм я Урысые Союз. Респуб­ликэм щыпсэухэрэм амал яIагъ Iоф­тхьэбзэ зэфэшъхьафхэм ахэлэжьэнхэу. Киноакциеу «Тибыракъ тырэгушхо» зыфиIорэм еплъыгъэх, Iофтхьабзэу «Тэ — Урысыем тырицIыф!» зыфиIорэм къыдыхэлъытагъэу Урысыем иныбжьыкIэхэм паспортхэр аратыжьыгъэх. Ащ нэмыкIэу мастер-классхэр зэхащэгъагъэх, хэушъхьафыкIыгъэ дзэ операцием хэлажьэхэрэм зэIукIэгъухэр адыряIа­гъэх.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет