Тэхъутэмыкъое районым ит псэупIэу Яблоновскэм кIэлэеджэкIо 1100-рэ зычIэфэщт гурыт еджапIэ щашIыгъ. Iоныгъом и 1-м ащ ыпчъэхэр къызэ­Iуихыщт.

КIэлэеджакIохэр зычIэсыщтхэ классхэр, ахэм ачIэтын фэе Iэмэ-псымэхэр хьазырых. Тэ­хъутэмыкъое районым иадминистрацие ипащэу Шъэо Аскэр къызэриIуагъэмкIэ, АР-м и ЛIы­шъхьэу КъумпIыл Мурат унашъоу къафишIыгъэм ры­гъуазэхэзэ, псэолъэ ыкIи Iэмэ-псымэ анахь дэгъухэр еджапIэм пае ащэфыгъэх.
— ЕджапIэр щынэгъончъэу, гуIэтыпIэу щытыным лъэшэу тынаIэ тет, — къыхигъэщыгъ Шъэо Аскэр. — Видеолъып­лъэныр къыдыхэлъытагъ, еджапIэм иухъумакIохэм Iоф ашIэ, спортивнэ пчэгур щагум ща­гъэпсыгъ. ЕджапIэм екIолIэрэ урам шъхьаIэу Заводскоим игъэцэкIэжьын шIэныгъэм и Мафэ ехъулIэу аухыщт. Автомобиль уцупIэхэри зэтырагъэ­псыхьагъэх.
ЕджапIэм Iоф щызышIэщт кIэлэегъаджэхэри кIэлэеджа­кIохэри гъэнэфэгъахэх. Процент 90-м нэсэу еджапIэр къы­зэIуахыным фэхьазыр.
Лъэпкъ проектэу «Гъэсэны­гъэм» ишIуагъэкIэ аужырэ илъэ­ситIум гъэсэныгъэм иучреж­дении 3, чIыпIэ мини 2450-м ате­лъытагъэу, районым къыщызэIуахыгъ — зы еджапIэр Бжы­хьэкъоежъым, еджэпIитIур — псэупIэу Яблоновскэм.
Лъэпкъ проекту «НыбжьыкIэхэмрэ кIэлэцIыкIухэмрэ» зы­фиIорэм игъэцэкIэн къыды­хэлъытагъэу Инэм дэт гурыт еджапIэу номерэу 6-р агъэ­кIэжьыгъ. ИлъэсыкIэ еджэгъум изыфэгъэхьазырын игъэкIоты­гъэу районым щэкIо.