Лъэпкъ проектэу «ЩыIэныгъэм пае инфраструктурэр» зыфиIорэм къы­ды­хэлъытагъэу мы илъэсым Адыгэ Республикэм ирайон зэфэшъхьафхэм апхы­рыкIырэ автомобиль гъогухэр агъэцэкIэжьыгъэх, ахэм зэкIэмкIи кило­метрэ 13 якIыхьагъ.

Тишъолъыр иавтомобиль гъо­гухэм якIыхьагъэ километрэ 453-рэ мэхъу, ахэм ащыщэу 245-м — федеральнэ, 208-м — шъолъыр мэхьанэ яI.
— Шъолъыр гъогухэм язэтегъэпсыхьан мэхьанэшхо яI, сыда пIомэ мыхэм административнэ гупчэхэр зэрапхых, зэпымыоу транспортыр ащэзекIо. 2025-рэ илъэсым анахьэу тынаIэ зытедгъэтыгъэр «Мыекъуапэ — Джа­джэ — Псыбай — Зеленчук­скаяр — Карачаевск» зыфиIорэ гъогур ары. Мыщ Адыгеир, гъунэгъу шъолъырхэу Красно­дар краир ыкIи Къэрэщэе-­Щэрджэс Республикэр зэрепхых. Гъогум хэхьэрэ километри 5,4-м ехъу шапхъэхэм ади­штэу агъэцэкIэжьыгъ, — къы­Iуагъ Автодорым иотдел ипа­щэу Дмитрий Бороненкэм.
Ащ нэмыкIэу Мыекъуапэ къэ­зыухьэрэ гъогум изы Iахьэу километри 4,9-м ехъу зэрылъыр псэолъэшIхэм зэтырагъэпсы­хьагъ. Джащ фэдэу автомобиль гъогоу «Красногвардейскэр — Улап — Зарево» зыфиIорэм изы Iахьэу километри 2,6-м ехъурэр агъэцэкIэжьыгъ.
Псэуалъэхэм ягъэкIэжьын пэIухьанэу сомэ миллион
390-м ехъу къатIупщыгъ. ­Лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу илъэсэу тызыхэтым шъолъыр ыкIи муниципальнэ мэхьанэ зиIэ гъогу километрэ 76-м ехъу зэтыра­гъэпсыхьащт.