Адыгэ Республикэм ит гурыт еджапIэхэм япащэхэр, гъэсэныгъэ IофхэмкIэ ахэм яуп­чIэжьэгъухэр, къалэхэм ыкIи районхэм ащызэхэщэгъэ ныбжьыкIэ купхэм IэпыIэгъу афэхъухэрэр, республикэм иминистерствэ зэфэшъхьафхэм ыкIи муниципалитетхэм ялIыкIохэр зыхэлэжьэгъэхэ зэIукIэ «Движение Первых» зыфиIорэм ишъолъыр къутамэу Адыгэ Республикэм щыIэм Мыекъуапэ щызэхищагъ.

ИлъэсыкIэ еджэгъоу къэблагъэрэм гъэсэныгъэм ипрограммэ хэушъхьафыкIыгъэхэр ыкIи шIыкIэ зэфэшъхьафхэр зыгъэфедэхэзэ кIэлэцIыкIухэм Iоф адэзышIэхэрэм яIэпэIэсэныгъэ хэгъэхъогъэныр ыкIи уахътэм диштэу ахэм (программэхэм) зэхъокIыныгъэхэр афэшIыгъэнхэр ары мы Iофтхьабзэм икIэщакIохэм пшъэрылъ шъхьаIэу зыфагъэуцужьыгъэр.
Семинарым ипэублэм ащ хэлэжьагъэхэм видео зэпхыны­гъэ шIыкIэмкIэ закъыфигъэзагъ ыкIи узгъэгумэкIын фэе упчIэ шъхьаIэу непэрэ мафэм къы­гъэуцухэрэм игъэкIотыгъэу къа­тегущыIагъ организациеу «Движение Первых» ипащэу Артур Орловыр.
Адыгеим игъэцэкIэкIо хабзэм икъулыкъухэм ыкIи депутатхэм ацIэкIэ къэзэрэугъоигъэхэм закъыфигъэзагъ Урысыем и ЛIыхъужъэу, Адыгэ Республикэм и Къэралыгъо Совет — Хасэм и Тхьаматэ игуадзэу Цэй Эдуард. Ащ ипэублэ гущыIэ къыщыхигъэщыгъ тиреспубликэ щызэшIуахырэ Iофыгъохэр зы­фэдэхэр ыкIи непэрэ мафэмкIэ къэралыгъом иунашъохэм адиштэу обществэм ипшъэрылъ шъхьаIэу агъэцакIэхэрэр.
Джырэ лъэхъан ныбжьыкIэ­хэм бэрэ аIукIэхэрэм ащыщых хэушъхьафыкIыгъэ дзэ операци­ем хэлажьэхэрэр. Ахэм щыIэныгъэм ыкIи цIыф зэфыщытыкIэхэм уасэу яIэр игъэкIоты­гъэу къаIуатэ.
Урысые Федерацием щаштэгъэ унашъохэм къызэрэдалъы­тэу, ежь Адыгэ Республикэми иамалхэр къызфигъэфедэхэзэ хэушъхьафыкIыгъэ дзэ операци­ем хэлажьэхэрэм, ахэм яунагъо­хэм, анахьэу сабыйхэм, щыIэныгъэм илъэныкъо зэфэшъхьаф­хэмкIэ афашIэрэр ыкIи ахэр зэрэмымакIэхэр Цэй Эдуард къыIотагъ.
— Мы аужырэ илъэсхэм ща­гъэцэкIэрэ лъэпкъ проектхэм Адыгеир чанэу ахэлажьэ. Джащ фэдэу шъолъырым щыпсэурэ цIыфхэм ящыIэкIэ-псэукIэ на­хьышIу шIыгъэным пащэхэм анаIэ тет, — къыIуагъ Цэй Эдуард.
Культурэм иунэхэмрэ тхылъ еджапIэхэмрэ лъэхъаным ди­штэрэ амалэу щыIэхэр нахь игъэкIотыгъэу агъэфедэнхэу, ныбжьыкIэхэр лъэпкъ зэфэшъхьафэу тишъолъыр щыпсэухэрэм нахь апэблагъэ фэшIыгъэхэмэ шIогъэшхо къыхьыщтэу ылъы­тагъ Адыгэ Республикэм культурэмкIэ иминистрэу Аулъэ Юрэ.
Мы лъэныкъомкIэ зэхащэрэ Iофтхьабзэхэм ыкIи зэшIуахыхэ­рэм хэшIыкI афыряIэу ныбжьыкIабэ ахэлажьэ хъугъэ. Районхэм ыкIи къалэхэм адэт культурэм иунэхэм мэфэкI мафэхэм афэгъэхьыгъэ пчыхьэзэхахьэхэр ыкIи зэIукIэхэр ащырагъэкIокIых. Ау, илъэсыкIэ еджэгъур зырагъэ­жьэжьырэм, культурэм иIофы­шIэхэм еджэн программэхэм адиштэу Iофтхьабзэхэр зэхащэнхэ фае ыкIи ащ епхыгъэ пшъэрылъхэр агъэнэфагъэх.
Зэхахьэм къыщыгущыIагъэх АР-м гъэсэныгъэмрэ шIэныгъэм­рэкIэ иминистрэ игуадзэу Артем Журавель, Адыгэ Рес­публикэм и Къэралыгъо Совет — Хасэм и НыбжьыкIэ парламент итхьаматэу Эвелина Анна­никовар, «Движение Первых» зыфиIорэм ишъолъыр къутамэ ипащэу Ованес Шекерьянц.
ЗэIукIэр къагъэбаигъ ныбжьыкIэ организациеу «Движение Первых» илIыкIохэм къагъэхьазырыгъэ сурэт ыкIи видео къэ­гъэлъэгъонхэм .
КIэухым Адыгеим и Къэралыгъо Совет — Хасэм и Тхьаматэ игуадзэу Цэй Эдуардрэ Адыгэ Республикэм культурэмкIэ иминистрэу Аулъэ Юрэрэ 2025-рэ илъэсым общественннэ пшъэрылъхэр агъэцакIэзэ чанэу ыкIи зыгу етыгъэу Iоф зышIэгъэ ныбжьыкIэхэм шъухьафтынхэр аратыжьыгъэх. Ахэм анэмыкIэу общественнэ организациехэм ялIыкIохэри къыхагъэщыгъэх.
Гъомлэшк Байзэт.