Спортым пыщагъэхэу, мы лъэныкъомкIэ гъэхъагъэ зышIырэ ныбжьы­кIэхэм Адыгеир арэгушхо. Ахэм ащыщых шъолъырым, Урысыем ащызэхащэрэ зэнэкъокъухэм чанэу ахэлэжьэхэрэ зэшхэу ЛIыхасэхэу Аланрэ Амиррэ. КIалэхэр Лъэустэнхьаблэ щэпсэух, боксым пылъых.

Спортсмен ныбжьыкIэхэр яцIыкIугъом къыщегъэжьагъэу физическэ культурэмрэ спортымрэ афэщагъэх. Илъэси 6 аныбжьэу къалэу Краснодар дэт спорт еджапIэм боксымкIэ зыщагъэсэнэу аублагъ.
Мэхьанэшхо зиIэ зэнэкъо­къоу бэмышIэу Краснодар ­щы­кIуагъэм тичIыпIэгъухэм зы­щаушэтыгъ. Къэралыгъом ишъо­лъыр зэфэшъхьафхэм къарыкIыгъэ нэбгырэ 80 фэдиз турнирым хэлэжьагъ.
Аланрэ Амиррэ текIоныгъэр къыдахыгъ, ащ ишIуагъэкIэ бжыхьэм Ростов-на-Дону щыкIощт зэнэ­къокъум хэлэжьэнхэу тикIалэ­хэм фитыныгъэ яIэ хъугъэ.
ЗэшитIур уадэгущыIэнкIэ гъэ­шIэгъоных, нэутхэх, ягъэ­хъа­гъэхэм къакIэкIогъэ ме­дальхэр, щытхъу тхылъхэр къа­гъэлъагъох. КIалэхэм зы такъикъ лые амыгъэкIодэу еджэх ыкIи спортымкIэ гъэхъа­гъэхэр ашIых.
— Зипсауныгъэ фэгумэкIы­хэрэр, зипкъышъол зыпсыхьэ­хэрэр, зицыхьэ зытелъыжьхэр ары спортым зэрипхыхэрэр. Зэщтегъэоу боксым упылъын плъэкIыщтэп. Спортым шъхьа­хынэхэр икIасэп, — еIо Алан.
Алан илъэс 16 ыныбжь, спортым гукIэ зыритыгъ, килограмм 57-м нэс къэзыщэчы­хэрэм якуп хэт.
— Спортым псауныгъэр зэригъэпытэрэр щыIэныгъэм къеушыхьаты. Пшъэрылъ шъхьа­Iэр спортым угу етыгъэу упы­лъыныр, зыгъэхьазырынхэр блэмыгъэкIынхэр ары, — къе­Iуатэ Амир.
Амир илъэс 15 ыныбжь, ыш­нахьыжъ ыуж зыкъыригъанэрэп. Спортышхом илъэгапIэхэм анэсынэу гугъэпIэшIухэр зыдиIыгъых.
Боксым уфэзыгъасэрэм мэхьанэшхо зэриIэр кIэлитIум ха­гъэунэфыкIыгъ. Ахэм янасып къыхьыгъ, тренер цIэрыIоу Ар­тем Поротиковым тефагъэх.
— Пшъэрылъ шъхьаIэу тиIэр тикIалэхэм IэпыIэгъу тафэхъуныр ары, — еIо спортсменхэм янэу Зулимэ. — Спортым пы­­щагъэхэ зыхъукIэ мыхъо-мышIа­гъэ зэрахьаныр ашъхьэ къихьащтэп, ащ фэдэ уахъти яIэщтэп. Адыгеир амалышIухэр зыIэкIэлъ шъолъыр. КIэлэцIыкIухэр, ныбжьыкIэхэр спортым хэщэгъэнхэм, щыIэкIэ-псэукIэ тэрэзым нахь зиушъомбгъуным афытегъэпсыхьэгъэ Iофтхьабзэ­хэр щызэшIуахых. Ахэр спортым пылъынхэм фэшI псэолъэ зэтегъэпсыхьагъэхэр тиIэх. КIэлэцIыкIухэм ящыIэныгъи, япсауныгъи, ящынэгъончъагъи нахьыжъхэм аIэ илъ. Охътэ лые ямыIэу, агукIэ зыфэщэ­гъэхэ лъэныкъом ахэр фэбгъэ­зэнхэ фае. КIалэхэм азыфагу илъэс илъ, ахэр ренэу зэгъусэх, спорт еджапIэми зэдэтэгъакIох. Аланрэ Амиррэ боксымкIэ гъэхъэгъэшIухэр зэрашIыщтым тыпылъ, ау анахьэу ты­наIэ зы­тетыр адыгэ шэн-ха­бзэ­хэр зэ­рахьанхэр ары. ЛIы­гъэри, напэри былымкIэ пщэфыщтхэп, ахэр кIэлэцIыкIумэ тэ ахэтлъхьан фае.
— Урысыемрэ Адыгеимрэ якъэралыгъо быракъхэр тэгъэ­быбатэх. Гъогу чыжьэ тызытехьэкIэ, Адыгэ Республикэм ибыракъ зыдэтэштэ. Спортым гъэхъагъэу щытшIыхэрэр ти­шъолъыр, тянэ-тятэхэм, тикIэлэегъаджэхэм, титренерхэм афэтэгъэхьых, — еIо Алан.
Лъэпшъыкъо Фатим.