БоксымкIэ Урысыем ичемпионат къалэу Екатеринбург щыкIуагъ. Къэралыгъом испортсмен анахь лъэшхэр мыщ хэлэжьагъэх. Адыгэ Республикэр боксер ныбжьыкIитIумэ къагъэлъэгъуагъ ыкIи ахэм нахьыжъхэм якуп апэрэу зыщаушэтыгъ.

Евгений Жоровыр килограмм 51-м нэс къэзыщэчыхэрэм якуп хэтыгъ ыкIи финалым и 1/8-м Дагъыстан илIыкIоу Расул Салиевым щыIукIагъ. Гукъау нахь мышIэми, тиспортсмен текIоныгъэр къыдихын ылъэкIыгъэп, зэнэкъокъум къыхэзыгъ. Мы спорт лъэпкъыр зыгу рихьыхэу респуб­ликэм исхэм ягугъапIэхэр зэпхыгъагъэхэр илъэс тIокI зыныбжь Мушег Баяндурян ары. Боксерым спорт еджапIэу N 3-м зыщегъасэ, килограмм 48-м нэс къэзыщэчыхэрэм якуп зыщиушэтыгъ. Къинышхо къыщымыхъоу ар финалныкъом нэсыгъ, ау ащ зыщыIукIэгъэ Московскэ хэкум щыщ Карлен Восканян къытекIуагъ, пчъагъэр — 0:5. Тиспортсмен ящэнэрэ чIыпIэр къыдихыгъ, ащ дакIоу ахъщэ шIухьафтынэу сомэ миллион къыфагъэшъошагъ.
КъэIогъэн фае 1987-рэ илъэсым къыщегъэжьагъэу Адыгеим ибоксерхэм мыщ фэдэ гъэ­хъагъэ зэрамышIыгъэр. Тиспорт­смен иджэрз медаль респуб­ликэмкIэ мэхьанэшхо зиIэ къэгъэлъэгъон. Илъэс пчъагъэхэм тренерымрэ боксерымрэ Iофы­шхоу ашIагъэм ар къыкIэкIуагъ. Адыгеим илIыкIо Урысыем ичемпионатхэм аужырэу медаль къыз­щихьыгъэр илъэс 35-м ехъукIэ узэкIэIэбэжьмэ ары.