Адыгеим икъэлэ шъхьаIэ щыпсэурэ Псэунэ Назир кушъхьэфачъэм тесэу Мыекъуапэ икIи, Псыбай нэсыгъ. Ар физкультурникым и Мафэ фигъэхьыгъ ыкIи мэзитIурэ зыфигъэхьазырыгъ.

Пчэдыжьым жьэу, сыхьатыр 4-м адэжь, кушъхьэфэчъэ къызэрыкIом тесэу Назир игъогу техьагъ. Гъогууанэр хьылъагъ, ар зэпыпчыным пае физическэ ухьазырыныгъэ дэгъу ищыкIэ­гъагъ. Назир чIыпIищмэ къа­щыу­цугъ — къутырэу Казенно-­Кужорскэм, къуаджэу Фэдз ыкIи Краснодар краим и Мостовской рай­он иихьэгъум адэжь. Кило­метри 109-рэ зэрылъ гъогууанэр сыхьати 9-рэ такъикъ 36-кIэ къы­кIугъ. А уахътэм фабэр градус 29-м нэсыщтыгъ.

Назир къызэриIуагъэмкIэ, тыгъэр къызэрэкъокIырэр, чIыпIэ дахэхэр зэрэплъэгъухэрэр, уигу­псэхэм узэраIукIэрэр зыми пэп­шIынхэ плъэкIыщтэп. Унэм уисэу, зи умышIэу ущысыным нахьи, уипсауныгъэ зыгъэпытэрэ мыщ фэдэ Iофтхьабзэхэм уахэлэжьэным мэхьанэшхо зэриIэр хегъэу­нэфыкIы. Илъэс тIокIищ зыныбжь Назир физическэ культурэм ыкIи спортым апыщагъ. ИлъэситIукIэ узэкIэIэбэжьмэ ар лъэсэу Мые­къуапэ икIи, игупсэ къуаджэу Кощ­хьаблэ нэсыгъагъ.
Гъэхъагъэу ышIыгъэхэм къащыуцунэу Назир зигъэхьазыррэп, ащ гухэлъыкIэхэр зыдиIы­гъых. Ежь зэриIоу, узекIоныр — щыIэныгъ. Ащ демыгъэштэн плъэ­кIыщтэп.