Адыгэ Республикэм терроризмэм пэшIуекIогъэнымкIэ и Комиссиерэ Оперативнэ штабымрэ зэдыряIэгъэ зэхэсыгъом шIэныгъэм и Мафэрэ мэкъэтыныр зыщыкIощт мафэмрэ щынэгъончъэу рекIокIынхэм иIофыгъохэм щатегущыIагъэх. Iофтхьабзэр зэрищагъ Адыгеим и ЛIышъхьэу КъумпIыл Мурат.

Зэхэсыгъом иIофшIэн хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, Къэралыгъо Советым — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Прокуратурэ, АР-м хэгъэгу кIоцI IофхэмкIэ и Министерствэ, Урысыем щынэ­гъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм, Урысыем и Следственнэ комитет и Следственнэ ГъэIорышIапIэу Адыгэ Республикэм щыIэм, Росгвардием и ГъэIорышIапIэу АР-м щыIэм, Урысыем ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм ыкIи нэмыкI къулыкъухэм яIэшъхьэтетхэр.
Мэкъэтыныр зыщыкIощт мафэм изыфэгъэхьазырынрэ изэхэщэнрэ ялъэхъан псэуалъэхэр ыкIи цIыфхэр жъугъэу зыщызэIукIэщтхэ чIыпIэхэр терроризмэм щыухъумэгъэнхэмкIэ Iофтхьабзэхэр нахь зэрагъэлъэшыщтхэм фэгъэхьыгъэу къэгущыIагъ АР-м хэдзынхэмкIэ и Гупчэ комиссие итхьаматэу Сэмэгу Нурбый.
2025-рэ илъэсым Iоныгъом и 14-м Мыекъопэ ыкIи Тэхъутэмыкъое районхэм янароднэ депутатхэм я Советхэм ядепутатхэм яхэдзын тедзэхэри щыIэщтых. Ахэм мандат зырыз яIэщтыр. Тэхъутэмыкъое къоджэ псэупIэм инароднэ депутатхэм я Совет идепутатхэм яхэдзын тедзэхэр щыIэщтых, ащ мандатитIу иIэщт. Хэдзынхэм чIыпIэ хэдзэкIо комиссии 10 ахэлэжьэщт, хэдзэкIо мин 14,5-рэ фэдизмэ амакъэ атын алъэкIыщт.
Мы лъэхъаным Мыекъопэ ыкIи Тэхъу­тэмыкъое районхэм яIофышIэхэм мэкъэ­тыныр зыщыкIощт унэхэр шэпхъэ гъэнэфагъэхэм адештэхэмэ ауплъэкIух. МэкъэтынымкIэ мобильнэ пунктхэри къыдалъытагъэх.
АР-м хэгъэгу кIоцI IофхэмкIэ иминистрэ игуадзэ ипшъэрылъхэр пIэлъэ гъэ­нэфагъэкIэ зыгъэцэкIэрэ Гъонэжьыкъо Адам къызэрэхигъэхъожьыгъэмкIэ, хэ­дзынхэм ялъэхъан следственнэ-оперативнэ купхэм яIофшIэни нахь агъэлъэшыщт. Мэкъэтыныр зыщыкIощт чIыпIэхэр зэкIэ ипIалъэм къыпэу ауплъэкIущтых. Мэкъэтыныр зыщыкIощт мэфэ шъыпкъэм щынэгъончъэным иамалхэр игъэкIоты­гъэу зэрахьащтых, металлодетекторхэр агъэфедэщтых.
БзэджэшIагъэхэм алъэныкъокIэ Iофхэр зыгорэкIэ нахь къэхьылъэхэмэ, Росгвардием и ГъэIорышIапIэу Адыгэ Респуб­ликэм щыIэм гъусэ къыфэхъущтых Урысыем и МВД Мыекъопэ ыкIи Тэхъу­тэмыкъое районхэмкIэ икъутамэхэм акIуачIэхэр, хэушъхьафыкIыгъэ подразделениехэм ахэтхэр.
КъумпIыл Мурат анаIэ зытыраригъэ­дзагъэхэм ащыщ а мафэхэм хьазырэу атефэу — Iоныгъом и 13-м ыкIи и 14-м — адыгэ къуаем ифестиваль Мыекъопэ районым зэрэщыкIощтыр. Ащи лъэшэу анаIэ тырагъэтын фае.
«Илъэс къэс а хъугъэ-шIагъэм хьэкIабэ къекIуалIэ ыкIи Адыгеим щыпсэухэрэри хэлажьэх. Ащ къуа­ер къэзышIыхэрэри, муниципалитетхэри, зызгъэпсэфыхэрэри ежэх ыкIи зыфагъэхьазыры. Зэхэщэн Iофыгъохэу Iофтхьабзэм хэлажьэхэрэмрэ хьакIэхэмрэ ягупсэфыныгъэ епхыгъэхэм лъэшэу анаIэ атырагъэтын, щынэгъончъэнымкIэ Iофтхьабзэхэр зэкIэ зэшIохыгъэнхэ фае. Адыгэ къуаем ифестиваль тишъолъыр анахьэу цIэрыIо зышIыхэрэм зыкIэ ащыщ, арышъ ащ изэхэщэн пшъэдэкIыжь хэлъэу тыкъекIо­лIэн фае», — къыIуагъ КъумпIыл Мурат.
Ащ нэужым АР-м гъэсэныгъэмрэ шIэныгъэмрэкIэ иминистрэ иапэрэ гуа­дзэу Пэрэныкъо Сусанэ псалъэу къышIыгъэр зыфэгъэхьыгъагъэр гъэсэныгъэ зыщарагъэгъотырэ учреждениехэу рес­публикэм итхэр илъэсыкIэ еджэгъум зэрэфэхьазырхэр ары. Гъэсэныгъэм иорганизациехэр терроризмэм щыухъу­мэгъэнхэмкIэ Iофтхьэбзэ гъэнэфагъэхэр зэрахьагъэх: зэкIэ псэуалъэхэм щынэгъончъэнымкIэ паспортхэр яIэх, инженер-техникэ амалхэмкIэ зэтегъэпсыхьагъэх, къагъэгъунэх.
Мы илъэсым гъатхэм ошIэ-дэмышIагъэ зыхэлъ тхьамыкIагъохэм ялъэхъан IофышIэхэр зэрэзекIощтхэ шIыкIэм фэгъэ­хьыгъэ егъэджэн тедзэхэр зэхащагъэх, экстремистскэ, террористическэ ыкIи техногеннэ нэшанэ зиIэ гумэкIыгъохэр къыкъокIыхэмэ, къулыкъу гъэнэфагъэхэм макъэ зэрарагъэIущт шIыкIэри къарагъэ­лъэгъугъ. ШIэныгъэм и Мафэ ипэгъокIэу терроризмэм пэуцужьыгъэнымкIэ зэрэ Урысыеу егъэджэнхэр щырекIокIынхэу агъэнэфагъ.
Терроризмэм епхыгъэ гумэкIыгъохэр къэмыгъэхъугъэнхэмкIэ Iофтхьэбзэ те­дзэу зэрахьан фаехэм афэгъэхьыгъэу къэгущыIагъ терроризмэм пэшIуекIогъэнымкIэ комиссием иаппарат ипащэу ЛIые Азэмат.
Лъэпкъ зэфэшъхьафхэм къахэкIыгъэ­хэм ыкIи дин зэмылIэужыгъохэр зылэжьхэрэм азыфагу зэмызэгъыныгъэ къимыхъухьаным, сепаратистскэ ыкIи лъэпкъ зэпэуцужь нэшанэхэр къахэмыфэнхэм апае джырэкIэ Iофхэм язытет къыщыуцугъэх. Ащ фэгъэхьыгъэу къэгущыIагъ АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуа­дзэу Константин Щербаковыр. Ащ къызэрэхигъэщыгъэмкIэ, илъэсэу икIыгъэм мы IофыгъомкIэ зэIукIэгъухэр, конференциехэр, Iэнэ хъураехэр зэхащагъэх. Ахэм нэбгырэ мини 9,5-м ехъу ахэлэ­жьагъ. Ащ нэмыкIэу хэбзэухъумэкIо къулыкъу­хэр, шIэныгъэлэжьхэр, кIэлэегъаджэхэр, лъэпкъ-культурнэ ыкIи ныбжьыкIэ организациехэр ащ хэлэжьагъэх. Мы илъэсыр къызихьагъэм къыщегъэжьагъэу респуб­ликэм икъэбарлъыгъэIэс амалхэм терроризмэмрэ экстремизмэмрэ апэшIуе­кIорэ статья 100-м ехъу къарыхьагъ.
КъумпIыл Мурат Комитетым къе­джагъ ныбжьыкIэхэр, лъэпкъ ыкIи культурнэ объединениехэм ялIыкIохэр зыхэт рес­публикэ Iофтхьэбзэ пстэуми ахэлэжьэнэу.
ИкIэухым Мыекъопэ ыкIи Тэхъутэмыкъое районхэм ямуниципальнэ комиссиехэу терроризмэм пэшIуекIогъэным фэгъэзагъэхэм ятхьаматэхэм къаIуагъэ­хэм ядэIугъэх.
Адыгэ Республикэм и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.