Урысыем иныбжьыкIэхэм яя VI-рэ Спартакиадэ къалэу Казань щыкIуагъ. Ащ икIэух едзыгъо хэлэжьагъ ыкIи щэрыонымкIэ хагъэунэфыкIырэ чIыпIэ къыщыдихыгъ Мыекъуапэ щыщ Мария Бушуевам. Урысыем изаслуженнэ тренерэу Георгий Гуляйченкэм ыгъэсэрэ пшъашъэм Адыгэ Республикэр зэнэкъокъум къыщигъэлъэгъуагъ.

Республикэм испортсменкэ ухьазырыныгъэ дэгъу зэрэIэкIэлъыр джыри зэ къыгъэшъыпкъэжьыгъ, джэрз медаль къыхьыгъ. Ащ ыпэ ишъыгъэх Липецкэ хэкум щыщ Ангелина Осташовамрэ Москва илIыкIоу Алина Лисицэрэ.
Урысыем ишъолъыр 48-мэ къарыкIыгъэ спортсменкэхэм зэнэкъо­къум зыщаушэтыгъ. Мария Бушуевам игъэхъагъэ ежь ыкIи итренер ямызакъоу, Спартакиадэм хэлэжьэгъэ Адыгеим испорт лIыкIо куп итекIоныгъ. Мыщ фэдэ Iофтхьабзэм медаль къыщыпхьыныр псынкIэп, ащ дэгъоу къеушыхьаты мы спорт лъэпкъым республикэм мэхьанэшхо зэрэщыратырэр, ащ зыфэзыгъасэхэрэр дэгъоу зэрэщагъэхьазырхэрэр. Георгий Гуляйченкэм къызэрэхигъэщыгъэмкIэ, Марие зэнэкъокъум дэгъоу зыкъыщигъэлъэгъуагъ, илъэс зэкIэлъыкIохэм Iофышхоу ышIагъэм ар изэфэхьысыжьэу ылъытагъ. Щэрыоным тапэкIи республикэм хэхъоныгъэ щишIыным типшъэшъэ ныбжьыкIэ игъэхъагъэ зэрэфэIорышIэщтыр шъолъырым испорт сообществэ илIыкIохэм хагъэунэфыкIыгъ.