ШахматхэмкIэ Адыгэ Республикэм и Федерацие зэхэщэгъэным икIэщакIоу Джыгунэ Къадырбэч ишIэжь фэгъэхьыгъэ я 23-рэ зэнэкъокъум Краснодар краим щыщ Андрей Дашко текIоныгъэр къыщыдихыгъ.

Iофтхьабзэм шахматист 21-рэ хэлэжьагъ ыкIи швейцарскэ шIыкIэм тетэу ар рагъэкIокIыгъ. Турнирым лъэныкъуакIэу къыхэхьагъэр клас­сическэхэм ачIыпIэ шахмат псынкIэхэмкIэ зызэраушэтыгъэр ары.
МэфитIурэ кIогъэ зэнэкъокъур гъэшIэгъонэу, узIэпищэу ре­кIо­кIыгъ. ТекIоныгъэр къыдэзыхыгъэр кIэух турым къыщынэфагъ. Мыекъуапэ щыщ Даниил Козленкэр блэкIыгъэ илъэсым ичемпионэу Антон Литвиновым текIуагъ. А. Литвиновым очкоуи 7 ригъэкъугъ ыкIи ятIонэрэ чIыпIэр къыдихыгъ. Андрей Дашко текIоныгъэр къыфагъэшъошагъ, аужырэ турым ар Вадим Арефьевым дешIагъ ыкIи пчъагъэр зэфэдизэу аухыгъ. А зэфэхьысыжьым ишIуагъэкIэ А. Дашко пэрытныгъэр ыубытыгъ. Адыгэ Республикэм илIыкIоу Сергей Назарьевым очкоуи 6,5-рэ ригъэкъугъ ыкIи ящэнэрэ хъугъэ.
Джыгунэ Къадырбэч ишIэжь фэгъэхьыгъэ турнирыр илъэс къэс зэхащэ ыкIи Адыгеимрэ Краснодар краимрэ шахматхэм защаушъом­бгъуным, мы спорт лъэпкъым пыщагъэхэм япчъагъэ нахьыбэ хъуным, ахэм яIэпэIэсэныгъэ хагъэхъоным афэIорышIэ. Джащ фэдэу цIыфхэм зэпхыныгъэу, ныбджэгъуныгъэу азыфагу илъыр егъэпытэ.
Зэнэкъокъум текIоныгъэр ыкIи хагъэунэфыкIырэ чIыпIэхэр къыщыдэзыхыгъэхэм кубокхэр, медальхэр ыкIи ахъщэ шIухьафтынхэр афагъэшъошагъэх. Мы спорт лъэпкъым республикэм зыщиушъом­бгъуным зиIахьышхо хэлъ Джыгунэ Къадырбэч цIыфхэм агу илъыщт, ишIэжь агъэлъэпIэщт.