Адыгеим и ЛIышъхьэу КъумпIыл Мурат республикэм иправительствэ и Унэ зэIукIэгъу щыдыриIагъ автомобиль гъогухэмкIэ Федеральнэ гъэIорышIапIэу «Черноморье» зыфиIорэм ипащэу бэмышIэу агъэнэфэгъэ Антон Летовым.

Мы зэIукIэгъум хэлэжьагъэх АР-м иминистрэхэм я Кабинет и Тхьаматэ игуадзэу Хъоткъо Хъызыр, АР-м псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэу Валерий Картамышевыр, «Черноморьем» ипащэ игуадзэу Ярослав Долинскэр.
«Урысыем и Президентэу Владимир Путиным къыгъэнэфэгъэ пшъэры­лъышхохэу непэ гъогухэм япхыгъэхэр тапашъхьэ итых. ГущыIэм пае, нахьыбэрэмкIэ ахэр зэпхыгъэхэр гъогухэм къатехъухьэрэ тхьамыкIагъохэм къакIегъэчыгъэныр, ахэр щынэгъончъэхэу ыкIи Iэрыфэгъухэу щытынхэр ары. Ащ пае ищыкIэгъэ амалхэр зэкIэ щыIэх, шIуагъэ къатэу ахэр гъэфедэгъэнхэ фае», — къыIуагъ КъумпIыл Мурат.
Антон Летовым къызэрэхигъэщыгъэм­кIэ, республикэм федеральнэ мэхьанэ зиIэ автомобиль гъогуи 4 иI, ахэм пстэумкIи зэхэубытагъэу якIыхьагъэ километрэ 223-рэ мэхъу. Гъогухэм япроцент 85-р шапхъэхэм адештэ. НепэкIэ автомобиль гъогухэу «Черноморьем» къыфэгъэзагъэхэм ащыщхэм игъэкIотыгъэ гъэцэкIэжьынхэр яшIылIэгъэнхэм ыкIи ахэм яфэIо-фашIэхэр гъэцэкIэгъэнхэм пае сомэ миллиарди 2,2-м ехъу апэIуагъахьэ. Федеральнэ гъогу 13-м япхыгъэ IофшIэнхэм язэшIохын ыкIэм фэкIо. 2024-рэ илъэсым къыщыублагъэу 2027-м нэс федеральнэ гъогухэм яшIын, ягъэцэкIэжьын ыкIи яIыгъын сомэ миллиард 24,8-рэ апэIуа­гъэхьанэу рахъухьагъ.
Автомобиль гъогоу «Бжъэдыгъухьабль — Адыгэкъал» зыфиIорэм шъолъыри 4-м нэсэу зырагъэушъомбгъун мурад яI. Ведомствэм ипащэ къыIотагъ автомобиль гъогоу «Адыгэкъал — Бжъэдыгъухьабл — Адыгэкъал — Лэбапэ — Кореновск» зыфиIорэм сомэ миллиарди 3,7-рэ фэдиз зэрэпэIухьащтым фэгъэхьыгъэ зэзэгъыныгъэм кIэтхэнхэм зызэрэфагъэ­хьазырырэм фэгъэхьыгъэу. Ари шъолъы­ри 4-м нагъэсыщт, псыхъоу Шъхьэгуащэ телъ лъэмыджми игъэкIотыгъэ гъэцэкIэжьынхэр рашIылIэщтых.
ЗэIукIэгъум хэлажьэхэрэм анахьэу анаIэ зытырагъэтыгъэр гъогоу «Краснодар — Верхнебаканский» зыфиIорэм ия 19-рэ километрэ дэжь тIоу зэтет гъогузэхэкIыпIэ щышIыгъэныр ары. Къум­пIыл Мурат джащ фэдэу анаIэ тыраригъэдзагъ хьылъэхэр, цIыфхэр зезыщэхэрэ ыкIи автомобиль псынкIэхэмкIэ гъогу­хэр Iэрыфэгъухэу щытынхэ зэрэфаем. Рес­публикэм и ЛIышъхьэ къыхигъэщыгъ промышленнэ паркэу «Инэм», джащ фэдэу Тэхъутэмыкъое районым ипредприятиехэмрэ иорганизациехэмрэ хэхъо­ныгъэ ашIынымкIэ гъогухэм стратегическэ мэхьанэ зэряIэр.
ЗэIукIэгъум хэлажьэхэрэр атегущыIагъэх блэкIыгъэ мэзи 7-м Адыгеим игъо­гухэу «Черноморьем» зифэIо-фашIэхэр ыгъэцакIэхэрэм къатехъухьэгъэ тхьамыкIагъохэм. А уахътэм къыкIоцI гъогухэм тхьамыкIэгъо 31-рэ къатехъухьагъ, илъэсхэу блэкIыгъэхэм процент 51-кIэ ар анахь макI. Автомобильхэм апкъ къикIэу хэкIодагъэхэм япчъагъи процент 60-кIэ нахь макIэ хъугъэ, фыкъоныгъэ зыфэхъугъэхэр — процент 49-кIэ. Гъогу­хэр зэрэзэтегъэпсыхьагъэхэр шапхъэхэм икъоу адимыштэу къызэрэхэкIыщтыгъэм ыпкъ къикIэу гумэкIыгъоу къатехъухьэщтыгъэхэм процент 50-кIэ къакIичыгъ.
ЗэIукIэгъум икIэухым КъумпIыл Мурат къыIуагъ рахъухьагъэхэр ыкIи проектхэу зыфежьагъэхэр шIуагъэ хэлъэу гъэцэкIагъэ хъунхэм икъоу «Черноморьем» ынаIэ зэрэтыригъэтыщтым ицыхьэ зэрэтелъыр. Республикэм и ЛIышъхьэ анахьэу анаIэ зытыраригъэдзагъэр гъогухэр, ахэм къапэIулъ чIыпIэхэр: зыгъэпсэфыпIэхэр, сатыушIыпIэхэр, гъэцэкIэжьынхэр зыщыкIохэрэр джырэ уахътэм диштэхэу щытынхэр ары.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.