Мэхьанэшхо зиIэ Iофтхьабз
«ЗэкIэ ТекIоныгъэм пай» зыфиIорэ Iофтхьабзэм къыдыхэлъытагъэу хэушъхьафыкIыгъэ дзэ операцием щыIэ дзэ медикхэм апае Народнэ фронтым сомэ миллион 600-м ехъу къыугъоигъ.
Гухэлъ гъэнэфагъэ зиIэ Iофтхьабзэр дзэ медикхэм апае Народнэ фронтым зызэхищэрэр илъэситIу хъугъэ. А уахътэм сомэ миллион 617-рэ аугъоин алъэкIыгъ. Апэ медицинэ Iэмэ-псымэхэр къащэфынхэм ахъщэр пэIуагъахьэщтыгъ, джы непэ агъэкощырэ купхэм зэхэубытагъэу ыкIи псынкIэу щынагъом щыухъумэгъэнхэмкIэ оборудованиехэр афащэфыгъэх.
ЧIыгум тетэу щынагъом щызыухъумэхэрэ автомобили 180-рэ – УАЗ-хэр, IэпыIэгъу псынкIэм имашинэхэр, «Нивэхэр», мототехникэр, квадроциклэхэр, мотоциклэхэр, медицинэ Iалъмэкъ 1500-рэ, нэмыкIыбэхэри фронтым IэкIагъэхьагъэх.
Мыхэм анэмыкIэу купхэр щынагъом щаухъумэхэзэ агъэкощынхэмкIэ автомобилым ипкъыгъо 550-рэ, джащ фэдэу ежь водительхэр къэзыухъумэхэрэ пкъыгъуи 115-рэ афащэфыгъэх.
Дзэ медикхэм медицинэ Iэмэ-псымэхэр аIэкIэзгъэхьагъэхэм ахэтыгъ Народнэ фронтым итхьаматэу, Московскэ хэкум ииммунолог шъхьаIэу, профессорэу Андрей Продеус. Ахэм яIофшIэн мэхьанэшхо зэриIэр къыхигъэщыгъ мы сэнэхьатым икъэбар дэгъоу щыгъуазэу Александр Розенбаум.
— Сятэ Хэгъэгу зэошхор окIофэ дзэ фельдшерэу Iоф ышIагъ. Орденхэр ыкIи медальхэр бэу къыфагъэшъошагъэх. ЗэуапIэм цIыф бэдэдэ къырищыжьыгъ, ящыIэныгъэ къыгъэнэжьыгъ. Ащ лъэшэу сырэгушхо, — къыIуагъ урысые орэдыIоу А. Розенбаум.
Дзэм щыIэ врачхэр мафэ къэс сыд фэдэрэ къини къымыгъащтэхэу, ящыIэныгъэ емыблэжьхэу Iоф ашIэ. Ахэм япшъэрылъыр зэуапIэм щыIэхэу уIагъэ зытещагъэ хъугъэхэр а чIэпIэм къыращыжьынхэр ыкIи госпиталым нагъэсынхэр ары. Бэрэ къыхэкIы зэуапIэм машинэшхомкIэ уекIолIэн умылъэкIэу. Ащ фэдэ зыхъукIэ, хэушъхьафыкIыгъэ къэзыухъумэхэрэ машинэ цIыкIухэмкIэ IэпыIэгъур арагъэгъоты.
— Дэгъоу къыдгурэIо мыщ фэдэ техникэр тидзэ врачхэм зэрящыкIагъэр. Щынэр зыфэдэр амышIэу ахэм дзэкIолIхэм ящыIэныгъэ мафэ къэс къагъэнэжьы, лъэшэу тарэгушхо. ДзэкIолIхэр, медикхэр тышъуигъус, — къыIуагъ Народнэ фронтым илIыкIоу Юлия Зимовам.
Угъоинхэр лъагъэкIуатэ. Народнэ фронтым иIофтхьабзэу «Дзэ медикхэм» исайтэу «Все для Победы» зыфиIорэмкIэ QR-кодымкIэ угъоинхэм шъуахэлэжьэн шъулъэкIыщт. Ахъщэу къызэIукIэрэмкIэ уIагъэ зытелъ тидзэкIолIхэр зэрэзэращэщт машинэхэр, медицинэ Iэмэ-псымэхэр ыкIи зэкIэ ящыкIагъэхэр къафащэфэщтых.