Теуцожь районымкIэ къэлэ гъэпсыкIэ зиIэ псэупIэу Лъэустэнхьаблэ дэт IэзэпIэ амбулаторием ипшъэрылъхэр ыгъэцакIэзэ Iоф ешIэ.

Ащ ипащэу Хьакъунэ Суандэ къызэрэтиIуагъэмкIэ, псауныгъэм игъэпытэн фэгъэхьыгъэ лъэпкъ проектым, къэралыгъо программэ зэфэшъхьафхэм зэрахэлажьэхэрэм ишIуагъэкIэ амалышIу­хэр аIэкIэлъ хъугъэ, аужырэ шапхъэхэм адиштэрэ Iэмэ-псымакIэхэмкIэ сыма­джэхэм яIазэх, япсауныгъэ зэтырагъэуцожьы. Мы мафэхэм IэзапIэм теблэ­гъагъ, пащэм гущыIэгъу тыфэхъугъ.
— ЦIыфым анахь лъапIэу иIэр ипсауныгъ, ар бэкIэ зыIэ илъ врачхэм зэрифэшъуашэу япшъэрылъхэр агъэцэкIэнхэм мэхьанэшхо иI. IэзэпIэ амбулаторием медицинэ IофшIэнхэр чанэу щызэшIотэхых, диспансеризациери игъэкIотыгъэу щэкIо. Къэралыгъом ащ мэхьанэшхо зэрэритырэр къыдэтлъытэзэ псауныгъэм къыщымыкIэным фэшI ищыкIэгъэ уплъэкIунхэр игъом зэхэтэщэх. Терапевтхэм анэмыкIэу урологыр, эндокринологыр, офтальмологыр, неврологыр, кардиологыр ыкIи нэмыкI специалистхэр IэзапIэм къетэгъэблагъэх.
Терапевтхэу Хьакъунэ Суандэрэ Жэ­нэлI Дианэрэ сымаджэм илажьэ псынкIэу къыхагъэщын алъэкIы, къяуалIэхэрэм апэрэ IэпыIэгъур арагъэгъоты. Зы та­къикъ лые амыгъэкIодэу яIофшIэн зэхащэныр япшъэрылъ шъхьаIэу алъытэ.

— ШIоигъоныгъэ зиIэхэм вакцинэ зэфэшъхьафхэр IэзапIэм ащыхэтэлъхьэ. ЯщыкIэгъэщтыр икъу фэдизэу тиI. Зыныбжь илъэс 18-м нэсыгъэу шIоигъоныгъэ зиIэ пстэури прививкэ тэшIых. IэзапIэм къекIолIагъэр ыпэрапшIэу терапевтхэм ауплъэкIу, пэрыохъу щымыIэ хъумэ, прививкэр хэтэлъхьэ.
ЦIыфхэр япсауныгъэ изытет нахь лъыплъэхэ хъугъэ. КъытэолIэгъэ сыма­джэр зыгъэгумэкIырэ узым зэрэпэшIуе­кIощтым, ар нэужым къемыузыжьыным иамалхэм ащытэгъэгъуазэ. Къахэдгъэщырэ узхэм ялъытыгъэу IэпыIэгъу зыщагъотыщт чIыпIэхэм тэгъакIох, — къе­Iуатэ IэзапIэм ипащэ.
Врач-педиатрэу Оксана Яченкэр иIофшIэн фэшъыпкъ. КIэлэцIыкIухэм зэряIазэрэм дакIоу, ахэм гущыIэгъу афэхъу. Врач къодыеу щымытэу, цIыфыгъэрэ гукIэгъурэ хэлъэу иIофшIэн къекIуалIэ. УпчIэ е лъэIу иIэу зыгорэ къыфытеуагъэми, ащ икъэбар нэужым зэрегъэшIэжьы.
— КIэлэцIыкIухэм япсауныгъэ икъэу­хъумэн анахь пшъэрылъ шъхьаI, лIэужыкIэр хэгъэгум инеущрэ маф. Сымаджэм ищыкIэгъэ фэIо-фашIэр игъом фэбгъэца­кIэу, ащ уишIуагъэ ебгъэкIымэ, уиIофшIэн гухахъо хэогъуатэ. КIэлэцIыкIур ныбжь зиIэм фэдэп, узырэр тэрэзэу къыIошъу­рэп. Ащ ипсауныгъэ пIэ зэрилъыр зызэхапшIэрэм пшъэдэкIыжьэу уиIэри къыбгурыIощт, — еIо Оксанэ.
Гинекологэу Наныжъ Суандэ бзылъфыгъэ узхэм яIэзэгъэнымкIэ пшъэрылъ къиныр зэшIуехы.
— Бзылъфыгъэмэ IэпыIэгъу сызэрафэхъурэм гухахъо хэсэгъуатэ. Сыда пIомэ, узэряIазэрэм икIэух, уишIуагъэ зэрякIыгъэр охътэ кIэкIым къэлъагъо. ЕтIанэ, къыздэхъугъэм сыкъыщыуцурэп, зэпымыоу сишIэныгъэхэм ахэзгъэхъоным ыуж сит. Узи-диагностикэр нахь куоу згъэфедэным зыфэзгъасэмэ сшIоигъу, — къыIуагъ врачым.
IэзэпIэ амбулаторием врач-стоматологэу Хъуажъ Рустам щэлажьэ. Апшъэ­рэ еджапIэм щигъотыгъэ гъэсэныгъэм ар къыщыуцурэп, зэпымыоу еджэ, ишIэ­ныгъэхэм ахегъахъо. Цэм еIэзэнымкIэ шэпхъэ гъэнэфагъэхэр егъэфедэх.
Медсестрахэм, санитархэм гукIэгъу ахэлъэу мэхьанэшхо зиIэ IофшIэн мы­псынкIэр агъэцакIэ.
— ТиIофшIэн тапэкIи нахь дэгъоу зэхэщэгъэным, джырэ уахътэм диштэрэ амалхэр гъэфедэгъэнхэм, врачхэм яIэпэIэсэныгъэ хагъэхъоным тыдэлэжьэщт. ЦIыфхэм ядиспансеризацие игъом дгъэ­цэкIэщт. Уипсауныгъэ изытет зыпкъ итми, усымаджэми, узфэсакъыжьын зэрэфаер пстэуми агурызгъаIомэ сшIоигъу. ЦIыфым ежь къытефэрэр ыгъэцакIэмэ, узыбэмэ защиухъумэн ылъэ­кIыщт, — хигъэунэфыкIыгъ Хьакъунэ Суандэ.
Лъэпшъыкъо Фатим.