ШIушIэ Iофтхьабзэхэм язэхэщэн Лъэустэнхьаблэ чанэу щагъэцакIэ. Народнэ фронтым епхыгъэ гуфэкIо купэу «Гуманитарка СВО» зыфиIорэм ипащэу Ирина Капустянаям мы мафэхэм зыIудгъэкIагъ, анахьэу анаIэ зытырагъэтырэ лъэныкъохэр къытфиIотагъ.

Дзэ операцием хэлажьэхэрэм зэрэ Хэгъэгоу адэIэпыIэ. Народнэ фронтымрэ гуфэкIо организациехэмрэ зэгъусэхэу а шIушIэ Iофтхьабзэхэр зэхащэх. Къэралыгъом ишъолъырыкIэхэм ащыпсэухэрэм ыкIи хэушъхьафыкIыгъэ дзэ операцием хэлажьэхэрэм лъэныкъо зэфэшъхьафхэмкIэ IэпыIэгъу аратыным купыр дэлажьэ. Мыщ тегъэпсыхьагъэу Iэзэгъу уцхэр, псэолъапхъэхэр ыкIи гъомылэпхъэ зэфэшъхьафхэр зыхахьэхэрэр дзэкъулыкъу­шIэхэм афатIупщых.
— 2023-рэ илъэсым гуфэкIо купыр зэхэсщагъ. Сишъхьэгъусэу Дмитрий дзэ сэнэхьатым илъэс 22-рэ фэлэжьагъ, пенсием зэкIом ыуж хэушъхьафыкIыгъэ дзэ операцием хэлэжьэнэу зэзэгъыныгъэм кIэтхагъ. Сэ къыззнэсым дзэкIолIхэм тиIэпыIэгъу зэрящыкIагъэр къызгуры­Iуагъ. ГуфэкIо купыр зыщылэжьэщт унэр къытитыгъ Лъэустэнхьэблэ къэлэ псэупIэм ипащэу КIыкI Аскэр. Ащ ынаIэ лъэшэу къыттет. ШIушIэ IэпыIэгъоу ящыкIагъэр игъом алъыгъэIэсыгъэнымкIэ ыкIи транспортым епхыгъэ Iофыгъохэр зэшIохыгъэн­хэмкIэ ишIогъэшхо къытегъэкIы, — къе­Iуатэ Иринэ.
Бзылъфыгъэу купым хэтхэм мафэ къэс хъытыухэр ахъых, письмэхэр, унэгъо шхынхэр ыкIи нэмыкIхэр хэушъхьафыкIыгъэ дзэ операцием хэлажьэхэрэм алъагъэIэсынхэмкIэ Iофтхьабзэхэр зэшIуа­хых. ТидзэкIолIхэмкIэ ащ фэдэ IэпыIэгъум мэхьанэшхо зэриIэр Иринэ хегъэунэ­фыкIы.
— Илъэс зэкIэлъыкIохэм афэтщагъэр зэкIэ къэпчъы­гъуай. ТидзэкIолIхэм ящыкIэгъэ пкъыгъохэр къэтэугъоих ыкIи аIэкIэтэгъахьэх. ЗэкIэ ТекIоныгъэм ыкIи тидзэкIолIхэм апай зыфатшIэрэр,— еIо Иринэ.

ТидзэкIолIхэр зыдэщыIэ лъэныкъо пстэуми ахэр анэсых: Херсон ыкIи Запорожскэ хэкухэм, Луганскэ ыкIи Донецкэ народнэ республикэхэм. IэпыIэ­гъур аугъоиным ыпэкIэ дзэкъулыкъушIэхэм ящыкIагъэр Иринэ зэрегъашIэ, угъоиным псэупIэм дэсхэр зэкIэ къыхэлажьэх.
Иринэ ишъхьэгъусэу Дмитрий илъэс 41-рэ ыныбжь, илъэситIурэ взводым икомандирэу хэушъхьафыкIыгъэ дзэ операцием хэлэжьагъ, ау джы уIагъэ телъэу еIазэх. Ащ гугъэпIэшIухэр иIэх, зигъэхъужьынышъ, къулыкъур лъигъэ­кIотэнэу.
Иринэ Донецкэ Народнэ Республикэм ежь имашинэкIэ макIо, ишъхьэгъусэ къулыкъур зыщихьырэ частым идзэ­кIолIхэм яшъхьэгъусэхэр зэхищагъэхэу телефонымкIэ адэгущыIэ. Ежь фэдэу зишъхьэгъусэ е зигупсэ дзэ операцием кIуагъэхэр купым къыхэхьагъэх. Ахэр Урысыем ичIыпIэ зэфэшъхьафхэм ащэпсэух, зэкъотых, зэдэIэпыIэжьых.
— Къэралыгъор чIыпIэ къин зеуцом, ащ щыпсэухэрэр зэрэзэкъохьагъэхэм лъэшэу тегъэгушIо, узэдеIэжьын фае. ТкIуачIэ зэхэлъымэ — тылъэш! Тидзэ­кIолIхэр кIымэфэ лъэхъаным фэхьазырынхэм фэшI ящыкIэгъэ зыгъэфэбэщтхэ пкъыгъохэр, чIэгъ-чIэлъ фабэхэр, окоп шэф остыгъэхэр къафэтщэфынхэ фае. Непэ ахэм анахьэу ящыкIагъэр тынаIэ атетыныр ыкIи тадэIэпыIэныр ары. Ашхыщтым дзэкIолIхэр щыкIэхэрэп, ау тызэрафэгумэкIырэр, тызэряжэрэр зэрыт письмэхэр, кIэлэцIыкIу сурэтшIыгъэхэр заIукIэхэкIэ, лъэшэу агу къыдещае, — хегъэунэфыкIы Иринэ.
ЩыIэх цIыфхэр дунаим щыхъурэ- щышIэрэм ыгъэгумэкIыхэу, уямылъэIугъэ­ми, гузэжъогъу хэфагъэхэм IэпыIэгъу афэхъухэу, амалэу яIэмкIэ шIушIэныр зигъогогъухэр. Ахэм ащыщ гумызэгъэ бзылъфыгъэу, сабыищмэ янэу, гукIэгъум­рэ IэпыIэгъумрэ ыпэ изыгъэшъырэ Иринэ.
Лъэпшъыкъо Фатим.