Гъэмафэр ыкIэм фэкIо. Бжыхьэ-кIымэфэ лъэхъаным ехъулIэу гъэфэбапIэхэм, ахэм ярыкIуапIэхэм ягъэхьа­зырын епхыгъэ IофшIэнхэр зэшIуахых. Мыекъуапэ дэт фэтэрыбэ хъурэ унэхэр зауплъэкIухэрэр мэзэ заулэ хъугъэ. Гъэфэбэгъу уахътэр заухыгъэ гъатхэм щыублагъэу ахэм уплъэкIун-гъэцэкIэжьын Iофтхьабзэхэр ащыкIуагъэх.

— КIымэфэ лъэхъаным котельнэхэм зэпымыоу Iоф ашIэным пае шапхъэхэм адиштэрэ Iоф­тхьабзэхэр зэхэщэгъагъэх, фэтэрыбэ хъурэ унэхэм псы фабэр ащаубытын фаеу хъугъэ. Жъы хъугъэ гъэфэбапIэхэр, псыры­кIуапIэхэр зэблятэгъэхъух, — хигъэунэфыкIыгъ Мыекъо­пэ къэлэ администрацием ипащэу Геннадий Митрофановым.
Псэуалъэхэм яшIын ыкIи псэупIэ фондым игъэфедэн гъунэ алъызыфырэ Къэралыгъо инспекцием и ГъэIорышIапIэ ипащэу Илона Кравцовам къызэриIуагъэмкIэ, псэупIэ-коммунальнэ хъыз­мэтыр, джащ фэдэу социальнэ мэхьанэ зиIэ псэуалъэхэр гъэфэбэгъу лъэхъаным фэгъэхьазырыгъэнхэмкIэ ыкIи ахэр хьазыр зэрэхъугъэхэм игъэу­нэфынкIэ шэпхъакIэхэр гъэтхапэм и 1-м 2025-рэ илъэсым аштагъэх.
Бжыхьэ-кIымэфэ лъэхъаным псэуалъэ­хэр гъэфэбагъэ зэрэхъущтхэмкIэ узшIокIын умылъэкIыщт шапхъэхэр УФ-м энергетикэмкIэ и Министерствэ къыгъэ­нэфагъэх.

— ЧIыпIэ зыгъэIорышIэжьыпIэхэр, фабэм икъэтын фэгъэзэгъэ къулыкъу­хэр, гъэIорышIэкIо организациехэр мы шэпхъа­кIэхэм арыгъозэнхэ фае. Аужырэ гъэфэбэгъу лъэхъанищыр зэрэрахыгъэм изэфэхьысыжьхэр, чIыопсым изытет зыфэдагъэр ыкIи хъызмэтшIапIэхэр ащ елъытыгъэу зэрэлажьэщты­гъэхэр, гъэфэбапIэхэр къызэ­теуцохэу къызщыхэкIыгъэхэр, ахэр зыпкъ къикIыгъэхэр, ежьхэм хэушъхьафыкIыгъэ шапхъэу апылъхэри къыдалъытэзэ тапэкIэ Iоф зэрашIэщтыр агъэ­нэфэн фае, — къыIотагъ Илона Кравцовам.
Щынэгъончъэным ишапхъэхэр гъэцэкIэгъэнхэм гъэIорышIэкIо компаниехэм гъунэ лъафын фае. Джащ фэдэу гъэ­фэбэгъу уахътэм ехъулIэу чIыфэхэр атемылъынхэм, псэупIэ фондым игъэфедэнкIэ техническэ шапхъэу щыIэхэм аблэмыкIынхэм алъыплъэнхэ фае.
ПсэупIэ-коммунальнэ хъызмэтым ипсэуалъэхэр бжыхьэ-кIымэфэ лъэхъаным зэрэфэхьазырхэр къэзыушыхьатыхэрэр: псэупIэр кIымафэм зэрэфэхьазырыр зэрытхэгъэ паспортыр; щынэгъон­чъэнымкIэ автоматикэм ыкIи псэуалъэ­хэм якотельнэхэм, инженернэ Iэмэ- псымэхэм Iоф зэрашIэрэр зыуплъэкIурэ, къэзылъытэрэ пкъыгъохэр тэрэзэу зэрэлажьэхэрэм афэгъэхьыгъэ актхэр; фэтэрхэр ыкIи унэхэр кIымафэм икъоу зэрэфэхьазырхэр къэзыушыхьатырэ тхылъхэр; псы чъыIэм ыкIи псы фабэм якъэкIуапIэхэм тэрэзэу Iоф зэрашIэрэм яушэтынхэм язэфэхьысыжьхэр.
А пстэум хэушъхьафыкIыгъэ комиссиер хэплъэ. Бжыхьэ-кIымэфэ лъэхъаным зэрэфэхьазырхэр къэзыушыхьатырэ тхылъыр зэрамытыгъэхэм къафагъэнэ­фэгъэ уахътэм ехъулIэу амышIагъэу къэнагъэхэр агъэцэкIэнхэ фае. Шапхъэ­хэр зыукъохэрэм административнэ пшъэдэкIыжь арагъэхьыщт, тазыр атыралъхьащт.
Фабэр къэзытырэ организацииплI Мыекъуап дэт: Iахьзэхэлъ обществэу «АТЭК-м» икъутамэу «Майкопские тепловые сети» зыфиIорэр, пшъэдэкIыжьэу ахьырэмкIэ гъунэпкъэ гъэнэфагъэ зиIэ обществэхэу «Картонтара», «Кубаньтеплоинженеринг» ыкIи «ИКС» зыфи­Iохэрэр. Апэрэ хъызмэтшIапIэм икотельнэ 44-рэ игупчэ гъэфэбэпIэ 17-рэ бжыхьэ-кIымэфэ лъэхъаным фэхьазырых. Адрэхэм гъэхьазырын IофшIэнхэр джыри ащэкIох.
— Къулыкъу пэпчъ ипшъэдэ­кIыжь къыгурыIоу ищыкIэгъэ пстэури зигъэцакIэкIэ, кIымафэм цIыфхэм яунэхэр фэбэщтых, — хигъэунэфыкIыгъ Геннадий Митрофановым.
Александра Балабась.