КIэлэцIыкIу журналэу «Жъо­гъобыныр» 1988-рэ илъэсым къыщегъэжьагъэу къыдэкIы. Журналым хэпшIыкIэу зи­штагъ, хэ­хъуагъ.

Къыдэхьэрэ материал пэпчъ зы гу­пшысэ цIыкIу телъытагъ: ти Адыгей ичIыопс зыфэди, тиреспубликэ икIэлэцIыкIу IыгъыпIэхэм ыкIи ублэпIэ еджапIэхэм нахь афэгъэзэгъэ тхыгъэхэри, усакIохэм ыкIи тхакIохэм ятхыгъэ мыинхэри, кIэлэцIыкIухэм, кIэлэегъа­джэхэм, шIэныгъэлэжьхэм ятхыгъэхэу пIуныгъэ-гъэсэныгъэ мэхьанэ зиIэхэри мыщ къыдэхьэх.
2025-рэ илъэсымкIэ «Жъогъобыным» иятIонэрэ чэзыу бэмышIэу къыдэкIыгъ. Ар ТекIоныгъэшхор къызыдахыгъэр илъэс 80 зэрэхъугъэм фэгъэхьыгъ. «Жъогъобыным» ыкIышъо зэфэдэкIэ мы мэфэкIышхор кIигъэтхъэу гъэпсыгъэ. Зэо мэшIо плъырым хэтыгъэ дзэкIолI уIагъэхэр, медсестрахэр, ошъогум щыгъогъорэ самолетхэр — зэо сурэт пычыгъу.
Журнал кIышъом тетэлъагъо лIэу­жыкIэм исабыеу илъэси 5 — 6 зы­ныбжьыр, дзэ шъуашэр фэшIоу щыгъ, IогушIукIы, гвоздикэ Iэрамышхор пытэу ыIыгъ, мамырзехьэ бзыу тхьаркъо фыжьри гушIогъо мыухыжьым инэпэеплъ, нэкIубгъор мэфэкI мэшIошIэтымкIэ зэлъыпкIагъ…
Ары. ТекIоныгъэшхор къызыдахыгъэр илъэс 80 хъугъэ, къэрэмыхъужь ныбжьи ащ фэдэ хьазаб гуих, сыд фэдэрэ зауи нэлат етэхы, мамырныгъэм шъхьащэ фэтэшIы.
«Жъогъобыныр» сыдигъуи дахэу зэгъэкIугъэ, уцIыкIуми уиными узы­лъещэ.
КIэлэцIыкIу журналым иредактор шъхьаIэр — МэщбэшIэ Исхьакъ.
Редакторыр — Дзыбэ Назрэт.
КъыдэгъэкIакIохэми кIэлэцIыкIухэми творческэ гухахъокIэ тафэлъаIо.
Мамырыкъо Нуриет.