Адыгеим икомандэу «АГУ-Адыифыр» къэралыгъом ичемпионат изыфэгъэхьазырын къыдыхэлъытагъэу Ростов-на-Дону щыкIорэ турнирым хэлажьэ.

Ростов хэкум и Губернатор и Кубок икъыдэхын Мыекъуапэ илIыкIохэм ямызакъоу, командэхэу «Ростов-Дон», «Звезда», «Черноморочка» ыкIи «Астраханочка» зыфиIохэрэр фэбанэх. Командэхэр зырызэ зэIукIэщтых, зэфэхьысыжьхэм ялъытыгъэу ха­гъэунэфыкIырэ чIыпIэхэр къы­дэзыхыгъэхэр къэнэфэщтых.
Апэрэ зэIукIэгъур «АГУ-Адыифым» «Ростов-Доным» дыриIагъ. Апэрэ такъикъхэм къаще­гъэжьагъэу ростовчанкэхэм ешIэ­кIэ лъэш къагъэлъэгъуагъ, мы спорт лъэпкъыр зыгу рихьэу къэзэрэугъоигъэ­хэр бысымхэм Iэпы­Iэгъушхо къафэхъугъэх. Анахьэу къахэщыгъэр Кристина Кожокарь, мы гандболисткэм гъогогъуи 9-рэ къэлапчъэм Iэгуаор дидзагъ. «Ростов-Доным» апэрэ кIэ­лъэныкъор 25:14-у ыхьыгъ.
ЯтIонэрэ таймым «АГУ-Адыифыр» нахь лъэшэу ешIагъ. Апэрэ едзыгъом елъытыгъэмэ, бысымхэм къэлапчъэм Iэгуаоу да­дзагъэр фэдитIукIэ нахь макI. КъэлэпчъэIутэу Анастасия Казьменкэр цыхьэшIэгъоу джэгугъэ, Iэгоо 24-у къадзыгъэм щыщэу 11-р къызэкIидзэжьыгъ. Пчъагъэр 37:27-у зэIукIэгъур аухыгъ.

ЯтIонэрэ ешIэгъум тикомандэ зыIукIагъэр «Астраханочкэр» ары. Типшъашъэхэм текIоныгъэр къыдахыным пэблэгъагъэх. КомандитIуми ухьазырыныгъэ дэгъу къагъэлъэгъуагъ, апэрэ таймым къэлапчъэм Iэгоо 37-рэ дадзагъ (а пчъагъэм щыщэу 19-р Аст­рахань испортсменкэхэм). ЯтIо­нэрэ едзыгъор пчъагъэр зэфэдизэу аухыгъ ыкIи 36:35-у «Аст­раханочкэм» текIоныгъэр къыдихыгъ. «АГУ-Адыифым» джыри зэIукIэгъуищ иIэщт.