Адыгеим и ЛIышъхьэу КъумпIыл Мурат зэрищэгъэ зэIукIэр зыфэгъэхьыгъагъэр Краснодар псыIыгъыпIэм и Гъогу картэ къыдилъытэрэ Iофтхьабзэхэр зыпкъ итэу зэшIохыгъэнхэр ары.

ЗэIукIэм иIофшIэн хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, министрэхэм я Кабинет и Тхьаматэ игуадзэхэу ЛIыхэсэ Махьмудэрэ Хъоткъо Хъызыррэ, АР-м мэкъу-мэщымкIэ иминистрэу Къуанэ Анзаур, АР-м тыкъэзыуцухьэрэ дунаимкIэ ыкIи чIыопс къэкIуапIэхэмкIэ и Гъэ­IорышIапIэ ипащэу Сергей Колесниковыр.
Ахэм анэмыкIэу зэIукIэм къекIолIагъэх псы-хъызмэт Iоф­шIэнхэмкIэ программэхэр пхырыщыгъэнхэм фэгъэзэгъэ Гъэ­IорышIапIэу «Росводресурсхэм» япащэу Василий Борисенкэр, федеральнэ бюджет учреждениеу «Центррегионводхоз» зыфиIорэм ипащэу Шамиль Магомедовыр, Пшызэ псыIыгъы­пIэм ипащэ ипшъэрылъхэр зыгъэцэкIэрэ Владимир Блохиныр, Федеральнэ къэралыгъо бюджет учреждениеу «Адыгея­мелиоводхозым» ипащэ ипшъэ­рылъхэр зыгъэцэкIэрэ Сергей Карпенкэр, Краснодар краим осетрэ пцэжъые лъэпкъым икъэ­ухъумэнкIэ и Гупчэу «Кубаньбиоресурсым» иIэшъхьэтетэу Михаил Чебановыр, Федеральнэ бюджет учреждениеу «Центр­регионводхоз» зыфиIорэм иподразделениехэм япащэхэр. ПэIудзыгъэ шIыкIэм тетэу зэ­Iу­кIэм хэлэжьагъэх Адыгэкъалэ, Красногвардейскэ ыкIи Теуцожь районхэм япащэхэр.
Адыгеим и ЛIышъхьэу КъумпIыл Муратрэ псыкъэкIуапIэхэмкIэ Федеральнэ агентствэм ипащэу Дмитрий Кирилловымрэ дэкIыгъо зэIукIэгъоу Красно­гвардейскэ районым щызэдыряIагъэм пыдзагъэу мы зэIукIэр щытыгъ. ДэкIыгъо зэIукIэгъум илъэхъан зытегущыIэгъагъэхэр псыр къызэрэдэкIырэм цIыфхэр ыкIи чIыпIэхэр щыухъумэгъэнхэмкIэ Iофтхьабзэу зехьэгъэн фаехэр ары.

ЗэдашIыгъэгъэ зэзэгъыныгъэхэм атетэу Гъогу картэр аухэсыгъагъ. Ащ кIэтхэжьыгъагъэх Урысые Федерацием мэкъу-мэщымкIэ и Министерствэ, агентствэу «Росводресурсы» зыфиIорэм, АР-м иминистрэхэм я Кабинет ялIыкIохэр. А документым Краснодар псыIыгъыпIэр зыпкъ игъэуцожьыгъэным фытегъэпсы­хьэгъэ Iофтхьабзэхэм язэшIохынкIэ шIэгъэн фаехэр къыщеIох.
«Гъогу картэм тегъэпсыхьагъэу Краснодар псыIыгъыпIэм изытет нахьышIу шIыгъэным ыкIи псэу ащ къытырэр нахьыбэ хъуным апае Iоф­тхьабзэхэр дгъэнэфагъэх. А Iоф­тхьабзэхэр лъэныкъо заулэу зэтеутыгъэх. Пстэуми апэу псыIыгъы­пIэм ичIыпIэ заулэхэм ащызэтырихьэгъэ уцыжъхэр, пхъэжъ­хэр ахэукъэбзыкIыгъэнхэм епхыгъэ Iофтхьабзэхэр ары. Ащ нэмыкIэу, псым икууагъэ метри 2-м нахь зыщымакIэм укъэбзын Iофхэр ащызэшIохыгъэнхэ фае», — къы­Iуагъ «Росводресурсхэр» зыфиIо­рэм ипрограммэхэм яихъухьанкIэ ыкIи ягъэцэкIэнкIэ ГъэIорышIапIэм ипащэу Василий Борисенкэм.

Гъунэпкъэ гъэнэфагъэу щыIэм тегъэ­псыхьагъэу щынэгъончъэу псыр IыгъыпIэм игъэхъогъэным пае гидротехническэ псэуалъэхэри зыпкъ игъэуцожьыгъэн­хэ, дамбэхэм ягъэцэкIэжьын лъыплъэнхэ, псыхъохэм адэт псыр укъэбзыгъэн фае.
2030-рэ илъэсым нэс Iофтхьабзэу зэшIуахын фаехэм ащигъэгъозагъэх федеральнэ бюджет учреждениеу «Центр-­регионводхоз» зыфиIорэм и ГъэIорышIапIэ ипащэу Николай Пакусиным. Илъэс къэс, мы илъэсэу тызхэтым къы­щегъэжьагъэу, псыIыгъыпIэм къыхиубытэрэ гектари 145-рэ фэдиз аукъэ­бзызэ ашIыщт, хэкIэу ащызэтырихьа­гъэм епхыгъэ IофшIэнхэри гъэцэкIэгъэнхэ фаеу хъущт. 2026-рэ илъэсым къыщегъэжьагъэу нэпкъхэри аукъэбзыщтых. Метри 2-м нахь щэндж чIыпIэхэр нахь куу ашIынхэ фаеу хъущт. ПстэумкIи псыIыгъыпIэм щызэтырихьэгъэ хьажъ-быжъ, етIэ сае кубометрэ миллиони 9 фэдиз къыхахынэу ары.
«ПсыIыгъыпIэр укъэбзыгъэнымкIэ рахъухьэрэ IофшIэнхэр щыIэныгъэм щыпхырыщыгъэнхэм пае чIыпIэ зыгъэIорышIэжьыным икъулыкъухэми яеплъыкIэ зэрагъэшIэн, къыдалъы­тэн фае. ПсыIыгъыпIэм ыубытырэ чIыпIэм ипшIэнибгъу фэдизыр рес­публикэм ичIыгу щыщ. Гъогу кар­тэм игъэцэкIэн зызэшIуахыкIэ, къы­пэIулъ чIыпIэхэм псыр акIэмыоным, цIыфхэм зэрар афэмыхъунхэм, нэмыкIхэм япхыгъэ гумэкIыгъохэр дэгъэзыжьыгъэнхэ фае. Пынджлэжь хъызмэтшIапIэхэмрэ пцэ­жъы­ехэр зыщахъухэрэ заводхэмрэ яфедэхэр къыдалъытэнхэ фае», — къыхигъэщыгъ АР-м и ЛIышъхьэу КъумпIыл Мурат.
ИкIэухым Адыгеим и ЛIышъхьэ чIыпIэхэм япащэхэм ыкIи а Iофым фэгъэзэгъэ къулыкъухэм пшъэрылъ афишIыгъ анахьэу Iофтхьэбзабэ зыщызэшIуахын фэе чIыпIэхэмкIэ яеплъыкIэхэр къагъэ­хьазырынхэу ыкIи къаIэкIагъэхьанхэу, Гъогу картэм игъэцэкIэнкIэ «Росводресурсхэм» якъутамэхэм ренэу зэдэлэжьэныгъэ-гъусэныгъэ адыряIэнэу.

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.