Адыгэ къэралыгъо университетым истудентхэм якомандэ урысые проектэу «Энергетикэм хэхъоныгъэ егъэшIыгъэным иныбжьыкIэ екIолIакI» зыфиIорэм икIэух уцугъо нэсыгъ.

АКъУ-м цифрэ технологиехэмкIэ ыкIи наукэ гъэнэфагъэхэмкIэ и Институт икомандэ студенческэ гъэIорышIэнымкIэ командэ анахь дэгъуипшIымэ ахэхьагъ. Финалыр шышъхьэIум и 27 — 28-м рагъэкIокIыщт, тикомандэ проектэу «Ин­­­теллектуальные энергетические системы с активно-адаптивной сетью» зыфиIорэм лъэтегъэуцо къыфишIыщт.
Энергетикэм хэхъоныгъэ егъэшIыгъэ­ным иныбжьыкIэ игъэкIотыгъэ прогноз 2017-рэ илъэсым къыщыублагъэу агъэцакIэ. Инженер-техническэ гъэсэныгъэм зегъэушъомбгъугъэным, технологиякIэ­хэм, атомнэ промышленностым, фэ­шъхьаф лъэныкъохэм ар афэIорышIэ.
Мыгъэ мы проектым сэнэхьатым фытегъэпсыхьэгъэ студент 660-у илъэс 25-м нэс зыныбжьыхэр, ТЭК-м ыкIи МСК-м яспециалист ныбжьыкIэхэу ­илъэс 35-м нэсыгъэхэр къыугъоигъэх. Урысые ыкIи дунэе энергетикэм япхыгъэ темэхэмкIэ нэбгыри 10 — 15 зыхэт командэхэр къыхахыгъагъэх. Отраслэм 2035-рэ илъэсым нэс хэхъоныгъэ егъэшIыгъэ­ным истратегие фэгъэхьыгъэ проектхэу зэнэкъокъум хэлажьэрэмэ зэхагъэуцуа­гъэхэм эксперт комиссиер ахэплъагъ. Лъэныкъохэу «Студентхэр» ыкIи «Спе­циалист ныбжьыкIэхэр» зыфиIохэрэмкIэ командэ пшIырыпшIхэр къыхахыгъ.
Адыгэ къэралыгъо университетым икомандэу «Чэтэн плъыжьхэр» зы- цIэр ары къыхэхын едзыгъом хэлэжьагъэр, ащ хэтыгъэх «Искусственнэ интеллектым итехнологиехэр» зыфиIорэ программэмкIэ еджэрэ студентхэр. Командэм хэхьагъэх: Александр Раковыр, Михаил Погореловыр, Денис Ртищевыр, Вадим Бушмановыр, Владимир Клименкэр, Дмитрий Синеок, Сергей Масловыр, Максим Михайловскэр, Алексей Михайловыр, Егор Синявиныр, Данил Никотиныр ыкIи Эммануил Иваненкэр. Проектэу «Интеллектуальные энергетические системы с активно-адап­тивной сетью» зыфиIорэр къагъэ­лъэ­гъуагъ. Инженер-ушэтакIоу Стефан Они­щенкэр командэм игъэсакIоу щы-
­тыгъ, экспертыр — техническэ шIэныгъэхэмкIэ кандидатэу Павел Бучацкэр.
АКъУ-м икомандэ ыгъэхьазырыгъэ сценариемкIэ, Урысыем иэнергетикэ исистемэ игъорыгъоу хэхъоныгъэхэр ышIынхэ ылъэкIыщт, къэралыгъомрэ энергетическэ компание инхэмрэ яшIоигъоныгъэхэр ащ къыщыдэлъытэгъэщтых.
Проектхэр къызэраухъумагъэхэм елъытыгъэу текIоныгъэ къыдэзыхыгъэ командищмэ амал агъоты профильнэ министерствэхэм ыкIи къулыкъухэм япхыгъэ компаниехэм зэхэт прогноз-
хэр афашIынхэу. Ар щыхагъэунэфыкIыщт Дунэе форумэу «Урысые энер­гетическэ тхьамаф» зыфиIоу Москва щыкIощтым, ащ ныбжьыкIэхэм я Мафэ 2025-рэ илъэсым ичъэпыогъу мазэ и 17-м щырагъэкIокIыщт. Джащ фэдэу текIоныгъэ къыдэзыхыгъэхэр форумым хэлажьэхэзэ, яшIэныгъэхэм джыри ахагъэхъон алъэкIыщт.
Проектэу «Энергетикэм хэхъоныгъэ егъэшIыгъэным иныбжьыкIэ екIолIакI» зыфиIорэм игъэцэкIэн зигукъэкIыхэр ыкIи IэпыIэгъу къезытыхэрэр Урысые Федерацием энергетикэмкIэ и Минис­терств, гъэсэныгъэмрэ шIэныгъэмрэкIэ Урысые Федерацием и Министерств, ныбжьыкIэ IофхэмкIэ Феде­-ральнэ агентствэр ыкIи нэмыкIхэр. ЧIы­дэгъэ-энергетическэ комплексым, инженер-техническэ гъэсэныгъэм, энерге­тикэм фэсакъыгъэным алъэныкъокIэ, ахэм зягъэушъомбгъугъэнымкIэ Уры-­
сыем иныбжьыкIэ Iофтхьабзэхэм яплан мы проектыр хагъэхьагъ.