Апэрэхэм язэнэкъокъу щытекIуагъэх
КIэлэцIыкIухэм ыкIи ныбжьыкIэхэм я Урысые общественнэ-къэралыгъо движениеу «Апэрэхэм я Движение» и Урысые проектэу «МедиаПритяжение» зыфиIорэм икIэух Москва дэт Лъэпкъ гупчэу «Урысыем» шышъхьэIум и 13 — 16-м щыкIуагъ.
Iофтхьабзэм нэбгырэ 1000-м ехъу хэлэжьагъ, ахэм ахэтыгъэ финалист 12-р Адыгеим щыщых. Проектым хэлажьэрэмэ яIофшIагъэ Урысыем иинформационнэ шъолъыр теплъэшIу къыфешIы.
Мыекъуапэ щыпсэухэу ыкIи икIэлэеджакIохэу Матвей Жилиныр, Егор Усенкэр, ТхьаицIыф Тамерлан, Ангелина Шукелович, Къунэ Надимэ, Арина Овчаренкэр, Гаджимурат Казаковыр, ахэм ягъэсакIоу Феликс Суздалевыр, колледжым истудент нэбгырэ 79-рэ лъэныкъоу «МедиаКоманда» зыфиIорэм хэлэжьагъэх. Хэгъэгум ишъолъыр анахь дэгъу 27-мэ ныбжьыкIэхэр ахэхьагъэх, ащ ишIуагъэкIэ проектым изэфэхьысыжь едзыгъуи акIугъ ыкIи къалэу Москва кIуагъэх. Медиапроектхэр ашIыхэзэ ныбжьыкIэхэр зэнэкъокъухэм ахэлэжьагъэх, ахэр яшъолъырхэм нэужым ащагъэцэкIэжьыщтых.
ТIэшъу Иляс яенэрэ классым щеджэ, Мыекъуапэ щэпсэу, Мэлгощ Салим япшIэнэрэ классым ис, Адыгэкъалэ щыщ, ахэр «Апэрэ Эфир» зыфиIорэ лъэныкъомкIэ финалым ихьагъэх. Видеохэр техыгъэнхэмкIэ ыкIи ахэр зэхэгъэуцожьыгъэнхэмкIэ, эфирым занкIэу къихьанхэмкIэ. видеоблогхэр зэращэнхэмкIэ ясэнаущыгъэ къагъэлъэгъуагъ.
Наталья Исаенкэр Тэхъутэмыкъое районым ит еджапIэу N 27-м ипащэ иупчIэжьэгъу, лъэныкъоу «Медиа ГъэсакIу» зыфиIорэм хэлэжьагъ. Джащ фэдэу ар медиасообществэм игъэ-
сакIу: я 27-рэ еджапIэм кIэлэцIыкIу медиагупчэ къыщызэIуахыгъ, ащ Наталья Виктор ыпхъур щэлажьэ, кIэлэеджакIохэу медиа Iофым зыфэзыкъудыихэрэм сэнэхьатыр аIэ къырагъэхьанымкIэ адэIэпыIэ.
Анастасия Бердюгинар Тэхъутэмыкъое районым щэпсэу, яхэнэрэ классым ис, лъэныкъоу «Апэрэ Кадр» зыфиIорэм ифинал ихьагъ. Ащ сурэттехэу, видеографэу ыкIи монтажерэу зыкъыщигъэлъэгъуагъ.
Финалистхэм апае Москва щызэхащэгъэ Iофтхьабзэм хэлэжьагъэхэм амал яIагъ мастер-классхэм, зэIукIэ гъэшIэгъонхэм ахэлэжьэнхэу, щызэнэкъокъугъэх ыкIи медиахолдингхэр зэрагъэлъэгъугъэх.
Лъэпкъ гупчэу «Урысыем» Апэрэхэм апае зэIукIэ зэкIэлъыкIохэр щыкIуагъэх. Урысыем и ЛIыхъужъхэу, президентскэ программэу «ЛIыхъужъхэм ялъэхъан» зыфиIорэм хэлажьэхэу Артур Орловым, Николай Соколовым ыкIи Илья Споняковым аIукIагъэх.